އައްޑޫގައި އިތުރު އެކަކު ޕޮޒިޓިވްވެ ޖުމްލަ އަދަދު 64ށް އަރައިފި

އައްޑޫ ސިޓީން ހުކުރު ދުވަހު ކޮވިޑް-19 އަށް އިތުރު މީހަކު ޕޮޒިޓިވްވެ، ޖުމްލަ އަދަދު 64ށް އަރައިފިއެވެ.

އައްޑޫ އިމަޖެންސީ އޮޕަރޭޝަން ސެންޓަރުން އާންމުކޮށްފައިވާ މައުލޫމާތުން ދައްކާގޮތުން، މިހާތަނަށް އައްޑޫއިން ކޮވިޑް-19ށް ޕޮޒިޓިވްވެފައިވަނީ 64 މީހުންނެވެ. އަދި އެކްޓިވް ކޭސްތަކުގެ އަދަދަކީ ވެސް 64 ކަމަށް އައްޑޫ އިމަޖެންސީ އޮޕަރޭޝަން ސެންޓަރުން ބުނެއެވެ.

އެ ސެންޓަރުން އިތުރަށް ބުނެފައިވާގޮތުގައި، މިހާތަނަށް އައްޑޫގައި 214 އިމާރާތެއް ކަރަންޓީނުގެ ހާލަތަށް ގެނެސްފައިވެއެވެ. އަދި އެ ސިޓީގައި ޕޮޒިޓިވްވި މީހުންގެ ޑައިރެކްޓް ކޮންޓެކްޓުންގެ ގޮތުގައި 345 މީހަކު ދެނެގަނެވިފައިވާ ކަމަށް ވެސް އައްޑޫ އިމަޖެންސީ އޮޕަރޭޝަން ސެންޓަރުން ވަނީ ހާމަކޮށްފަ އެވެ.

އައްޑޫ ސިޓީގައި ކޮވިޑް-19ށް ޕޮޒިޓިވްވެފައިވާ ކޭސްތަކަށް ބަލާއިރު، ހުޅުދޫ މީދޫއިން 26 މީހަކު ޕޮޒިޓިވްވެފައިވެއެވެ. އަދި ހިތަދޫއިން 20 މީހަކު ޕޮޒިޓިވެފައިވާއިރު، ފޭދޫއިން 14 އަދި މަރަދޫފޭދޫއިން ހަތަރު މީހަކު ޕޮޒިޓިވްވެފައިވެއެވެ.

އައްޑޫ އިމަޖެންސީ އޮޕަރޭޝަން ސެންޓަރުން ބުނެފައިވާގޮތުގައި، ދުވާލެއްގެ މައްޗަށް އެވްރެޖްކޮށް 157 ސާމްޕަލް ނަގަމުންދެއެވެ. އަދި ކޮވިޑް-19ގެ އެކްޓިވް ކޭސްގެ ގޮތުގައި 64 މީހަކަށް ފަރުވާ ދެމުންދާއިރު، ހޮސްޕިޓަލުގައި ފަރުވާ ދެމުންދަނީ އެންމެ މީހަކަށް ކަމަށްވެސް އެ ސެންޓަރުން ބުނެއެވެ.

އައްޑޫ ސިޓީން ދެ ކްލަސްޓަރއެއް ފެނިފައިވެއެވެ. އެއީ ޕްރޮޖެކްޓް ސައިޓަކުން ފެނުނު ކްލަސްޓަރއަކާއި، އޭވިއޭޝަން ކްލަސްޓަރއެކެވެ. ޕްރޮޖެކްޓް ސައިޓް ކްލަސްޓަރއާއި ގުޅިގެން ހުޅުދޫމީދޫން ނެގި ހުރިހާ ސާމްޕަލެއް ވަނީ ނެގެޓިވްވެފައެވެ. އެކްލަސްޓަރ ކޮންޓެއިންވެފައިވީ ނަމަވެސް އޭވިއޭޝަން ކްލަސްޓަރ އޮތީ އެކްޓިވްކޮށެވެ.