ސިޔާސީ ޕާޓީތަކަށްވެސް ފިޔަވަޅު އަޅަން ޖެހޭ، ފުލުހުން އެކަން ތަންފީޒު ކުރާނެކަމަށް އުންމީދު ކުރަން – ނަޒްލާ
ފުލުހުން ވަނީ މީގެ ކުރިން ވެސް ވަކި ބަޔަކަށް ނުބަލާ ފިޔަވަޅުތައް ތަންފީޒު ކޮށްފައި
ހެލްތު އިމަރޖެންސީ އޮޕަރޭޝަން ސެންޓަރުގެ ތަރުޖަމާނު ޑރ. ނަޒްލާ ރަފީގު
ކޮވިޑް-19އާއިއެކު ހެދިފައިހުރި ރައްކާތެރި ކަމުގެ ފިޔަވަޅުތަކާ ހިލާފުވެއްޖެނަމަ ސިޔާސީ ޕާޓީތަކާއިމެދުވެސް ފިޔަވަޅު އަޅަން ޖެހޭނެ ކަމަށާއި، ފުލުހުން އެ ފިޔަވަޅުތައް ތަންފީޒުކުރާނެކަމަށް އުންމީދު ކުރައްވާކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ރާއްޖެ ޓީވީއަށް ދެއްވި ހާއްސަ އިންޓަރވިއުއެއްގައި ޑރ. ނަޒްލާ ވިދާޅުވީ ރައްކާތެރިކަމުގެ ފިޔަވަޅުތަކަކީ ވަކި ބަޔަކަށް ހެދިފައިހުރި ފިޔަވަޅުތަކެއް ނޫން ކަމަށާއި، އެއީ މުޅި މުޖުތަމައަށް ހެދިފައި ހުރި ފިޔަވަޅުތަކެއް ކަމަށެވެ. އެހެން ކަމުން ފިޔަވަޅުތައް ތަންފީޒު ކުރާއިރު ވަކި ބަޔަކަށް ބެލުމެއް ނެތި ހުރިހާ ފަރާތްތަކަށް އެއް ހަމައިން ފިޔަވަޅުތައް ތަންފީޒު ކުރައްވާނެކަމަށް އުންމީދު ކުރައްވާކަމަށް ނަޒްލާ ވިދާޅުވިއެވެ.
ނަޒްލާ ވިދާޅުވީ ފުލުހުން މީގެ ކުރިން ވެސް ވަކި ބަޔަކަށް ނުބަލާ ފިޔަވަޅުތައް ތަންފީޒު ކުރައްވާފައި ކަމަށާއި، އެގޮތުން އެޗްޕީއޭގެ ގައިޑްލައިންތަކާއި ހިލާފުވެގެން ސިޔާސީ ފަރާތްތަކާއި މެދުވެސް ފިޔަވަޅު އަޅާފައިވާ ކަމަށެވެ.
ނަޒްލާ އިތުރަށް ވިދާޅުވީ ކޮވިޑަކީ ވަކި ފިކުރެއްގެ ބަޔަކަށް ޖެހޭ ވައިރަސްއެއް ނޫން ކަމަށާއި، އެއީ ކޮންމެ މީހަކަށްވެސް ޖެހިދާނެ ވައިރަސްއެއް ކަމަށެވެ. އެގޮތުން މާސްކު ނާޅާ އެއްވުންތައް ބާއްވުންފަދަ ކަންކަން ކުރުމަށްފަހު ގެއަށްދާއިރު، ތިމާގެ އާއިލާގެ ހައިރިސްކު މީހުން ބައްޔަށް ހުށަހެޅިދާނެކަން ހަނދާން ކުރަން ޖެހޭނެ ކަމަށް ނަޒްލާ ވިދާޅުވިއެވެ.
ނަޒްލާ މިހެން ވިދާޅުވިއިރު، އިދިކޮޅު ފަރާތްތަކުން އަންނަނީ މާލެއާއި ރާއްޖޭގެ އެކި ކަންކޮޅުތަކުގައި ސިލްސިލާ މުޒާހަރާތަކެއް ބާއްވަމުންނެވެ. އަދި މި މުޒާހަރާތަކުގައި އެޗްޕީއޭގެ ގައިޑްލައިންތަކާއި ހިލާފަށް އަމަލުތައް ބަހައްޓާކަން ފާހަގަ ކޮށްލެވެއެވެ.
ރާއްޖެއިން މިހާރު ފެންނަމުންދާ ކޮވިޑް ކޭސްތައް އުޅެނީ 100ން މަތީގައެވެ. އަދި ކޮންމެ ދުވަހަކުވެސް މާލެ ސަރަޙައްދުން އެތައް ބަޔަކު ޕޮޒިޓިވްވަމުންދާއިރު، އަތޮޅު ތެރެއަށްވެސް މިވަނީ ބަލި ފެތުރިފައެވެ. އަދި މާލެ ސަރަޙައްދުގެ އިތުރުން، އައްޑޫ ސިޓީއާއި ފުވައްމުލަކު ސިޓީގައިވެސް މިވަނީ ކާފިއު ހިންގަން ފަށާފައެވެ.
