ސްރީލަންކާއިން އެސްޓްރަޒެނެކާ ވެކްސިންގެ 10 މިލިއަން ޑޯޒް ގަންނަނީ

ސިރަމް އިންސްޓިޓިއުޓް އޮފް އިންޑިއާއިން އުފެއްދި ކޮވިޝީލްޑް ވެކްސިންގެ 10 މިލިއަން ޑޯޒް ގަންނަން ސްރީލަންކާއިން ނިންމާފައިވާކަމަށް އެގައުމުގެ އޮފިޝަލުން ވިދާޅުވެއްޖެއެވެ.

އެގައުމުގެ ސްޓޭޓް ފަރމަސޫޓިކަލް ކޯޕަރޭޝަނުން 10 މިލިއަން ޑޯޒް ގަތުމަށް ސިރަމް އިންސްޓިޓިއުޓް އޮފް އިންޑިއާއާއި އެއްބަސްވުމެއްގައި ސޮއި ކޮށްފައިވާއިރު މި އެއްބަސްވުމަށް އެގައުމުގެ އެޓަރނީ ޖެނެރަލްގެ ހުއްދަވެސް ލިބިފައިވާ ކަމަށް މީޑިއާ ރިޕޯޓުތައް ބުނެއެވެ.

ލަންކާގައި ސިރަމް އިންސްޓިޓިއުޓް އޮފް އިންޑިއާއިން އުފެއްދި ކޮވިޝީލްޑް ވެކްސިން ޖަހަން ފަށާފައިވާއިރު މީގެ ކުރިން އިންޑިއާއިން ވަނީ ކޮވިޝީލްޑް ވެކްސިންގެ ފަސްލައްކަ ޑޯޒް ލަންކާއަށް ފޮނުވާފައެވެ.

އެގޮތުން ލަންކާގައި އެންމެ ފުރަތަމަ ވެކްސިން ޖަހަން ފަށާފައިވަނީ 1،50،000 ފްރަންޓްލައިން މުވައްޒަފުންނާއި 1،15،000 ފުލުހުންނާއި ސިފައިންނަށް ކަމަށް ލަންކާ ސަރުކާރާ ހަވާލާދީ ނޫސްތަކުން ރިޕޯޓްކޮށްފައިވެއެވެ.

ކޮވިޝީލްޑް ވެކްސިން އުފައްދަމުންދަނީ އެސްޓްރަޒެނިކާއާއި އޮކްސްފޯޑް ގުޅިގެން ދުނިޔޭގައި ވެސް ވެކްސިން އުފައްދާ އެންމެ ބޮޑު ކުންފުނި ކަމަށްވާ އިންޑިއާގެ ސިރަމް ކުންފުނިންނެވެ.

އެ ކުންފުނިން އުފެއްދި ކޮވިޝީލްޑް ވެކްސިން އަކީ ދުނިޔޭގެ އެންމެ ބޮޑު ދިރާސާކުރާ އެއް ޔުނިވަރސިޓީ ކަމުގައިވާ އޮކްސްފޯޑް ޔުނިވަރސިޓީ އާއި ވެކްސިން އުފެއްދުމުގެ ރޭހުގައި ކުރިއަރާފައިވާ އެސްޓްރަޒެނެކާއިން އުފެއްދި ވެކްސިން (AZD1222) ގެ ފޯމިއުލާއަކީ ސިރަމް އިންސްޓިޓިއުޓުން އުފައްދާ ވެކްސިންގައި ބޭނުންކޮށްފައިވާ ފޯމިއުލާއިން ހަދާފައިވާ ވެކްސިންއެކެވެ.