ކ. މާލެ
|
21 ފެބްރުއަރީ 2021 | އާދީއްތަ 09:58
ރަށްވެހިފަތިސް ކެމްޕެއިން ޖަލްސާގައި ރައީސް، އިބްރާހިމް މުހައްމަދު ޞާލިހް
ރަށްވެހިފަތިސް ކެމްޕެއިން ޖަލްސާގައި ރައީސް، އިބްރާހިމް މުހައްމަދު ޞާލިހް
ނަޖާހް އަހްމަދު
ކައިރީގައި ހުރި ރަށްތައް ގުޅާލައި ތަރައްގީކުރުން
ބިން ހިއްކުމުގެ ބަދަލުގައި ކައިރީގައި ހުރި ރަށްރަށާއި ގުޅާލައި ތަރައްގީކުރުމުގެ ވިސްނުން ގެންގުޅުއްވަން - ރައީސް ޞާލިހް
 
ސަރުކާރުގެ އަމާޒަކީ ރާއްޖޭގެ ހުރިހާ ރަށެއްގައި ތަރައްގީގެ މަޝްރޫއުތައް ކުރިއަށް ގެންދިއުން
 
ކައިރީގައި ހުންނަ ފަޅުރަށްތަކާ ގުޅާލައި، ރަށްތައް ތަރައްގީކުރުމަކީ ދިގު މުސްތަގުބަލުގައި ގައުމަށް ބޮޑު ފައިދާއެއް ކުރާނެ ކަމެއް
 
ރައްޔިތުންނަށް ބޯހިޔާވަހިކަން ފޯރުކޯށްދިނުމަށް ސަރުކާރުން ހާއްސަ ސަމާލުކަމެއް ދެއްވާ

ރަށްރަށުގައި ދިރިއުޅޭ ރައްޔިތުންނަށް ބޯހިޔާވަހިކަން ފޯރުކޮށް ދިނުމަށާއި، ރަށްރަށުގެ އިޤްތިޞާދީ ހަރަކާތްތައް އިތުރުކުރުމަށް ބިން ހިއްކުމުގެ ބަދަލުގައި ކައިރީގައި އޮންނަ ފަޅުރަށްތަކާއި ގުޅާލައި ރަށްތައް ތަރައްގީކުރުމުގެ ވިސްނުން ގެންގުޅުންވާ ކަަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް ވިދާޅުވީ، ރަށްރަށުގައި ދިރިއުޅުއްވާ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ސަރުކާރުން ހާއްސަ ސަމާލުކަމެއް ދެއްވާ ކަމަށާއި މިކަންކަން ހާސިލްކުުރުމަށް ރަށްރަށުގެ ބިން ހިއްކުމުގެ ބަދަލުގައި ކައިރީގައި ހުންނަ ފަޅުރަށްތަކާއި ގުޅާލައި، ރަށްތައް ތަރައްގީކުރުމަކީ ދިގު މުސްތަގުބަލުގައި ގައުމަށް ބޮޑު ފައިދާއެއް ކުރާނެ ކަމެއް ކަމަށެވެ.

ރައީސް މިގޮތަށް ވިދާޅުވެފައި ވަނީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރަށްވެހިފަތިސް ކެމްޕެއިން ޕްރޮގްރާމްގެ ދަށުން ހއ. އަތޮޅުގެ ކެންޑިޑޭޓުންނާއި އެކު ބޭއްވި ޖަލްސާގައި ހއ. ތުރާކުނު ކައިރީ އޮތް ރަށް ތަރައްގީކޮށް އެރަށާއި ގުޅުވައިލުމަށް އެދުމުން، އެކަމާ ގުޅޭގޮތުން ވާހަކަ ދައްކަވަމުންނެވެ. ރައީސް ވަނީ ތުރާކުނު ކައިރީގައި އޮންނަ ރަށަކީ ލާމަރުކަޒީ ގާނޫނުގެ ދަށުން އެރަށުގެ އިހްތިސާސުން ބޭރުގައި އޮތް ރަށެއް ނަމަ އެކަން ކުރެވޭނެ މަގު ފަހިކޮށްދިނުމުގެ މަސައްކަތް ކުރައްވާނެ ކަމަށް ރައީސް ވިދާޅުވިއެވެ.

މި ޖަލްސާގައި ވާހަކަދައްކަވަމުން ރައީސް ޞާލިޙް ވަނީ ހއ. އަތޮޅުގެ ރަށްތަކުގެ ބިން ހިއްކުމުގެ މަސައްކަތްތައް މިއަހަރުގެ ތެރޭގައި ކުރިއަށް ގެންދާނެ ކަމުގެ ޔަގީންކަން ދެއްވާފައެވެ. އަދި ހއ. ރަށްރަށަށް ދިމާވެފައިވާ ނަރުދަމާގެ މަައްސަލަތަކާއި ރަށްރަށުގެ މަގުތައް ތަރައްގީކުރުމުގެ މަސައްކަތް ކުރިއަށް ގެންދަވާނެ ކަމަށް ވެސް ރައީސް ވިދާޅުވިއެވެ.

ހއ. އަތޮޅުގެ ތައުލީމީ ނިޒާމު އިތުރަށް ތަރައްގީކުރުމުގެ މަސައްކަތްތަކާއި، ޒުވާނުންގެ މަރުކަޒުތަކާއި ފުޓުބޯޅަ ދަނޑުތަކާއި ސިއްހީ ނިޒާމް އިތުރަށް ތަރައްގީކުރުމުގެ މަސައްކަތްތައް ކުރާނެ ކަމުގެ ޔަގީންކަން ރައީސް ވަނީ ދެއްވާފައެވެ. އަދި އަތޮޅުގެ ފަތުރުވެރިކަމާއި މަސްވެރިކަމުގެ ސިނާއަތް ތަރައްގީކުރުމުގެ މަސައްކަތްތައް ކުރިއަށްދާނެ ކަމަށް ރައީސް ވިދާޅުވިއެވެ.

އޭގެ އިތުރުން ރާއްޖޭގެ އެކި ކަންކޮޅުތަކުގައި ސަރުކާރުން ބޯހިޔާވަހިކަން ފޯރުކޮށްދިނުމަށް ކުރެވޭ މަސައްކަތުގެ ތެރެއިން ރަށްރަށުގައި ބިން ދޫކުރުމަށްފަހު ލުއި ލޯނުގެ ގޮތުގައި 500 މިލިއަން ރުފިޔާ ދޫކުރުމުގެ މަސައްކަތްކުރާނެ ކަމަށް ރައީސް ވިދާޅުވިއެވެ. އަދި ރަށްރަށުގައި ދޫކުރެވިފައިވާ ފްލެޓްތަކަށް ފައިސާދެއްކުމަށް ލުއިދީފައިވާއިރު، އެއުސޫލުގެ ތެރެއަށް ހއ. ދިއްދޫ ނުވަދެ އޮތް ސަބަބު ބަލައި ދިއްދޫގެ ރައްޔިތުންނަށް ވެސް މިލުއި ދިނުމުގެ މަސައްކަތްކުރައްވާނެ ކަމަށް ރައީސް ވިދާޅުވިއެވެ.

މިއަތޮޅުގެ ރަށްރަށުގެ ބަނދަރު ތަރައްގީކުރުމުގެ އިތުުރުން ރަށްރަށަށް ދިމާވެފައިވާ ކުނި މެނޭޖްކުރުމުގެ މައްސަލައަށް ހައްލު ހޯދައިދޭނެ ކަމަުގެ ޔަގީންކަން ވެސް ރައީސް ވަނީ އަރުވާފައެވެ.

ރައީސް ޞާލިހު ވަނީ ސަރުކާރުގެ އަމާޒަކީ ރާއްޖޭގެ ހުރިހާ ރަށެއްގައި ތަރައްގީގެ މަޝްރޫއުތައް ކުރިއަށް ގެންދިއުން ކަމަށް ވިދާޅުވެފައެވެ.

ފާއިތުވި ދެ އަހަރުގެ ތެރޭގައި ޕީއެސްއައިޕީގެ މަޝްރޫއުތަކަށް 416 މިލިއަން ރުފިޔާ ހަރަދުކޮށްފައިވާއިރު، އެސްއެމްއީ ޑިވެލޮޕްމެންޓް ފައިނޭސް ކޯޕަރޭޝަނުން 18 އެސްއެމްއީ އަށް 32 މިލިއަން ރުފިޔާގެ ލޯނު ދޫކޮށްފައިވާ ކަމަށް ރައީސް ވަނީ ފާހަގަކުރައްވާފައެވެ. ހިލޭ ޑިގްރީގެ ދަށުން ހއ. އަތޮޅުގެ 668 ދަރިވަރުން މިހާރު ކިޔަވަމުންދާއިރު، ކޮވިޑް-19 އާ ގުޅިގެން ދޫކުރާ އިންކަމް ސަޕޯޓް އެލަވަންސް 885 ފަރާތަކަށް ދޫކޮށްފައިވާ ކަމަށް ވަނީ ފާހަގަކުރައްވާފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ނަހްދާ އާދަމް
0%
0%
0%
0%
0%
0%
ކޮމެންޓް