ލީގު ހުއްޓުމަކަށް އައުމުން ކުޅުންތެރިން ހަލާކުވާނެ: ޑުންގާ

ދިރާގު ދިވެހި ޕްރިމިއާ ލީގުގެ ކުޅުން ހުއްޓުމަކަށް އައުމުން ކުޅުންތެރިން ހަލާކުވާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓެކްނިކަލް ޑިރެކްޓަރު އަޙްމަދު ޝަރީފް (ޑުންގާ) ވިދާޅުވެއްޖެއެވެ.

ދިވެހި ޕްރިމިއާ ލީގު މެދުކަނޑާލަން ނިންމީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ. އެއާއެކު ފުރަތަމަ ޑިވިޝަނުގެ ހުރިހާ ކުލަބަކުން ވަނީ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށާއި، އެހެންކަމުން އަލުން ފަރިތަކުންތައް ފަށައި، ލީގު ފެށުމުގެ ހުއްދަދިނުމަށް ގޮވާލާފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަދައްކަވަމުން ޑުންގާ ވިދާޅުވީ މިދިޔަ ސީޒަނަށްފަހުވެސް ބޮޑު މެދުކެނޑުމެއް އައިރު، ކުޅުންތެރިންނަށް އެކަމުގެ ވަރަށް ބޮޑު އަސަރުތަކެއް ކުރި ކަމަށެވެ. އެގޮތުން ސީޒަން ފެށުނުއިރު ކުޅުންތެރިންގެ ފިޓްނަސް އެކި މައްސަލަތައް ދިމާވި ކަމަށާއި، އެކަމަކު ލީގުގެ ފުރަތަމަ ބުރު ނިމުނުއިރު، ކުޅުންތެރިންގެ ފެންވަރު ވަރަށް ބޮޑުތަން ރަނގަޅުވި ކަމަށްވެސް ވިދާޅުވިއެވެ. އެހެންކަމުން އަނެއްކާވެސް ޓީމުތަކުން ސުމަކުން ފައްޓަން ޖެހޭއިރު، ލީގު ހުއްޓުމަކަށް އައުމުން ކުޅުންތެރިން ހަލާކުވާނެ ކަމަށާއި، މިކަމުގެ ސަބަބުން ލީގުގެ ފޯރިވެސް ކުޑަވެގެންދާނެ ކަމަށްވެސް ޑުންގާ ވަނީ ވިދާޅުވެފައެވެ.

ޑުންގާ އިތުރަށް ވިދާޅުވީ މި ފަހަރުގެ ލީގަކީ މިހާތަނަށް އައިރު ފެނިގެންދިޔަ އެންމެ ރަނގަޅު އެއް ލީގު ކަމަށާއި، އެގޮތުން މި ސީޒަނުގައި ޒުވާން ކުޅުންތެރިންގެ ކުރިއެރުން ވަރަށް ބޮޑަށް ފާހަގަވެގެންދިޔަ ކަމަށެވެ. އެކަމަކު ލީގު މެދުކަނޑާލުމުން އަނެއްކާވެސް އެ ކުޅުންތެރިންނަށްވެސް އުނދަގޫތަކެއް ކުރިމަތިވާނެ ކަމަށްވެސް ވިދާޅުވިއެވެ.

އަދި ލީގުގެ ކުޅުން އަލުން ފެށުމަށް ހުއްދަނެތް ނަމަވެސް، އެންމެ ކުޑަމިނުން ޓީމުތަކަށް ފަރިތަކުރެވޭނެ މާޙައުލެއް ލިބިއްޖެނަމަ، މިހާރު އިން ފްލޯގައި ކަންކަން ކުރިއަށްގެންދޭވެނެ ކަމަށާއި، އެކަމަކު އެ ފުރުސަތުވެސް ނުލިބެއްޖެނަމަ، ލީގުގެ އަލުން ފަށައިގެން ދެވަނަ ބުރުގައި ދެން ކުޅޭ މެޗުތަކުގައި ޓީމުތަކުގެ ކުޅުމަށާއި، މުޅި ލީގުގެ ކުޅުމަށްވެސް ވަރަށް ބޮޑު އަސަރުތަކެއް ކުރާނެ ކަމަށްވެސް ވަނީ ވިދާޅުވެފައެވެ.

ދިވެހި ޕްރިމިއާ ލީގު އަލުން ފަށަން މަސައްކަތް ކުރަމުން އަންނައިރު، ދިވެހި ޕްރިމިއާ ލީގުގެ ހުރިހާ ކުޅުންތެރިންނާއި އޮފިޝަލުން މިހާރު ވަނީ ވެކްސިންގެ ފުރަތަމަ ޑޯޒް ޖަހާފައެވެ. އެއާއެކު ދާދި ފަހުން އެފްއޭއެމުގެ ރައީސް ބައްސާމް އަދީލް ޖަލީލް ވަނީ އައު އުސޫލުތަކާއެކު ފަރިތަކުރުންތައް ފެށުމުގެ ހުއްދަ ވަރަށް އަވަހަށް ފުރަތަމަ ޑިވިޝަނުގެ ކުލަބުތަކަށް ލިބިގެންދާނެ ކަމަށް ވިދާޅުވެފައެވެ.

ދެވަނަ ބުރުގެ މެދުތެރެއިން ދިވެހި ޕްރިމިއާ ލީގުގެ ކުޅުން ވަގުތީ ގޮތުން މެދުކަނޑާލިއިރު، މި ސީޒަން ފެށުމަށް އެންމެ ފުރަތަމަ ކުލަބުތަކުން އޮކްޓޯބަރު މަހު ފަރިތަކުރުންތައް ފެށީވެސް އެފްއޭއެމާއި އެޗްޕީއޭ ގުޅިގެން އެކުލަވާލި ހާއްސަ އުސޫލުތަކެއްގެ ދަށުންނެވެ. އަދި އޭގެ ފަހުން އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން ފަށާފައިވަނީ މިދިޔަ އަހަރުގެ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ. އަދި ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ.