ވެންޓިލޭޓަރު ގަންނަން ހަވާލުކުރި ޑުބާއީ ކުންފުނިން 37 މިލިއަން ރުފިޔާ ދައްކަން ދުބާއީގެ ކޯޓަކުން އަމުރުކޮށްފި
އާބިޓްރޭޝަން އަށް މައްސަލަ ހުށަހެޅީ މިދިޔަ ސަރުކާރުން، އާބިޓްރޭޝަނުން ވެސް ބުނެފައިވަނީ ފައިސާ އަނބުރާ ދޭން ޖެހޭނެ ކަމަށް
ފުރާނަ ސަލާމަތް ކުރުމަށް ވެންޓިލޭޓަރަކީ ހޮސްޕިޓަލުތަކުގައި ބޭނުން ކުރާ މުހިންމު އާލާތެއް
ކޮވިޑް-19 އާ ގުޅިގެން ވެންޓިލޭޓަރު ގެންނަން ހަވާލުކުރި ދުބާއީގެ އެގްޒެކިއުޓާސް ޖެނެރަލް ޓްރޭޑިން އިން ދިވެހި ސަރުކާރަށް 37 މިލިއަން ރުފިޔާ ދެއްކުމަށް ދުބާއީގެ ކޯޓުން އަންގާރަ ދުވަހު އަމުރުކޮށްފި އެވެ.
އެޓާނީ ޖެނެރަލް އަހުމަދު އުޝާމް ބުދަ ދުވަހު ވިދާޅުވީ، ދިވެހި ސަރުކާރަށް 8.9 މިލިއަން ދިރުހަމް (37 މިލިއަން ރުފިޔާ) އިއްޔެ އިން ފެށިގެން ކުރިއަށް އޮތް ހަތް ދުވަހުގެ ތެރޭގައި ދައްކަން އެގްޒެކިއުޓާސް ކުންފުންޏާއި އެ ކުންފުނީގެ ހިއްސާދާރުންގެ މައްޗަށް ދުބާއީގެ ކޯޓަކުން އަންގާރަ ދުވަހު އަމުރެއް ނެރެފައިވާ ކަމަށެވެ.
މި މައްސަލައިގެ ފެށުމަކީ 2020 ވަނަ އަހަރުގެ ފެބްރުއަރީ މަހުގައި، އޭރުގެ ރައީސް އިބްރާހިމް މުހައްމަދު ސޯލިހުގެ ސަރުކާރުން، ހެލްތު މިނިސްޓްރީ މެދުވެރިކޮށް އެގްޒެކިއުޓާސްއާ އެކު ވެފައިވާ އެއްބަސްވުމެކެވެ. ނަމަވެސް އެ ކުންފުނިން އެއްބަސްވުމާ ހިލާފުވުމާ ގުޅިގެން، މިދިޔަ އަހަރުގެ މާޗު މަހު މި މައްސަލަ ދުބާއީގެ ކޯޓަށް ހުށަހެޅުނެވެ.
ކޯޓަށް މައްސަލަ ހުށަހެޅުމުގެ ކުރިން، މިދިޔަ ސަރުކާރުން، 2023 ވަަނަ އަހަރުގެ ފެބްރުއަރީ މަހު ވަނީ އެ ފައިސާ ހޯދުމަށް އާބިޓްރޭޝަނަށް މައްސަލަ ހުށަހަޅާފައެވެ.
ދުބާއީގައި ހިންގާ އެގްޒެކިއުޓާސް ޖެނެރަލް ޓްރޭޑިންގ އާ ދެކޮޅަށް ކުރީ ސަރުކާރުން ފުރަތަމަ މައްސަލަ ހުށަހެޅީ މޯލްޑިވްސް އިންޓަނޭޝަނަލް އާބިޓްރޭޝަން ސެންޓަރަށެވެ.
މިދިޔަ ސަރުކާރުގެ އެޓަރނީ ޖެނެރަލްގެ އޮފީހުން ނެރުނު ބަޔާނެއްގައި އޭރު ބުނެފައި ވަނީ، 2020 ވަނަ އަހަރުގެ ފެބްރުއަރީ 2 ވަނަ ދުވަހު މިނިސްޓްރީ އޮފް ހެލްތާއި އެގްޒެކިއުޓާސް ޖެނެރަލް ޓްރޭޑިންގ އާ ދެމެދު ވެފައިވާ އެއްބަސްވުމާ އެ ކުންފުނިން ޚިލާފުވެފައިވާ ކަމަށެވެ. މި މައްސަލަ 2023 ވަނަ އަހަރުގެ ފެބްރުއަރީ 16 ވަނަ ދުވަހު އާބިޓްރޭޝަނަށް ފޮނުވިފައިވާ ކަމަށްވެސް ބަޔާނުގައި ބުނެފައިވެއެވެ.
އާބިޓްރޭޝަނުން ވަނީ ބަދަލާއި އާބިޓްރޭޝަނަށް ދައްކަންޖެހޭ ފައިސާއާ އެކު 32 މިލިއަން ރުފިޔާ ދެއްކުމަށް އަމުރުކޮށްފައެވެ. އެހެންނަމަވެސް އެ އަމުރަށް ތަބާނުވުމާ ގުޅިގެން، ޖޫރިމަނާ ހިމަނައިގެން ދެވަނަ ފަހަރަށް އަމުރު ނެރެ، މިހާރު އެ އަދަދު ވަނީ 37 މިލިއަން ރުފިޔާއަށް އިތުރުވެފައެވެ.
ކޮވިޑު ގެ އާލަމީ ވަބާގެ ދުވަސްވަރު ޖުމްލަ 75 ވެންޓިލޭޓަރު ގަތުމަށް ސަރުކާރުން އެ ކުންފުންޏަށް 34 މިލިއަން ރުފިޔާ ދިނެވެ. އެއްބަސްވިގޮތަށް އެ ކުންފުނިން ވެންޓިލޭޓަރުތައް ފޯރުކޮށްނުދިނެވެ.
އާބިޓްރޭޝަނުން ނިންމުމުން ވެސް އެ ފައިސާ ދިވެހި ސަރުކާރަށް އަނބުރާ ދީފައި ނުވާތީ އެ މައްސަލަ ދުބާއީގެ ކޯޓަށް ހުށަހެޅީ މިދިޔަ އަހަރުގެ މާޗު މަހު އެވެ.
ވެންޓިލޭޓަރުތަކުގެ ފުރަތަމަ ޝިޕްމަންޓްގެ ބައެއް ރާއްޖެއަށް ގެނެވުނު ނަމަވެސް، އެ ތަކެތި ބޭނުންކުރެވޭ ފެންވަރުގައި ނެތުމާއި، ބާކީ ވެންޓިލޭޓަރުތައް ހަވާލު ނުކުރުމުން، ހެލްތު މިނިސްޓްރީން 31 މިލިއަން ރުފިޔާ އަނބުރާ ރައްދުކުރުމަށް އެންގިއެވެ. ނަމަވެސް މިހާތަނަށްވެސް އެ ފައިސާ ލިބިފައިނުވެއެވެ.
ބަންޑާރަ ނައިބު އުޝާމް ފާހަގަ ކުރެއްވި ގޮތުގައި، އާބިޓްރޭޝަން ކުރިއަށްދިޔައިރު ވެސް އެގްޒެކިއުޓާސް ކުންފުނިން އެއްވެސް ބަޔާނެއް ހުށަހަޅާފައެއް ނުވެއެވެ. ދުބާއީގައި ރަޖިސްޓްރީކޮށްފައިވާ ކުންފުންޏަކަށްވާތީ، މައްސަލަ ކުރިއަށް ގެންދިޔައީ ދުބާއީގެ ކޯޓުގައެވެ.
