އައްޑޫ ސިޓީން އިތުރު 5 މީހަކު ޕޮޒިޓިވްވެ، ޖުމްލަ 69ށް!
22 ފެބުރުއަރީ 2021 | ހޯމަ 04:2043 އެކްޓިވް ކޭސް ހިމެނޭއިރު، ފާއިތުވި 24 ގަޑިއިރުގެ ތެރޭގައި 116 ސާމްޕަލެއް ނަގާފައިވޭ
ހުޅުމީދޫ، އައްޑޫ ސިޓީ، ކޭސްތައް ފެނުމާ ގުޅިގެން މިހާރު ވަނީ މޮނިޓަރިންއަށް ލާފައި
އައްޑޫ ސިޓީން އިތުރު 5 މީހަކު ޕޮޒިޓިވްވެ، ޖުމްލަ 69ށް އަރައިފިއެވެ.
އައްޑޫ އެމަރޖެންސީ އޮޕަރޭޝަން ސެންޓަރުން އާއްމުކޮށްފައިވާ ތަފާސްހިސާބުތަކަށް ބަލާއިރު، ހޮނިހިރު ދުވަހުގެ އިރުއޮއްސި 6:00ން އާދިއްތަ ދުވަހުގެ އިރުއޮއްސި 6:00ށް އިތުރު 5 މީހަކު ބައްޔަށް ޕޮޒިޓިވްވެ ޑައިރެކްޓް ކޮންޓެކްޓުންގެ ގޮތުގައި 364 މީހަކު ފާހަގަކުރެވިފައިވެއެވެ.
ކޭސްތަކުގެ ތަފްސީލަށް ބަލާއިރު، ހިތަދޫއިން 21 މީހުން، މީދޫއިން 2 މީހުން، މަރަދޫފޭދޫއިން 4 މީހުން، ފޭދޫއިން 16 މީހުން އަދި އެމްޓީސީސީގެ މަސައްކަތު ސައިޓްއިން 26 މީހަކު ޕޮޒިޓިވްވެފައިވެއެވެ. 43 އެކްޓިވް ކޭސް ހިމެނޭއިރު، ފާއިތުވި 24 ގަޑިއިރުގެ ތެރޭގައި 116 ސާމްޕަލެއް ނަގާފައިވެއެވެ. އަދި ކޭސްތައް ފެންނަމުންދާތީ ޚާއްސަ ސަމާލުކަމެއްދީގެން އައްޑޫއިން ރެމްޑަމްގެ ސާމްޕަލްތައް ނަގަމުންދާއިރު، މިހާތަނަށް 2408 ސާމްޕަލެއް ނަގާފައިވެއެވެ.
އެސެންޓަރުން ބުނީ މިހާރު 26 މީހަކު ބަލިން ރަނގަޅުވެފައިވާ ކަމަށާއި، އެޑްމިޓްކޮށްގެން ފަރުވާ ދެމުންދަނީ އެކަކަށް ކަމަށެވެ.
އައްޑޫގައި 194 ގެއެއް ވަނީ ކަރަންޓީންއަށް ވެސް ލާފައެވެ.
އައްޑޫ ސިޓީން ދެ ކްލަސްޓަރއެއް ފެނިފައިވެއެވެ. އެއީ ޕްރޮޖެކްޓް ސައިޓަކުން ފެނުނު ކްލަސްޓަރއަކާއި، އޭވިއޭޝަން ކްލަސްޓަރއެކެވެ. ޕްރޮޖެކްޓް ސައިޓް ކްލަސްޓަރއާ ގުޅިގެން ހުޅުދޫމީދޫން ނެގި ހުރިހާ ސާމްޕަލެއް ވަނީ ނެގެޓިވްވެފައެވެ. އެ ކްލަސްޓަރ ކޮންޓެއިންވެފައިވީ ނަމަވެސް އޭވިއޭޝަން ކްލަސްޓަރ އޮތީ އެކްޓިވްކޮށެވެ.
