އެސްޓީއޯ ހަވަރު ވުމެންސް ހޭންޑްބޯޅަ މުބާރާތް ފެށިގެން ކުރިއަށް

ރާއްޖޭގައި ބޭއްވޭ އެންމެ އަގުބޮޑު އަންހެނުންގެ ހޭންޑްބޯޅަ މުބާރާތް ކަމަށްވާ "އެސްޓީއޯ ހަވަރު ވުމެންސް ހޭންޑްބޯޅަ މުބާރާތް 2021" ގދ. ތިނަދޫގައި ފެށިގެން ކުރިއަށް އެބަދެއެވެ.

ތިނަދު އާރް އަވަށު ދަނޑުގައި ކުރިއަށްދާ މި މުބާރާތަކީ ހަވަރު ސްޕޯޓްސްއިން އިންތިޒާމުކޮށްގެން ކުރިއަށްގެންދާ މުބާރާތެކެވެ. މި މުބާރާތުގައި 10 ޓީމެއް އަންނަނީ ވާދަކުރަމުންނެވެ. އެގޮތުން މުބާރާތުގައި ވާދަކުރަމުން އަންނަ ޓީމުތަކުގެ ތެރޭގައި ތިނަދުއަށް ނިސްބަތްވާ ހަތް ޓީމަކާއި، އަތޮޅު ތެރެއަށް ނިސްބަތްވާ ދެ ޓީމުގެ އިތުރުން މާލެއިން އެއް ޓީމު ހިމެނޭ ކަމަށް ހަވަރު ސްޕޯޓްސްއިން މައުލޫމާތުދެއެވެ.

ދެ ގްރޫޕަކަށް ބަހާލެވިގެން ކުރިއަށްގެންދާ މި މުބާރާތުގެ ކުޅުން ފަށާފައިވަނީ މިދިޔަ އަންގާރަ ދުވަހުއެވެ. ގްރޫޕް ސްޓޭޖުގެ ކުޅުން ނިމޭއިރު، ސެމީ ފައިނަލަށް ދަތުރުކުރާނީ ކޮންމެ ގްރޫޕަކުންވެސް އެންމެ މޮޅު ދެ ޓީމެވެ. އެގޮތުން ސެމީގެ މެޗުތައް އަންނަ މާޗު މަހުގެ ހަވަނަ ދުވަހު ކުޅުމަށް ތާވަލުކޮށްފައިވާއިރު، ފައިނަލް މެޗު ކުޅުމަށް ތާވަލުކޮށްފައިވަނީ މާޗު މަހުގެ އަށްވަނަ ދުވަހުގެރެއެވެ. މިދިޔަ އަންގާރަ ދުވަހު ގްރޫޕް ސްޓޭޖުގެ ކުޅުން ފެށިއިރު، މިހާތަނަށް މި މުބާރާތުގައި ވަނީ ޖުމްލަ ހަ މެޗު ކުޅެފައެވެ.

ހަވަރު ސްޕޯޓްސްއިން މައުލޫމާތުދޭ ގޮތުގައި މި އަހަރުގެ މުބާރާތުގެ ޗެމްޕިއަން ޓީމަށް 20،000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފައިވާއިރު، ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ.