ރާއްޖެއިން އިންޑިއާއަށް ދާން ވިސާއަށް އެދި ހުށަހެޅުމަށް ދިމާވެފައިވާ ދަތިތައް ހައްލުކުރުމުގެ ގޮތުން ވިސާއަށް އެދި ހުށަހެޅުމުގެ ހުރިހާ ކަމެއް އޮންލައިންކޮށް ކުރެވޭ ގޮތަށް އިންތިޒާމުތައް ބަދަލުކޮށްފިއެވެ.
ރާއްޖެއިން އިންޑިއާއަށް ދާން ވިސާއަށް އެދުމަށް މީގެ ކުރިން ޓޯކަން ނަމްބަރު ދޫކުރަމުން އައީ ރާއްޖޭގައި ހުންނަ އިންޑިއަން ހައިކޮމިޝަނުންނެވެ. ޓޯކަން ދޫކުރާ ސިސްޓަމްގައި ދިމާވި މައްސަލަތަކަކާ ގުޅިގެން ވިސާ ލިބުމުގައި މި ފަހުން ވަނީ ބޮޑެތި ދަތިތަކާ ކުރިމަތިވެފައެވެ. އެކަން ހައްލުކުރުމަށް އެމްބަސީން ހޮޓްލައިންއެއް ހަދައި ހޮޓްލައިން މެދުވެރިކޮށް ޓޯކަން ނަމްބަރު ދޫކުރާ ގޮތަށްވެސް ހަމަޖެއްސިއެވެ.
އިންޑިއަން ހައިކޮމިޝަނުން ނެރުނު ބަޔާނެއްގައި ބުނީ މިއަދުން ފެށިގެން ފިޒިކަލް ޓޯކަންތަކާއި، ހޮޓްލައިން މެދުވެރިކޮށް ދޫކުރާ ޓޯކަންތައް ދޫކުރުން ހުއްޓާލާފައިވާ ކަމަށެވެ. އަދި ދެން އެކަން ކުރިއަށްދަނީ އޮންލައިންކޮށް ކަމަށް ބުނެފައިވެއެވެ. އެގޮތުން ދެން ޖެހޭނީ ވިސާ އެޕްލިކޭޝަން ފޯމު އޮންލައިންކޮށް ފުރިހަމަކުރުމަށް ފަހު ވިސާ އެޕޮއިންޓްމަންޓް ވެބްސައިޓުން ހައްދަން ކަމަށްވެސް ބަޔާނުގައި ބުނެފައިވެއެވެ.
ކޮވިޑް-19އާ ގުޅިގެން ގިނަ ގައުމުތަކުގެ ބޯޑަރުތައް ބަންދުކޮށްފައިވާއިރު، އިންޑިއާއަށްވެސް ދަތުރުކުރެވެނީ ކޮންމެހެން ކުރަން ޖެހޭ ޒަރޫރީ ބޭނުންތަކަށެވެ. އެގޮތުން ސިއްހީ އެމަޖަންސީތަކަށް ވަކި ހުއްދައަކާއެކު އެގައުމަށް ދަތުރުކުރެވެއެވެ.
