ފުވައްމުލައް ސިޓީއިން އިތުރު ކްލަސްޓަރއެއް!
އައު ކްލަސްޓަރގެ ކޭސްއާ ގުޅުން ހުރި އިތުރު ހަ މީހަކު އާދިއްތަ ދުވަހު ޕޮޒިޓިވްވެފައިވޭ
ފުވައްމުލަކު ސިޓީގެ މަގެއް، ކޮވިޑް-19އާ ގުޅިގެން ގިނަ ފިޔަވަޅުތަކެއް އަޅާފައިވޭ
ކޮވިޑް-19ގެ ކޭސްތައް ފެންނަމުންދާ ފުވައްމުލައް ސިޓީއިން އިތުރު ކްލަސްޓަރއެއް ފެނިއްޖެއެވެ.
އާދިއްތަ ދުވަހުގެރޭ ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ފުވައްމުލައް ސިޓީއިން ކުރިން ޕޮޒިޓިވް ކޭސްތައް ފެނުނު ކްލަސްޓާއާ ގުޅުމެއް ނެތް އައު ކްލަސްޓާއެއް ފެނިފައިވާ ކަމަށެވެ.
ޑރ. ނަޒްލާ ވިދާޅުވީ ކުރީގެ ކޭސްތަކާ ލިންކުނުވާ އިތުރު ކޭސްއެއް ފެނިފައިވާއިރު، އެކޭސްއާ ގުޅުން ހުރި އިތުރު ހަ މީހަކު އާދިއްތަ ދުވަހު ޕޮޒިޓިވްވެފައިވާ ކަމަށެވެ.
ފުވައްމުލައް ސިޓީގައި ކޮވިޑު ފެތުރޭކަން އެނގުނީ މި މަހުގެ ހަތްވަނަ ދުވަހު އެރަށުން ނެގި ރެންޑަމް ސާމްޕަލެއް ޕޮޒިޓިވް ވުމުންނެވެ. އެކޭސްއާ ގުޅިގެން ކޮންޓެކްޓް ޓްރޭސިންގެ މަސައްކަތްކޮށް ނެގި ސާމްޕަލްގެ ތެރެއިން އިތުރު 8 މީހަކު ޕޮޒިޓިވްވެފައިވެއެވެ.
ފުވައްމުލައް ސިޓީން ކޮވިޑްގެ ކޭސްތައް ފެންނަމުންދާތީ ރައްކާތެރިވުމުގެ ގޮތުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ކޮންމެހެން ބޭރަށް ނުކުންނަން ޖެހިގެން މެނުވީ ބޭރަށް ނުކުމެ ނޫޅުމަށް އަންގާފައިވާއިރު، ހުރިހާ ކުޅިވަރު ޙަރަކާތްތަކާއި ކަސްރަތުގެ ޙަރަކާތްތައް ވަނީ ހުއްޓުވާފައެވެ. އަދި ފިހާރަތަކާއި ޓެކްސީތަކުން ޚިދުމަތްދޭއިރު، އެޗްޕީއޭގެ ގައިޑްލައިންތަކަށް އަމަލުކުރަން ވެސް ވަނީ އަންގާފައެވެ.
ފުވައްމުލަކު ސިޓީގެ ޔުނިވަރސިޓީތަކާއި، ކޮލެޖުތަކާއި، ސުކޫލުތަކަށް ދަރިވަރުން ހާޒިރުވެގެން ކްލާސްތައް ކުރިއަށް ގެންދިއުން ވެސް ވަނީ މެދުކަނޑައިލާފައެވެ. ހަމައެއާއެކު، ހޮޓާ ކެފޭ ރެސްޓޯރަންޓުތަކުން ވެސް ޚިދުމަތް ދިނުން ހުއްޓުވާފައިވާއިރު، އިސްތިސްނާ ވަނީ ޑެލިވަރީގެ ޚިދުމަތްތަކެވެ.
