ފާދިއްޕޮޅުގެ ތަރައްގީގެ ގިނަ މަޝްރޫއުތަކެއް މިއަހަރު ފެށިގެންދާނެ – ރައީސް ޞާލިޙް
ނައިފަރުގެ މަގު ހެދުމުގެ މަސައްކަތް މިއަހަރުގެ ތެރޭގައި ޕްލޭން ކުރެވިގެންދާނެ
ރަށްވެހި ފަތިސް- ކެނޑިޑޭޓުންނާއި ކެމްޕެއިން ޓީމުތަކާއި ބައްދަލުކުރެއްވުން
ފާދިއްޕޮޅުގެ ރަށްރަށުގައި ތަރައްގީގެ ގިނަ މަސައްކަތްތަކެއް މިއަހަރު ފެށިގެންދާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ން ބާއްވާ "ރަށްވެރި ފަތިސް" ކެމްޕެއިން ހަރަކާތުގައި ވާހަކަދައްކަވަމުން ރައީސް ޞާލިޙް ވިދާޅުވީ ފާދިއްޕޮޅު އަތޮޅަކީ ސަރުކާރުން އިސްކަމެއްދީގެން ތަރައްގީގެ މަޝްރޫއުތައް ހިންގެވުމަށް ނިންމާފައިވާ އަތޮޅެއް ކަމަށާއި، އެހެންކަމުން މިއަހަރުގެ ތެރޭގައި ފާދިއްޕޮޅު އަތޮޅުގެ ތަރައްގީގެ މަޝްރޫއުތައް ފެށިގެންދާނެ ކަމަށެވެ.
ނައިފަރަކީ މަސްވެރިކަމުގެ ރަށަކަށްވެފައި މަސްވެރިންނަށް ދިމާވެފައިވާ މަސްކިރުވުމުގެ ދަތިކަމަށް ފެލިވަރު ތަރައްގީވެގެން އައުމުން ހައްލު ލިބިގެންދާނެ ކަމަށާއި، އަދި ނައިފަރުގެ ފެނާއި ނަރުދަމާގެ މަސައްކަތް ނިމުމުން މަގު ހެދުމުގެ މަސައްކަތް ފެށިގެންދާނެކަމަށް ރައީސް ޞާލިޙް ވިދާޅުވިއެވެ. ހޮސްޕިޓަލް އިތުރަށް ތަރައްގީ ކުރުމަށް ގިނަ މަސައްކަތްތަކެއް ޕްލޭން ކުރެވިފައިވާކަމަށްވެސް ރައީސް ވިދާޅުވިއެވެ.
ހިންނަވަރުގައި ނިމިދިޔަ އަހަރު ތަރައްގީގެ މަސައްކަތް މަދު ނަމަވެސް މިއަހަރު ހިންނަވަރުގައި ތަރައްގީގެ ގިނަ މަޝްރޫއުތަކެއް ކުރިޔަށް ގެންދިޔުމަށް ނިންމާފައިވާ ކަމަށް ރައީސް ވިދާޅުވިއެވެ. އެގޮތުން ރަށުގެ ބަނދަރުން ހަލާކުވެފައިވާ ބައި ހެދުމަށް އެމްޓީސީސީއާ މިހާރު ހަވާލުކުރެވިފައިވާ ކަމަށާއި، ސިއްހީ މަރުކަޒުގެ މަސައްކަތް މިއަހަރު ދެވަނަ ކުއާޓާގެ ތެރޭގައި ފެށިގެންދާނެކަމަށް ވިދާޅުވިއެވެ. އަދި މަގު ހެދުމުގެ މަސައްކަތުގެ ސާވޭގެ މަސައްކަތް މިއަހަރު ތެރޭ ފެށުމަށް ތައްޔާރީތައްވަމުން އަންނަ ކަމަށް ރައީސް ޞާލިޙް ވިދާޅުވިއެވެ. މީގެ އިތުރުން ކުނި މެނޭޖު ކުރުމުގެ ޕްލޭން ހެދިފައިވާކަމަށާއި އޭޕްރީލްމަހުގެ ތެރޭގައި އެ މަސައްކަތް ފެށިގެންދާނެކަމަށްވެސް ރައީސް ޞާލިޙް ވިދާޅުވިއެވެ.
ކުރެންދޫއަށް ދިމާވެފައިވާ މައްސަލަތައް ހައްލު ކޮށްދެއްވާނެ ކަމަށް ވިދާޅުވަމުން ރައީސް ޞާލިޙް ވިދާޅުވީ އެރަށު ނަރުދަމާގެ މައްސަލައަށް އަވަސް ހައްލެއް ހޯއްދަވައި ދެއްވުމަށް އެ މަސައްކަތް ފެނަކައާ ހަވާލުކުރެވިފައިވާ ކަމަށެވެ. އަދި ފެނުގެ ހިދުމަތް ދިނުމަށް މި މަހު ސޮއި ކުރެވޭ ރަށްތަކުގެ ތެރޭގައި ކުރެންދޫ ހިމެނޭ ކަމަށް ރައީސް ޞާލިޙް ވަނީ ވިދާޅުވެފައެވެ. މީގެ އިތުރުން ކުރެންދޫ ގިރާ ސަރަހައްދުގެ މަސައްކަތާއި، އޭޓީއެމްގެ ހިދުމަތް މިއަހަރުގެ ތެރޭގައި ފެށިގެންދާނެ ކަމަށާއި، މަލްޓި ޕާޕަސް ހޯލާއި، މިސްކިތުގެ މަސައްކަތް ވެސް މިއަހަރު ފެށިގެންދާނެ ކަމަށް ރައީސް ޞާލިޙް ވިދާޅުވިއެވެ.
އޮޅުވެލި ފުށި ސްކޫލް ތަރައްގީ ކުރުމަށް މަސައްކަތް ކުރައްވާނެ ކަމަށް ވިދާޅުވަމުން ރައީސް ޞާލިޙް ވިދާޅުވީ އެރަށު ސްކޫލުގައި މަލްޓިޕާޕަސް ހޯލް އެޅުމުގެ މަސައްކަތް ފެށިގެންދާނެ ކަމަށެވެ. އަދި ސިއްހީ ހިދުމަތުގެ ފެންވަރު ރަނގަޅު ކުރުމަށް ސަމާލުކަމެއް ދޭނެކަމަށް ރަވިދާޅުވިއެވެ.
