މާލެ މިއޮތީ ލޮކްޑައުން ކުރަންޖެހޭ ހާލަތުގައި: ހެލްތް މިނިސްޓަރ

ރާއްޖޭގައި ކޮވިޑް-19ގެ ކޭސްތައް އިތުރުވެ، ބަލީގެ ނުރައްކާ ބޮޑުކަމުން، މާލެ އޮތީ ފުލް ލޮކްޑައުންއަކަށް ދާން ޖެހޭ ހާލަތުގައި ކަމަށާއި ނަމަވެސް ވީހާވެސް ބޮޑަށް މަސައްކަތް ކުރަމުން މިދަނީ ލޮކްޑައުންއަކަށް ނުގޮސްވޭތޯ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.

ޓުއާ އޮޕަރޭޓަރުންނާއި ޓުއާ އެޖެންސީތަކަށް ހާއްސަ ގާނޫނެއް އެކުލަވާލުމުގެ މަސައްކަތް ރައްޔިތުންގެ މަޖިލީހުން ކުރަމުންދާތީ، ކަމާ ބެހޭ ފަރާތްތަކާއެކު މަޖިލީހުގެ އިދާރާގައި ބުރާސްފަތި ދުވަހު ބޭއްވި މަޝްވަރާ ބައްދަލުވުމުގައި ހެލްތް މިނިސްޓަރު ނަސީމު ވިދާޅުވީ، ރާއްޖޭގެ އިޤްތިޞާދު ބިނާވެފައި އޮންނަނީ ޓޫރިޒަމްއަށް ކަމަށާއި އަދި ބޭރު ފައިސާގެ 84 ޕަސެންޓަކީ ޓޫރިޒަމްގެ ދާއިރާއިން ވަންނަ އާމްދަނީ ކަމަށެވެ. އެހެންކަމުން ރާއްޖެ ލޮކްޑައުންކޮށް، އިޤްތިޞާދަށް އަސަރުކުރާ ކަމެއް ކުރުމަކީ ކުރެވޭނެ ކަމެއް ނޫންކަމަށެވެ. ނަސީމް ވިދާޅުވީ، ކޮވިޑްގެ ހާލަތު ގޯސްވެގެން އުޅެނީ މާލެ ސަރަހައްދުގައި އެކަނި ކަމަށެވެ. ރާއްޖޭގެ ރަށްތަކުގައި އަދި ރިސޯޓްތަކުގައި ވެސް ކޮވިޑްގެ ހާލަތު އެހާބޮޑަށް ގޯސްނުވާކަމަށް މިނިސްޓަރު ވިދާޅުވިއެވެ.

މިނިސްޓަރު ނަސީމް ވިދާޅުވީ، މިބަލީ ނުރައްކާތެރިކަން ވެސް އާންމުންނަށް އަންގައި ދިނުމުގެ ގޮތުން އިތުރު ޕްރޮގްރާމްތަކެއް ހިންގަން ޖެހޭ ކަމަށާއި އަދި މަޖިލީހުން ވެސް އެކަމަށް އެއްބާރުލުން ދެއްވުމަށް އެދިވަޑައިގަންނަވާ ކަމަށެވެ. އެގޮތުން، ކުރިޔަށް އޮތް ތަނުގައި ރައްޔިތުން ހޭލުންތެރި ކުރުމުގެ ގޮތުން ޓީވީތައް މެދުވެރިކޮށް މިހާރަށްވުރެ ބޮޑަށް މައުލޫމާތު ފެތުރުމުގެ މަސައްކަތް ހެލްތު މިނިސްޓްރީން ކުރާނެ ކަމަށް ވެސް މިނިސްޓަރު ވިދާޅުވިއެވެ.

މީގެ އިތުރުން ނަސީމް ވަނީ ކޮވިޑްއިން ރައްކާތެރިވުމަށް އެކަށައަޅަފައިވާ ގައިޑް ލައިންތަކާ ގުޅޭގޮތުން، ނުވަތަ ހެލްތް ޕްރޮޓެކްޝަން އެޖެންސީގެ އެންގުންތަކާމެދު ބައެއް ދީނީ އިލްމުވެރިންގެ މެދުގައި ޚިޔާލުތަފާވެފައިވާތީއާ، އަދި ބައެއް ދީނީ އިލްމުވެރިން އެޗްޕީއޭއިން އަންގާ އެންގުންތަކަށް އަމަލުކުރުމަށް ދެކޮޅު ހަދަމުންދާތީ އެކަމާމެދު ކަންބޮޑުވާ ކަމަށް ވިދާޅުވެފައެވެ.

މިދިޔަ ޑިސެމްބަރު މަހުން ފެށިގެން ރާއްޖޭގައި ކޮވިޑް ކޭސްތައް އިތުރުވަމުންގޮސް މިހާރު އެވްރެޖްކޮށް ކޮންމެ ދުވަހަކު 100އަށްވުރެ ގިނަ މީހުން އެބައްޔަށް ޕޮޒިޓިވްވެއެވެ. އެހެންކަމުން ކުރިން އަޅާފައިވާ ފިޔަވަޅުތައް، ފަހުން ވަނީ ހަރުކަށިކޮށްފައެވެ.

އެޗްޕީއޭއިން ބުދަ ދުވަހު އާންމުކުރި މައުލޫމާތުތަކަށް ބަލާއިރު ބުދަ ދުވަހުވެސް 124 މީހުން ކޮވިޑަށް ޕޮޒިޓިވްވެފައިވެއެވެ. މިހާތަނަށް ރާއްޖޭގައި 19،162 މީހަކު ވަނީ ކޮވިޑަށް ޕޮޒިޓިވްވެފައެވެ. މި ފެބްރުއަރީ މަހުން ފެށިގެން ރާއްޖޭގައި ވެކްސިން ޖެހުން ކުރިއަށްދާއިރު، މިހާތަނަށް 90،000 އަށްވުރެ ގިނަ މީހުންނަށް ވެކްސިންގެ ފުރަތަމަ ޑޯޒް ދީފައިވެއެވެ.