ރާއްޖެ އަންނަ ފަތުރުވެރިންގެ އަދަދު އިތުރުވެ، އެއްދުވަހަށް 4850ށް ވުރެ ގިނަ ފަތުރުވެރިން

މިއަހަރުގެ މިހާތަނަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން ފެބްރުއަރީ 14 ވަނަ ދުވަހު އައިސްފައިވާއިރު، އެދުވަހު ރާއްޖެއަށް 4856 ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީން ބުނެއެވެ.

މީގެ ކުރިން ރާއްޖެއަށް އެއްދުވަހެއްގެ ތެރޭ އެންމެ ގިނަ އަދަދެއްގެ ފަތުރުވެރިން އައިސްފައިވާ ދުވަހެއްގެ ގޮތުގައި ޓޫރިޒަމް މިނިސްޓްރީން ފާހަގަކޮށްފައި ވަނީ ފެބްރުއަރީ 12 ވަނަ ދުވަހެވެ. އެދުވަހު 4809 ފަތުރުވެރިން ވަނީ ރާއްޖެ އައިސްފައެވެ.

މިއަހަރުގެ ފެބްރުއަރީ މަހުގެ 14 ވަނަ ދުވަހުގެ ނިޔަލަށް 138،912 ފަތުރުވެރިން ރާއްޖެ އައިސްފައިވާއިރު، އޭގެ ތެރެއިން 92،103 ފަތުރުވެރިން ރާއްޖެ އައިސްފައި ވަނީ ޖެނުއަރީ މަހުއެވެ. އަދި ފެބްރުއަރީ މަހުގެ ފުރަތަމަ 14 ދުވަހު ރާއްޖެ އައިސްފައި ވަނީ 46،809 ފަތުރުވެރިންނެވެ.

ރާއްޖެއަށް ޒިޔާރަތްކުރާ ފަތުރުވެރިންގެ 22.2 އިންސައްތަ ރަޝިއާއިން ހިއްސާކުރާއިރު، އެގައުމުން 30،499 ފަތުރުވެރިން ވަނީ ރާއްޖެ އައިސްފައެވެ. އަދި 21.6 އިންސައްތަ ހިއްސާކުރާ އަވައްޓެރި އިންޑިއާއިން ރާއްޖެ އައިސްފައި ވަނީ 30،295 ފަތުރުވެރިންނެވެ.

މިހާރު ރާއްޖެއަށް 3087 ފަތުރުވެރިން ދުވާލެއްގެ މައްޗަށް އެވްރެޖްކޮށް އަންނަ އިރު، ފަތުރުވެރިން ރާއްޖޭގައި އެވްރެޖްކޮށް ހޭދަކުރަނީ ނުވަ ދުވަސް ކަމަށް ޓޫރިޒަމް މިނިސްޓްރީން ބުނެއެވެ.