ޓެކްނިކަލް އެންޑް ވޮކޭޝަނަލް އެޑިއުކޭޝަން އެންޑް ޓްރޭނިންގް އޮތޯރިޓީ (ޓިވެޓް އޮތޯރިޓީ) އާއި ސްޓޭޓް ޓްރޭޑިންގް އޯގަނައިޒޭޝަން (އެސްޓީއޯ) އާއެކު ނެޝަނަލް އެޕްރެންޓިސްޝިޕް ޕްރޮގްރާމްގެ ދަށުން އެސް.ޓީ.އޯ އެޕްރެންޓިސްޝިޕް ޕްރޮގްރާމް އިފްތިތާހްކުރުމަށްޓަކައި ފަހުމުނާމާގައި ސޮއިކޮށްފިއެވެ.

މި އެއްބަސްވުމުގައި ޓިވެޓް އޮތޯރިޓީގެ ފަރާތުން ސޮއިކުރައްވާފައިވަނީ ޓިވެޓް އޮތޯރިޓީގެ ޑިރެކްޓަރ އާމިނަތު އާސްރާއެވެ. އަދި އެސްޓީއޯގެ ފަރާތުން މި އެއްބަސްވުމުގައި ސޮއިކުރައްވާފައިވަނީ އެ ކުންފުނީގެ ޖެނެރަލް މެނޭޖަރ މަރިޔަމް ނުޒްލާއެވެ.

އެސްޓީއޯ އެޕްރެންޓިސްޝިޕް ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ "ފުލްޓައިމް އެންޕްލޯޔާ ބޭސްޑް ޓްރެނިންގް" (މަސައްކަތު މާހައުލުގައިދެވޭ ތަމްރީނު) ޕްރޮގްރާމެއްގެ ގޮތުގައެވެ. މި ޕްރޮގްރާމްގެ ބައިވެރިންނަށް ވަޒީފާގެ މާހައުލުގައި އުޅެމުން މަސައްކަތުގެ ހުނަރު ދަސްކުރުމުގެ ފުރުސަތު ލިބިގެންދާނެއެވެ.

އަދި މީގެ އިތުރުން ވަޒީފާގެ ދާއިރާގެ މަސައްކަތާ ގުޅޭގޮތުން އިތުރަށް އުނގެނުމުގެ ފުރުސަތު ލިބިގެންދާނެއެވެ. މި ޕްރޮގްރާމު ހިންގުމަށް ހަމަޖެހިފައިވަނީ ޓިވެޓް އޮތޯރިތީގެ ނެޝަނަލް ކޮންޕީޓަންސީ ސްޓޭންޑަރޑްގެ މިންގަނޑުތަކާއި އަދި ނެޝަނަލް އެޕްރެންޓިސްޝިޕް ޕްރޮގްރާމްގެ މިންގަނޑުތަކާއި އެއްގޮތަށެވެ.

މިއަހަރު އެސްޓީއޯ އެޕްރެންޓިސްޝިޕް ޕްރޮގްރާމްގައި 50 ބައިވެރިނަށް 4 ދާއިރާއަކުން ތަމްރީން ދެވިގެންދާނެއެވެ. އެގޮތުން އޮޓޯމޯޓިވް މެއިންޓަނަންސްގެ ދާއިރާއިން 10 ބައިވެރިންނާއި ކޮންޕިއުޓަރ ހާރޑްވެއަރ އެންޑް ނެޓްވޯކިންގްގެ ދާއިރާއިން 2 ބައިވެރިންނަށް ތަމްރީނު ދެވޭނެއެވެ. އަދި އިލެކްޓްރިޝަންގެ ދާއިރާއިން 2 ބައިވެރިންނާއި ރީޓެއިލް ސަރވިސަސް ގެ ދާއިރާއިން 36 ބައިވެރިންނަށް ތަމްރީނު ދެވިގެން ދާނެއެވެ.

މި އެޕްރެންޓިސްޝިޕް ޕްރޮގްރާމުން ފާސްވާ ބައިވެރިންނަށް ލެވެލް 3 ގެ ނެޝަނަލް ސެޓްފިކެޓެއް ލިބިގެންދާނެއެވެ. އެސްޓީއޯއިން ބުނީމި ޕްރޮގްރާމްގެ މަޤްޞަދަކީ ވަޒީފާގެ ބާޒާރަށް ދިވެހީން ބިނާކޮށް ވަޒީފާ އަދާކުރާ ފެންވަރު ހުރި ދިވެހީން އިތުރުކުރުން ކަމަށެވެ.