ޑިފެންސްގެ އައު އިމާރާތާ ގުޅިގެން އެސް.ޖޭ ކޮންސްޓްރަކްޝަނުން ހުށަހެޅި މައްސަލައިގައި، އަލުން ބިޑް އެވޯޑުކުރުމަށް އަމުރުކުރާނެ ތަނެއް ނެތް: ސިވިލް ކޯޓު
15 ފެބުރުއަރީ 2021 | ހޯމަ 06:03ބިޑް އެވޯޑުކުރުމުގެ މަރުޙަލާގައި އުފެދިފައިވާ ކަމަކަށް ޙައްލު ހޯދަން އެދިފައެއް ނެތް
ސިވިލް ކޯޓު،
ޑިފެންސް މިނިސްޓްރީގެ އައު އިމާރާތާ ގުޅިގެން އެސް.ޖޭ ކޮންސްޓްރަކްޝަން ޕްރައިވެޓް ލިމިޓެޑުން ހުށަހެޅި ބީލަން ބާތިލްކޮށްފައިވަނީ ޤާނޫނާ ޚިލާފަށްކަމަށް ބުނެ ހުށަހަޅާފައިވާ މައްސަލައިގައި، އަލުން ބިޑް އިވެލުއޭޓްކޮށް ބިޑް އެވޯޑުކުރުމަށް އަމުރުކުރާނެ ތަނެއް ނެތްކަމަށް ސިވިލް ކޯޓުން ނިންމަވައިފިއެވެ.
މައްސަލަ ހުށަހެޅި ފަރާތުގެ މައިގަނޑު ނުކުތާތަކުގެ ތެރޭގައި ފާހަގަކޮށްފައިވަނީ ބިޑް ޑޮކިއުމަންޓްގައި ނެތް އަދި ބީލަންތައް ހުޅުވުނު ތާރީޚަށްފަހު ފާސްކޮށްފައިވާ އުސޫލަކަށް ރިއާޔަތްކޮށް ދައުވާކުރާ ފަރާތުގެ ބީލަން ބާތިލްކޮށްފައިވަނީ ޤާނޫނާ ޚިލާފަށްކަމަށް ކަނޑައަޅައިދީ، އެ ނިންމުން ބާތިލްކުރުމަށާއި، މިނިސްޓްރީ އޮފް ފިނޭންސްގެ އިޢުލާނާގުޅިގެން ހުށަހެޅިފައިވާ ބީލަންތައް އިވެލުއޭޓްކުރަންވާނީ ހަމައެކަނި ބިޑް ޑޮކިއުމަންޓްގައިވާ ކަންކަމުގެ މައްޗަށްކަމަށެވެ.
މީގެ އިތުރުން "ނޭޝަނަލް ޓެންޑަރ ބޯޑު މެދުވެރިކޮށް އިމާރާތްކުރުމުގެ މަސައްކަތްތައް އެވޯޑުކުރުމުގައި އަމަލުކުރާނެ ގޮތުގެ އުސޫލު" ގެ ދަށުން ބީލަންތައް އިވެލުއޭޓްކޮށްފައިވަނީ ދައުލަތުގެ މާލިއްޔަތުގެ ގަވާއިދާއި މާޒީއަށް ގާނޫނު ނުހިނގާނެކަމަށް ބަޔާންކުރާ ހަމައާ ޚިލާފަށްކަމަށާއި، ދައުވާކުރާ ފަރާތުން އެދިފައިވަނީ ދައުވާކުރާ ފަރާތުގެ ބީލަން ވެސް ހިމަނައިގެން، ބީލަން ހުށަހެޅުމަށް ދިން ދައުވަތާއި ބިޑް ޑޮކިއުމަންޓްގައިވާ ކަންކަމަށް ރިއާޔަތްކޮށް، ހުށަހެޅިފައިވާ އެންމެހައި ބީލަންތައް އިވެލުއޭޓްކުރުމަށާއި، ބިޑް އެވޯޑުކުރުމަށް އަމުރުކޮށް ދެއްވުމަށް ކަމަށެވެ.
ދައުލަތުން ފާހަގަކުރި މައިގަނޑު ނުކުތާތަކުގެ ތެރޭގައި ހިމެނެނީ ބިޑް އިވެލުއޭޓްކުރުމާއި އެވޯޑްކުރުމަކީ ދެ މަރުހަލާއެއްކަމާއި، އެވޯޑުކުރުމުގެ ކުރިން ބަލަންޖެހޭ ކަންކަން 1 އެޕްރީލް 2020 ގެ އުސޫލުގައި ބަޔާންކޮށްފައިވާކަމާއި ނޭޝަނަލް ޓެންޑަރ ބޯޑުން ބިޑް އެވޯޑުކުރެވޭނީ ސަރުކާރުގެ ސިޔާސަތާއި އޭރު އަމަލުކުރަން ފެށި އުޞޫލާ އެއްގޮތަށްކަމާއި، އެވޯޑުކުރުމުގައި އެ ފަރާތުގެ ބީލަން ބައިވެރިކޮށްފައިނުވަނީ 1 އެޕްރީލް 2020 ގެ އުސޫލުގެ 5 ވަނަ މާއްދާގެ ދަށުން، ބީލަން ހުށަހެޅި ދުވަހާ ހަމައަށް، އެ ފަރާތަށް ލިބުނު ދައުލަތުގެ މަޝްރޫއުތަކުގެ އަދަދު 8 ށް ވުރެ އިތުރުވެ، މަސައްކަތުގެ އަގު 300 މިލިއަން ރުފިޔާއަށްވުރެ އިތުރުވާތީ ކަމަށެވެ.
މީގެ އިތުރުން ދައުލަތުން ބިޑް އިވެލުއޭޝަން ކްރައިޓީރިއާ ބަދަލުނުކުރާ ކަމާއި، ބިޑް އިވެލުއޭޓް ކޮށް، ބިޑް އެވޯޑްކުރުމުގެ މަރުޙަލާގައި އުސޫލަށް ރިއާޔަތްކޮށް، ބިޑް އެވޯޑުކުރުމުގެ ޝަރުތު ހަމަނުވާކަމަށް ކަނޑައެޅުމަކީ ބިޑް އިވެލުއޭޓްކުރުމުގެ ކްރައިޓީރިއާ ބަދަލުކުރުން ނޫންކަން ފާހަގަކޮށްފައިވެއެވެ.
މިމައްސަލައާ ގުޅިގެން ސިވިލް ކޯޓުން ނިންމާފައިވަނީ ދައުވާގައި ބިޑް އެވޯޑުކުރުމުގެ މަރުޙަލާގައި އުފެދިފައިވާ ކަމަކަށް ޙައްލު ހޯދަން އެދިފައި ނެތްކަމާއި، މި މައްސަލާގައި ޝަރީއަތަށް އައުމުގެ ކުރިން މަރުހަލާތަކެއް ފުރިހަމަ ކުރަންޖެހޭ އިރު، އެ މަރުހަލާތަކުގައި ބިޑު އެވޯޑުކުރުމާ ގުޅޭގޮތުން ޚިލާފެއް އޮވެގެން ކަމެއް ހުށަހަޅާފައި ނެތް ކަމަށެވެ.
ދައުވާފޯމު ބިނާކޮށްފައިވަނީ ބިޑު އިވެލުއޭޓްކުރުމުގައި ހައްލު ހޯދުމުގެ މައްޗަށްކަމާއި، ވުމާއެކު ބިޑު އެވޯޑުކުރުމާގުޅޭ ނުކުތާއަކީ މި މައްސަލައިގައި އެކަމާމެދު ނިންމުމެއް ނިންމަންޖެހޭ ނުކުތާއެއްކަމުގައި ނުދެކޭ ކަމަށް ސިވިލް ކޯޓުން ބުނެއެވެ.
ދައުވާކުރާ ފަރާތުން އެދިފައިވާ ފަދައިން ދައުވާކުރާ ފަރާތުގެ ބީލަން ހިމަނައިގެން، ބީލަންތައް އިވެލުއޭޓްކޮށް ބިޑް އެވޯޑުކުރުމަށް އަންގާ އަމުރުކުރާނެ ތަނެއް ނެތްކަމަށް ސިވިލް ކޯޓުގެ ހުކުމްގައި ބުނެފައިވެއެވެ.
