ތިލަފުށީގެ ގޮނޑުން ދުންއެރުން މިއަހަރުގެ ނިޔަލަށް ހުއްޓުވޭނެ ކަމަށް ގަބޫލުކުރެވޭ ކަމަށް އެންވަޔަރަމަންޓް މިނިސްޓަރ ޑރ. ހުސެއިން ރަޝީދު ހަސަން ވިދާޅުވެއްޖެއެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ކާށިދޫ ދާއިރާގެ މެމްބަރ އަބްދުﷲ ޖާބިރު ތިލަފުށީގައި ކުނީގެ މައްސަލަ ބޮަޑުވެ، މެހި އާލާވެ، ދުންއެރުމުގެ މައްސަލަ ހައްލުކުރުމާ ގުޅޭގޮތުން ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ތިލަފުށީގައި މެހި އާލާވެ ދުންއެރުމުގެ މައްސަލަ ހައްލު ނުވެގެން އުޅޭ އެންމެބޮޑު ސަބަބަކީ މިކަން ހައްލުކުރުމަށް ކުރަންޖެހޭ މަސައްކަތަކީ ނިސްބަތުން ހަރަދު ވެސް ބޮޑު މަސައްކަތަކަށް ވުމާއެކު މި މައްސަލަ ހައްލުކުރުމަށް ކުރިންފެށިގެން ރާވައިގެން އިންވެސްޓްމަންޓުތަކެއް ނެތުން ކަމަށެވެ.

އަދި ތިލަފުއްޓަކީ 1997 ވަނަ އަހަރުން ފެށިގެން ކުނި ގެންގޮސް ޖަމާކޮށް ހާމަޔަށް ކުނި އަންދަމުންދާ އެންމެ ބޮޑު ކުނިގޮނޑަށް ވީހިނދު މި ކުނިގޮނޑަކީ އޭގެ އަމިއްލަ ޒާތުގައި ވެސް ހުޅުރޯވެ، އަނދަމުން ދާ ތަނެއްކަމަށް ވުމުން މިކަމަށް ހާއްސަ މެޝިނަރީ ނެތި އޭގެ އެހީއާ ނުލައި އެތަނުގެ އަލިފާން މިހާރު ނިއްވާ ނުލެވޭކަން މިނިސްޓަރ ފާހަގަކުރެއްވިއެވެ. މީގެ އިތުރުން އެއީ ނުރައްކާތެރި ކަމެއް ކަމަށް ވިދާޅުވެ މިނިސްޓަރ ވިދާޅުވީ މިތަނަކީ ބަޔޯޑިގްރޭޑަބަލް ކުނި ޖަމާކުރަމުން ދާ ތަނެއް ކަމަށެވެ. އެހެން ކަމުން މިފަދަ ތަކެތި ކުނިވެ ފަނާވެ އުފެދޭ ފުޅައިގެ ސަބަބުން މެހި އާލާވުމަށް މެދުވެރިވާ ކަމަށެވެ.

އަދި އަށަގަންނަ ބެކްޓީރިއާގެ ސަބަބުން މި ގޮނޑުގެ އެކި ދިމަދިމާލުގައި މީތޭން ގޭސް އުފެދުމާއި އޭގެ ސަބަބުން އަލިފާން ރޯވަމުން ދާކަން ވަނީ ފާހަގަކުރެވިފައި ކަމަށް މިނިސްޓާރ ވިދާޅުވިއެވެ. އެހެންކަމުން މިފަދަ ހާލަތެއްގައި އެތަނަށް ސީދާ ފެންއަޅައިގެން އަލިފާން ނިއްވަން އުޅުމަކީ އޭގެ ސަބަބުން ނުރައްކާތެރި ހާދިސާއެއް ހިނގާފާނެ ކަމެއްކަމަށް ކަމާބެހޭ މާހިރުން ވިދާޅުވާ ކަމަށް މިނިސްޓަރ ފާހަގަކުރެއްވިއެވެ.

އިތުރަށް ވާހަކަދައްކަވަމުން މިނިސްޓަރ ވިދާޅުވީ ތިލަފުށީގެ ގޮނޑުގައި މެހި އާލާވުން ހުއްޓުވުމާއި ދުން އެރުން ހުއްޓުވުމަށް 2020 ވަނަ އަހަރު މިނިސްޓްރީން ޕްލޭންކޮށްފައި ވީނަމަވެސް އެކަން ނުކުރެވުނީ ކޮވިޑް-19ގެ ގްލޯބަލް ޕެންޑެމިކްގެ ސަބަބުން ގައުމުތައް ބަންދުކޮށް މިކަމަށް ކަނޑައެޅި މެޝިނަރީތައް ހަދާ ކާރުހާނާތައް ހުއްޓުމަކަށް އައުމާ ގުޅިގެން ބޭނުންވާ މެޝިނަރީތައް ނުލިބުމުން ކަމަށެވެ.

އަދި މެޝިނަރީ ގެނައުމަށް 2020 ވަނަ އަހަރު ބޭރުގެ އެކި ފަރާތްތަކާއެކު ކޮންޓްރެކްޓް ކުރެވުނު ކަމަށާއި ގިނަ މެޝިނަރީ މިހާރު ވަނީ ތިލަފުއްޓަށް ގެނެވިފައި ކަމަށް ވެސް މިނިސްޓަރ ހާމަކުރެއްވިއެވެ. މީގެ އިތުރުން ކަމަށް ބޭނުންވާ ހުރިހާ މެޝިނަރީތައް ގެނެސް ނިމޭނެ ކަމަށް ކޮންޓްރެކްޓަރުން ބުނެފައިވަނީ މިއަހަރުގެ މެއި މަހުގެ ނިޔަަލަށް ކަމަށް ވެސް ވިދާޅުވިއެވެ. އަދި މި މެޝިނަރީ ބޭނުންކުރުމަށް ތަމްރީނު ދިނުމަށް ބޭނުންވާ މީހުން ނުގެނެވުމުގެ ސަބަބުން މި މަސައްކަތް ޕްލޭން ކޮށްފައިވާ ވަރަށްވުރެ ލަސްވެފައިވާ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ތިލަފުށީގެ ފަޅުން 15 ހެކްޓަރުގެ ބިން ހިއްކާ ކުރިންސުރެ އޮތް ކުނިގޮނޑު ހިމެނޭ ސަރަހައްދާ އެކު ޖުމްލަ 25 ހެކްޓަރު ބިމުގައި ޒޯން 2 ގެ ކުނި މެނޭޖްކުރާ ސަރަހައްދީ ފެސިލިޓީއެއް ގާއިމްކުރުމުގެ މަސައްކަތް މިނިސްޓްރީން ފަށާފައިވާ ކަމަށެވެ.