ސައްހަ ނޫން ލިޔެކިއުންތައް ހުށަހަޅައިގެން ރަޖިސްޓްރީކޮށްފައިވާ ގިނަ ވެހިކަލްތަކެއްގެ ރަޖިސްޓަރީ ބާތިލްކޮށްފިއެވެ.
މޯލްޑިވްސް ޓްރާންސްޕޯޓް އޮތޯރިޓީން ބުނީ ވެހިކަލްތައް ރަޖިސްޓަރީ ކޮށްފައިވަނީ ސައްހަ ނޫން ލިޔެކިއުންތައް ހުށަހަޅައިގެން ކަމުގައިވާތީ، ބައެއް ވެހިކަލްތަކުގެ ރަޖިސްޓަރީތައް ވަނީ ބާތިލްކޮށްފައި ކަމަށެވެ. އެގޮތުން 15 ވެހިކަލްއެއްގެ ރަޖިސްޓްރީ ބާތިލްކޮށްފައިވާ ކަމަށް އެއޮތޯރިޓީން ބުނެއެވެ.
ސައްހަ ނޫން ލިޔެކިއުންތައް ހުށަހަޅައިގެން ރަޖިސްޓްރީކޮށްފައިވާ ގިނަ ވެހިކަލްތަކެއްގެ ރަޖިސްޓަރީ ބާލިތްކޮށްފައިވާއިރު، ރާއްޖޭގައި ލައިސަންސް ދޫކުރުމާއި ވެހިކަލް ރަޖިސްޓްރީ ކުރުމުގެ ކަންކަމުގައި ވަރަށް ބޮޑެތި ކޮރަޕްޝަނުގެ އަމަލުތައް ފާހަގަކުރެވިފައިވާ ކަމަށް އެންޓި ކޮރަޕްޝަން ކޮމިޝަނުން ވަނީ ބުނެފައެވެ.
އޭސީސީގެ ކޮންސަލްޓެންޓް ޑރ. ސިމާދު ސައީދު ވިދާޅުވީ ނެޝަނަލް އެންޓި ކޮރަޕްޝަން ޕޮލިސީ އެކުލަވާލުމާ ގުޅޭ ގޮތުން ވަރަށް ގިނަ ފަރާތްތަކާއެކު މަޝްވަރާކޮށްފައިވާ ކަމަށެވެ. އެހެން މުއައްސާސާތަކުން އެއްކޮށްފައި ހުރި މައުލޫމާތުތަކަށް ބަލާއިރު އެންމެ ބޮޑަށް ކޮރަޕްޝަން އެކުލެވޭ މައްސަލައެއްގެ ގޮތުގައި ފާހަގަ ކުރެވުނީ ލައިސަންސް ދިނުމުގެ އުސޫލުކަމަށް ޑރ ސިމާދު ވިދާޅުވިއެވެ. އަދި ވިދާޅުވީ އެއްގަމު އުޅަނދު ދުއްވުމުގެ ލައިސަންސްގެ ކަންކަމުގެ އިތުރުން ޕްރޮޕަޓީ ރެޖިސްޓްރޭޝަން އަދި ވިސާ ދޫކުރުމުގެ ކަންކަމުގައި ކޮރަޕްޝަނުގެ އަމަލުތައް ގިނަ ކަމަށެވެ.
ޑރ ސިމާދު ވިދާޅުވީ މިހާރު ޓްރާންސްޕޯޓް އޮތޯރިޓީގައި ބޭނުން ކުރާ ސިސްޓަމަކީ ރަނގަޅު ސިސްޓަމެއް ނޫން ކަމަށާއި، ސިސްޓަމްގެ ތެރެއިން ގިނަ ބަޔަކަށް މައުލޫމާތު އޮޅުވާލުމުގެ ފުރުސަތު ލިބޭ ކަމަށެވެ. އަދި ކޮރަޕްޝަން ހުއްޓުމުގެ ގޮތުން ޑިސެންޓްރަލައިޒް ކޮށްގެން ވެސް އެޚިދުމަތް ދިނުމަކީ ކޮރަޕްޝަން ހުއްޓުވޭނެ އެއްގޮތް ކަމަށެވެ.
ލައިސަންސް ދޫކުރުމާއި ވެހިކަލް ރަޖިސްޓްރީ ކުރުމުގައި ބޮޑު ކޮރަޕްޝަނެއް އެކުލެވޭކަން އޭސީސީން ހާމަކޮށްފައިވާއިރު، ޓެސްޓު ނުހަދާ ލައިސަންސް ނެގުމާއި، އޮޅުވާލައިގެން ރަޖިސްޓްރީކުރާ މައްސަލައަކީ ޒަމާނުއްސުރެ ދައްކަމުންދާ ވާހަކަތަކަކެވެ. މިހާތަނަށް އެއްވެސް ސަރުކާރެއްގައި މި މައްސަލަތަކަށް ހައްލު ގެނައުމަށް އަމަލީ ސިފައެއްގައި އެއްވެސް މަސައްކަތެއް ކޮށްފައި ނުވެއެވެ.
ރާއްޖޭގައި 2020 ވަނަ އަހަރުގެ ސެޕްޓެންބަރު މަހުގެ ނިޔަލަށް ރަޖިސްޓްރީ ކޮށްފައިވާ 76،363 އުޅަނދުގެ ތެރެއިން 68،207 އުޅަނދަކީ ހަމައެކަނި ސައިކަލެވެ.
ޓްރާންސްޕޯޓުން ބުނީ ރާއްޖޭގައި ރަޖިސްޓްރީކޮށްފައިވާ ހުރިހާ ވެހިކަލްތައް ޕާކް ކުރުމަށް މިހާރުވެސް ތިން ހެކްޓަރުގެ ޕާކިންގ ސްޕޭސް ބޭނުންވެއެވެ. ނަމަވެސް މިއަދާ ހިސާބަށް އައިއިރު ޕާކިންގ ސްޕޭސްގެ ގޮތުގައި އޮތީ 18 ޕާކިން ސްޕޭސް ކަމަށާއި، މިއީ ބޭނުންވާ އަދަދުގެ 15 އިންސައްތަ ކަމަށް އެއޮތޯރިޓީން ބުނެއެވެ.
