ރ. އުނގޫފާރުގައި ރީޖަނަލް ހޮސްޕިޓަލް އެކްސްޓެކްޝަން އިމާރާތުގެ ބިންގާ އަޅައިފި

ރ. އުނގޫފާރުގައި ރީޖަނަލް ހޮސްޕިޓަލްގެ އެކްސްޓެންޝަން އިމާރާތުގެ ބިންގާ އަޅައިފިއެވެ.

އުނގޫފާރުގައި ހޯމަ ދުވަހު ބޭއްވި ރަސްމިއްޔާތެއްގައި، އެ އަތޮޅު ހޮސްޕިޓަލް އެކްސްޓެންޝަން އިމާރާތުގެ ބިންގާ އަޅުއްވާދެއްވީ ހެލްތު މިނިސްޓަރ އަހުމަދު ނަސީމެވެ. އެލިޔާ ކޮންސްޓްރަކްޝަން ޕްރައިވެޓް ލިމިޓެޑްއާ ހަވާލުކޮށްގެން ކުރިއަށް ގެންދާ 72 މިލިއަން ރުފިޔާގެ މި ޕްރޮޖެކްޓު ނިމުމުން އެ އިމާރާތުން ވަރަށް ގިނަ ހިދުމަތްތައް ލިބެން ހުންނާނެއެވެ. އެގޮތުން ހޮސްޕިޓަލުގެ ފުރަތަމަ ފްލޯގައި 10 އެނދުގެ އެމަޖެންސީ ރޫމެއް، އަދި ރޭޑިއޮލޮޖީ ޑިޕާޓްމަންޓެއް ގާއިމްކުރުމަށް ވަނީ ނިންމާފައެވެ. އެ ރޭޑިއޮލޮޖީ ޑިޕާޓްމަންޓުން ސީޓީ ސްކޭން ހެދުމާއި، ދެ އެކްސްރޭ ރޫމް އަދި މެމޮގްރަފީގެ އިތުރަށް އަލްޓްރާ ސައުންޑް ސްކޭނިން އާއި، އެމްއާރްއައިގެ ހިދުމަތްވެސް ލިބޭނެކަމަށް ހެލްތު މިނިސްޓްރީން ބުންޏެވެ.

މީގެ އިތުރަށް ފުރަތަމަ ފްލޯގައި އައު ލެބޯޓްރީއެއްގެ އިތުރަށް ދެ ކޮޓަރީގެ އޮޕަރޭޝަން ތިއޭޓަރެއް ހަދަން ނިންމާފައިވާއިރު އޭގެ ތެރެއިން އެއް ކޮޓަރި ހާއްސަ ކުރާނީ ހަމައެކަނި ކަށީގެ އޮޕަރޭޝަންތަކަށް ކަމަށް މިނިސްޓްރީން ބުންޏެވެ. އަދި ދެވަނަ ފްލޯގައި، ފިޒިއޮތެރަޕީ ރޫމްއަކާއި ނުވަ ޕްރައިވެޓް ކޮޓަރި އަޅަން ވަނީ ނިންމާފައެވެ. އަދި މީގެ އިތުރަށް ހޮސްޕިޓަލް މެދުވެރިކޮށް އެ އަތޮޅުގެ އެހެން ރަށްރަށަށް މޯބައިލް ލެބޯޓްރީގެ ހިދުމަތް ފޯރުކޮށްދިނުމަށް ނިންމާފައިވާ ކަމަށްވެސް އެ މިނިސްޓްރީން ބުނެފައިވެއެވެ.

އުނގޫފާރުގައި ހޮސްޕިޓަލް އެކްސްޓެންޝަން އިމާރާތުގެ ބިންގާ އަޅައި ހޮސްޕިޓަލް ތަރައްގީކުރުމުގެ މަސައްކަތް ފަށާފައިވާއިރު، ކުރިއަށް އޮތް ހަތް މަސް ދުވަސް ތެރޭގައި އުނގޫފާރު ހޮސްޕިޓަލުން ޓާޝަރީ ހޮސްޕިޓަލް ފެންވަރުގެ ހިދުމަތް ދެވޭވަރު ކޮށްދެއްވާނެކަމަށް ރައީސް އިބްރާހިމް މުހައްމަދު ސޯލިހުވެސް ވިދާޅުވެފައިވެއެވެ. އެގޮތުން، ހޮސްޕިޓަލަށް ބޭނުންވާ ސްޕެޝަލިސްޓުން 17ން 26ށް އިތުރުކޮށް، އެހެނިހެން މުވައްޒަފުންގެ ޢަދަދު 183ން 220ށް އިތުރުކޮށްފައިވާކަން ފާހަގަކުރައްވައި އަދިވެސް އިތުރު ހިދުމަތްތަކަށް ތައްޔާރުވަމުން އަންނަ ކަމަށް އެމަނިކުފާނު ވިދާޅުވެފައިވެއެވެ.