ޓެރަރިސްޓެއް ކަމަށް ބުނާ އަމީން، ޖަލުން ގޭ ބަންދަށް ބަދަލުކުރި މައްސަލައިގެ އަޑުއެހުމެއް ތާވަލްކޮށްފި

ޓެރަރިސްޓް ޖަމާއަތްތަކަށް މީހުން ރެކްރޫޓް ކުރާކަމުގެ ތުހުމަތުގައި ޝަރީއަތް ނިމެންދެން، ޏ. ފުވައްމުލައް، މާދަޑު، ކަރިއްޔާވިލާ، މުހައްމަދު އަމީން، ޖަލު ބަންދަށް ކުރިއަމުރު މުރާޖައާކޮށް، އޭނާ ގޭބަންދަށް ބަދަލުކުރަން ނިންމި އަމުރުގެ އިސްތިއުނާފް އަޑުއެހުން ހައިކޯޓުގައި ތާވަލްކޮށްފިއެވެ.

އިސްލާމިކް ސްޓޭޓް (އައިއެސް) ޖަމާއަތުގެ ރާއްޖޭގެ ލީޑަރު ކަމަށް ބުނާ އަމީން ޝަރީއަތް ނިމެންދެން ބަންދުގައި ބަހައްޓަން ކުރިން ކޮށްފައިވާ އަމުރު މީގެކުރިން ވެސް އެތައް ފަހަރަކު މުރާޖައާކޮށްފައިވެއެވެ. ޖިނާއީ އިޖުރާއަތުގެ ގާނޫނުގެ ބުނާގޮތުން، ޝަރީޢަތް ނިމެންދެން މީހަކު ބަންދުގައި ބަހައްޓަން ފަނޑިޔާރު ނިންމައިފިނަމަ، އެ ނިންމުން، ކޮންމެ 30 ދުވަހަކުން މުރާޖަޢާކުރަންޖެހެއެވެ. އަދި، އޭނާ އިތުރަށް ބަންދުގައި ބަހައްޓަންޖެހޭ ސަބަބެއް އޮތްތޯ ބެލުމަށްޓަކައި، އޭނާ ހައްޔަރުކޮށްފައިވާ ފަރާތުން، އޭނާ ކޯޓަށް ހާޒިރުކުރަންޖެހެއެވެ.

މި ފެބްރުއަރީ މަހުގެ ތިން ވަނަ ދުވަހު ކްރިމިނަލް ކޯޓުގައި ބޭއްވި އަޑުއެހުމުގައި ވެސް، އަމީނުގެ ބަންދުގެ އަމުރު މުރާޖައާކޮށްފައިވެއެވެ. އެ އަޑުއެހުމުގައި އަމީން ގޭބަންދަށް ބަދަލު ކުރުމަށް އެ މައްސަލަ ބެއްލެވި ކްރިމިނަލް ކޯޓުގެ އިސްގާޒީ އަހުމަދު ޝަކީލު ނިންމަވާފައިވެއެވެ.

ބަންދާ މެދު ގޮތެއް ނިންމަމުން، ގާޒީ ފާހަގަ ކުރެއްވީ، އަމީނަށް ބޭސްފަރުވާ ނުލިބޭ ވާހަކަ އޭނާ ބަންދު ކުރިތާ މިވީ 14 މަސް ދުވަހުގެ ތެރޭގައި އޭނާ ދައްކަމުން ގޮސްފައިވާ ކަމެވެ. ނަމަވެސް، މިއަދާ ހަމައަށް އައިއިރު ވެސް އެކަށީގެންވާ ގޮތެއްގައި އޭނާގެ ބޭސްފަރުވާގެ ކަންކަން ކުރެވިފައިނުވާކަމަށް ގަބޫލުކުރައްވާ ކަމަށެވެ. އަދި އަމީނަށް ގޮޅިން ނުކުމެ ހިނގާ ކަސްރަތުކޮށް އުޅުމުގެ ހައްގުވެސް އެންމެ އެކަށީގެންވާ ވަރަށް ދީފައި ނުވާކަން ގާޒީ ފާހަގަ ކުރެއްވިއެވެެ. އެހެންކަމުން އެ ދެ އަސާސީ ހައްގު އެންމެ ފުރިހަމައަށް އޭނާއަށް ލިބިފައި އޮތް ކަމަށް ގަބޫލު ނުކުރެވޭތީ ޝަރުތުތަކާއެކު އޭނާ ގޭބަންދަށް ބަދަލު ކުރަން ނިންމީ ކަމަށް ގާޒީ ވިދާޅުވި އެވެ.

އެދުވަހުގެ އަޑުއެހުމަށް މޯލްޑިވްސް ކަރެކްޝަނަލް ސަރވިސްގެ އިސް ބޭފުޅުންވެސް ހާޒިރު ކުރެވުނުއެވެ. ކަރެކްޝަނުންނާއި ދައުލަތުން ބުނެފައިވަނީ އަމީންގެ ބޭސްފަރުވާގެ ކަންކަން އެކަށީގެންވާ ގޮތެއްގައި ކުރިއަށް ގެންދެވޭކަމަށް ގަބޫލުކުރާ ކަމަށެވެ.

ޝަރީއަތް ނިމެންދެން އަމީން ޖަލު ބަންދުގައި ބަހައްޓަން ކުރި އަމުރު، މުރާޖައާކޮށް، އޭނާ ގޭ ބަންދަށް ބަދަލުކުރުމުން ޕްރޮސެކިއުޓަރ ޖެނެރަލްގެ އޮފީހުން ވަނީ ގާޒީގެ އެނިންމުން ހައިކޯޓުގައި އިސްތިއުނާފްކޮށްފައެވެ. ހައިކޯޓުގައި އާދިއްތަ ދުވަހަށް ތަވަލްކޮށްފައިވާ އެއަޑުއެހުމަކީ މި މައްސަލާގައި ބޭއްވޭ ފުރަތަމަ އަޑުއެހުމެވެ.

އަމީން އަކީ އެމެރިކާއިން ޓެރަރިސްޓުންގެ ގޮތުގައި ކަނޑައަޅާ މީހުންގެ ލިސްޓުގައި ހިމެނުނު ފުރަތަމަ ދިވެއްސެވެ. އަމީނަކީ ޓެރަރިސްޓެއް ކަމަށް ކަނޑައަޅައި، އެމެރިކާގެ ޑިޕާޓްމަންޓް އޮފް ދަ ޓްރެޒަރީޒް އޮފީސް އޮފް ފޮރިން އެފެއާޒް ކޮންޓްރޯލް (އޯއެފްއޭސީ) އިން އޭނާ އަށް މާލީ ދަތިކުރުމުގެ ފިޔަވަޅު އެޅީ މިދިއަ އަހަރުގެ އޯގަސްޓް މަހުގެ ތެރޭގައެވެ.

ޓެރަރިޒަމްގެ ގާނޫނަށް އިސްލާހު ގެނައިފަހުން ފުލުހުން ދޭތެރެ ދޭތެރެއިން އޮޕްރޭޝަންތައް ބާއްވަމުންދާއިރު އަމީން ހައްޔަރުކޮށްފައިވަނީ ރާއްޖެއިން ބޭރުގައި ހިނގާ ހަނގުރާމަތަކަށް ދިވެހިން ފޮނުވާ ހަނގުރާމަވެރި ޖަމާއަތްތަކުގެ މީހުން ރެކްރޫޓް ކުރުމުގައި ހަރަކާތްތެރިވާ ކަމުގެ ތުހުމަތުގައި މިދިއަ އަހަރުގެ އޮކްޓޯބަރު މަހުގެ 24 ވަނަ ދުވަހުގެ ރޭ އޭނާ ދިރިއުޅޭ މ. ވޯލްނަޓް ގެއިންނެވެ.

ސެޕްޓެމްބަރު 11، 2001 ގައި އެމެރިކާއަށް ދިން ޓެރަރިސްޓް ހަމަލާއަށް ފަހު ޓެރަރިސްޓުންގެ ލިސްޓެއް ހަދައި، އެ ލިސްޓުގައި ހިމަނާފައިވާ އަމީނަކީ ސީރިއާ އާއި އަފްޣާނިސްތާނުގައި ވަރަށް އިސް މީހެއްގެ ގޮތުގައި އައިއެސްއަށް މަސައްކަތްކޮށްދޭ މީހެއް ކަމަށް ބުނެފައިވެއެވެ. އަދި ކުރިން ސީރިއާއަށް ހަނގުރާމަވެރިން ފޮނުވުމަށް ފަހު މިހާރު ފޮނުވަނީ އަފްޣާނިސްތާނަށް ކަމަށް ވެސް ބުނެފައިވެއެވެ. އަދި މާލީ ގޮތުންނާއި އެހެނިހެން ގޮތްގޮތުން އެ ޖަމާއަތްތަކަށް އަމީން އެހީތެރިވާކަމަށް އެމެރިކާއިން ބުނެފައިވެއެވެ.