އެޗް.އައި.ސީ.ޑީ.ޕީ ސްކީމްގެ ދެވަނަ އިސްޓޯލްމެންޓްގެ ފައިސާ އިންޑިއާއިން ރާއްޖެއަށް ދީފި
އެޗް.އައި.ސީ.ޑީ.ޕީގެ ދަށުން 12 މަޝްރޫއެއް ހިންގުމަށް ހަމަޖެހިފައިވޭ
އެޗް.އައި.ސީ.ޑީ.ޕީ މަޝްރޫއެއްގެ މަސައްކަތް ކުރިއަށް ދަނީ
ހައި އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓްސް (އެޗް.އައި.ސީ.ޑީ.ޕީ) ސްކީމްގެ ދެވަނަ އިސްޓޯލްމެންޓްގެ ފައިސާ އިންޑިއާއިން ރާއްޖެއަށް ދީފިއެވެ.
މިއީ މި ޕްރޮޖެކްޓްގެ ދަށުން ހިންގަން ހަމަޖެހިފައިވާ 11 މަޝްރޫއަކަށް ބޭނުންވާ ފަންޑުގެ ދެވަނަ އިންސްޓޯލްމެންޓް ފައިސާއެވެ. އެއީ ،11،607،994 ( އެގާރަ މިލިއަން ހަސަތޭކަ ހަތްހާސް ނުވަސަތޭކަ ނުވަދިހަ ހަތަރު) ރުފިޔާއެވެ. މި ފަންޑުގެ ފުރަތަމަ އިންސްޓޯލްމެންޓް ކަމަށްވާ 10،154،198 (ދިހަ މިލިއަން ސަތޭކަ ފަންސާސް ހަތަރުހާސް ސަތޭކަ ނުވަދިހަ އަށެއް) ރުފިޔާ ހަވާލުކުރެވިފައިވަނީ 2020 ވަނަ އަހަރުގެ ޖުލައި މަހުގެ ތެރޭގައެވެ.
އެޗް.އައި.ސީ.ޑީ.ޕީގެ ދަށުން 12 މަޝްރޫއެއް ހިންގުމަށް ހަމަޖެހިފައިވާއިރު، 2019 ވަނަ އަހަރު ރާއްޖެއާއި އިންޑިއާ ދެމެދު ސޮއިކުރި އެމްއޯޔޫގެ ދަށުން ފޯރުކޮށްދިނުމަށް ހަމަޖެހިފައިވާ ޖުމްލަ އަދަދަކީ، 5.6 މިލިއަން ޑޮލަރު ނުވަތަ 85 މިލިއަން ރުފިޔާ އެވެ.
އެޗް.އައި.ސީ.ޑީ.ޕީ ތަކަކީ އިންޑިއާ އާއި ދިވެހިރާއްޖޭގެ މެދުގައިވާ ތަރައްގީގެ ޑައިނެމިކް ގުޅުމުގެ މުހިންމު އެއް ތަނބެވެ. މި މަޝްރޫއުތަކަކީ ރަށްރަށުގެ ރައްޔިތުންގެ ބޭނުންތައް ދެނެގަނެ، އެ ބޭނުންތައް ފުއްދުމަށްޓަކައި ފަންޑްކުރެވި، ލޯކަލް ކައުންސިލްތަކާއި މިނިސްޓްރީތަކުގެ ބެލުމުގެ ދަށުން ހިންގޭ މަޝްރޫއުތަކެކެވެ.
އެޗް.އައި.ސީ.ޑީ.ޕީ ސްކީމްގެ ދަށުން މިވަގުތު ކުރިއަށްދާ މަޝްރޫއު ތަކުގެ ތެރޭގައި އައްޑޫ ސިޓީގެ މަރަދޫ، ހިތަދޫ އަދި ހުޅުމީދޫގައި ގާއިމް ކުރާ މަސް ޕްރޮސެސިން 3 ޕްލާންޓާއި، އައްޑޫ ސިޓީގެ ފޭދޫ، މީދޫ، ހިތަދޫ، ހުޅުމީދޫ އަދި މަރަދޫގައި ގާއިމް ކުރުމަށް ހަމަޖެހިފައިވާ ޓޫރިޒަމް 5 ޒޯނާއި، ހޯރަފުށީގައި ގާއިމް ކުރެވޭ ފެން ބަންދު ކުރާ ޕްލާންޓްގެ މަޝްރޫއުއާއި؛ އައްޑޫ ސިޓީ ހުޅުމީދޫގައި ގާއިމްކުރެވޭ ޑްރަގް ޑީޓޮކްސް ސެންޓަރުގެ މަޝްރޫއުއާއި؛ ހަނިމާދޫ އެގްރިކަލްޗަރަލް ރިސާޗް ސެންޓަރުގައި ގާއިމް ކުރެވޭ ސޮއިލް ޓެސްޓިން ލެބް މަޝްރޫއު ހިމެނެއެވެ.
ދެވަނަ އިންސްޓޯލްމެންޓްގެ ބޭނުމަކީވެސް މަޝްރޫއުތަކުގެ މަސައްކަތް މަޑުޖެހުމެއްނެތި ކުރިއަށް ގެންދިއުމަށް އެހީތެރިވުމެވެ.
ފެބްރުއަރީ 2021 ގައި އިންޑިއާގެ އެކްސްޓާރނަލް އެފެއާޒް މިނިސްޓަރ ޑރ. ޖައިޝަންކަރު ދިވެހިރާއްޖެއަށް ކުރެއްވި ދަތުރުފުޅުގެ ތެރޭގައި އެޗް.އައި.ސީ.ޑީ.ޕީ ސްކީމްގެ ދަށުން އިތުރު މަޝްރޫއެއް ހިންގުމަށް ވަނީ ހަމަޖެހިފައެވެ. އެއީ ނ އަތޮޅު ކެނދިކުޅުދޫގައި މަސް ޕްރޮސެސިން ޕްލާންޓެއް ގާއިމް ކުރުމެވެ. މި މަޝްރޫއުގެ މަސައްކަތް ފެށުމަށް އަންނަނީ މަސައްކަތްކުރަމުންނެވެ.
