ޕީއެސްއައިޕީ ބަޖެޓުން އެންމެ ބޮޑު ޚަރަދެއް ކޮށްފައި ވަނީ ބަނދަރުގެ މަޝްރޫޢުތަކަށް
3 މާރިޗު 2021 | ބުދަ 03:18މިއަހަރުގެ ޕީއެސްއައިޕީ މަޝްރޫއުތަކަށް 8,441.5 މިލިއަން ރުފިޔާ ވަނީ އެޕްރޫވްކޮށްފައި
ރަކީދޫ ބަނދަރުގެ މަޝްރޫއުގެ މަސައްކަތް
ޕަބްލިކް ސެކްޓަރ އިންވެސްޓްމެންޓް ޕްރޮގްރާމް (ޕީއެސްއައިޕީ)ގެ ދަށުން އަހަރުގެ މިހާތަނަށް އެންމެ ބޮޑު ޚަރަދެއް ކޮށްފައި ވަނީ ބަނދަރުގެ އެކި މަޝްރޫޢުތަކަށް ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން އާންމުކުރާ 'ވީކްލީ ފިސްކަލް ޑިވެލޮޕްމެންޓް' ދައްކާގޮތުން ފެބްރުއަރީ މަހުގެ 25 ގެ ނިޔަލަށް ރާއްޖޭގެ އެކި ސަރަހައްދުތަކުގައި ބަނދަރުގެ ތަފާތު މަޝްރޫއުތައް ކުރިއަށް ގެންދަން ސަރުކާރުން ވަނީ ޕީއެސްއައިޕީ ބަޖެޓުން 92 މިލިއަން ރުފިޔާ ޚަރަދުކޮށްފައެވެ. އަދި އެއަރޕޯޓްތައް ތަރައްގީކުރުމަށް 14.8 މިލިއަން ރުފިޔާ ޚަރަދުކޮށްފައިވާއިރު، ބްރިޖްގެ އެކި މަޝްރޫޢުތަކަށް 22.2 މިލިއަން ރުފިޔާ ޚަރަދުކޮށްފައިވާ ކަމަށް ތަފާސްހިސާބުތަކުން ދައްކައެވެ.
ދަތުރުފަތުރުގެ އެކި މަޝްރޫޢުތަކަށް އަހަރުގެ މިހާތަނަށް 25 މިލިއަން ރުފިޔާ ޚަރަދުކޮށްފައިވާ ކަމަށް ތަފާސްހިސާބުތަކުން ދައްކައެވެ. އަދި ތައުލީމީ އެކި މަޝްރޫއުތަކަށް ސަރުކާރުން ވަނީ 33.2 މިލިއަން ރުފިޔާ ޚަރަދުކޮށްފައެވެ.
ތަފާސްހިސާބުތައް ދައްކާގޮތުން އަހަރުގެ މިހާތަނަށް ސަރުކާރުން ވަނީ ފެނާއި ނަރުދަމާގެ އެކި މަޝްރޫއުތަކަށް 54.7 މިލިއަން ރުފިޔާ ޚަރަދުކޮށްފައެވެ. އަދި ތިމާވެށީގެ އެކި މަޝްރޫއުތަކަށް 37.6 މިލިއަން ރުފިޔާ ހަރަދުކޮށްފައިވާއިރު، ބޯހިޔާވަހިކަމުގެ މަޝްރޫއުތަކަށް 36.6 މިލިއަން ރުފިޔާ ވަނީ ޚަރަދުކޮށްފައެވެ. ތަފާސްހިސާބުތައް ދައްކާގޮތުން ބިންހިއްކުމާއި މަގު ހެދުމުގެ އެކި މަޝްރޫއުތަކަށް 34.4 މިލިއަން ރުފިޔާ ވަނީ ޚަރަދުކޮށްފައެވެ.
މީގެ އިތުރުން ނެޝަނަލް އޯޑަރ އާއި ޕަބްލިކް ސެކިއުރިޓީގެ އެކި މަޝްރޫއުތަކަށް 4.6 މިލިއަން ރުފިޔާ ޚަރަދުކޮށްފައިވާއިރު، ސިއްހީ އަދި އިޖްތިމާޢީ މަޝްރޫއުތަކަށް 5.9 މިލިއަން ރުފިޔާ ވަނީ ހަރަދުކޮށްފައެވެ. އޮފީސް އިމާރާތްތަކަށާއި ކައުންސިލްތަކަށް ޕީއެސްއައިޕީ ބަޖެޓުން 1.9 މިލިއަން ރުފިޔާ ހަރަދުކޮށްފައިވާއިރު، މިސްކިތްތައް އިމާރާތްކުރުމަށް 1.8 މިލިއަން ރުފިޔާ ވަނީ ހަރަދުކޮށްފައެވެ. އަދި މަސްވެރިކަމާއި ދަނޑުވެރިކަމުގެ އެކި މަޝްރޫއުތަަކަށް 1.7 މިލިއަން ރުފިޔާ ވަނީ ހަރަދުކޮށްފައެވެ.
ޕީއެސްއައިޕީގެ މަޝްރޫއުތަކަށް މިއަހަރުގެ ބަޖެޓުން 8,441.5 މިލިއަން ރުފިޔާ ފާސްކޮށްފައިވާއިރު، މިހާތަނަށް 366.7 މިލިއަން ރުފިޔާ ވަނީ ޚަރަދުކޮށްފައެވެ.
