ސްރީލަންކާގައި ކޮވިޑްގެ ކޭސްތައް އިތުރުވީ ދަތުރުފަތުރުކުރަން ހުޅުވާލުމުން ކަމަށް ކަމާބެހޭ ފަރާތްތަކުން ބުނެފި

ސްރީލަންކާގައި ކޮވިޑްގެ ކޭސްތައް އިތުރުވީ ދަތުރުފަތުރުކުރުން ހުޅުވާލުމުން ކަމަށް އެޤައުމުގެ ކަމާބެހޭ ފަރާތްތަކުން ބުނެފިއެވެ.

ސްރީލަންކާގައި ފާއިތުވެދިޔަ ތިން ދުވަހު ވެސް ކޮވިޑަށް ޕޮޒިޓިވްވާ މީހުންގެ އަދަދު ދުވާލެއްގެ މައްޗަށް 900އިން މަތީގައި އުޅޭއިރު ކަންބޮޑުވާ މިންވަރަކަށް ޕީސީއާރް ޓެސްޓް ކުރާ މީހުންގެ އަދަދު ދަށްވެފައިވާ ކަމަށް ބޭރުގެ މީޑިއާތަކުން ރިޕޯޓްކޮށްފައިވެއެވެ.

އިކޮނޮމީނެކްސްޓްއަށް ދެއްވި އިންޓަވިއުއެއްގައި ސްރީލަންކާގެ ހެލްތް ސަރވިސަސްގެ ޑެޕިއުޓީ ޑިރެކްޓަރ ޖެނެރަލް ޑރ. ހެމަންތާ ހެރަތް ވިދާޅުވީ ޑިސެމްބަރު މަހުގެ ޗުއްޓީ އާއި އައު އަހަރުގެ ފުރަތަމަ މަހު ދަތުރުކުރި މީހުންގެ އަދަދު އިތުރުވެފައިވާ ކަމަށެވެ. އަދި މިއީ ކޭސްތައް އިތުރުވާން ދިމާވި އެއް ސަބަބު ކަމަށް އޭނާ ވިދާޅުވިއެވެ.

ޑރ. ހެމަންތާ ވިދާޅުވީ ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށް އެ ޤައުމުގެ ރައްޔިތުންނަށް އިލްތިމާސް ކުރެއްވި ކަމަށާއި އެހެންނަމަވެސް އެ އިލްތިމާސްތަކަށް ރައްޔިތުން ބީރުކަންފަތެެއް ދިނުމުގެ ސަބަބުން މިހާރު ވައިރަސް ފެތުރޭ މިންވަރު އިތުރުވެފައިވާ ކަމަށެވެ.

ޑރ. ހެމަންތާ އިތުރަށް ވިދާޅުވީ ޕީސީއާރް ޓެސްޓްގެ ކަންތައްތައް ވެސް އެންމެ އެކަށީގެންވާ މިންވަރަށް ކުރިއަށް ނުދާ ކަމަށާއި ބައެއް ޓެސްޓްތަކުގެ ނަތީޖާ ނުލިބިވާ ކަމަށެވެ.

ބުރާސްފަތި ދުވަހު ލަންކާގައި 963 މީހަކު ކޮވިޑަށް ޕޮޒިޓިވްވެފައިވާއިރު މިދިޔަ އަހަރުގެ މާރޗް މަހުން ފެށިގެން ޖުމްލަ 72،174 މީހަކު ވަނީ އެ ޤައުމުން ވައިރަސްއަށް ޕޮޒިޓިވްވެފައެވެ.

ސްރީލަންކާގައި ކޭސްތައް އިތުރުވަމުން އަންނައިރު ވެކްސިން ދިނުމުގެ ޕްރޮގްރާމް ހަލުވިކަމާއެކު ކުރިއަށްދެއެވެ. އެގޮތުން ފްރަންޓް ލައިންގައި މަސައްކަތް ކުރާ 7،500 ސިފައިންނަށް ވެކްސިން ވަނީ ދީފައެވެ.

ލަންކާގައި އިންޑިއާގެ ސިރަމް އިންސްޓިޓިއުޓް އޮފް އިންޑިއާއިން އުފެއްދި ކޮވިޝީލްޑް ވެކްސިން ދެމުން ދާއިރު އިންޑިއާއިން ވަނީ ކޮވިޝީލްޑް ވެކްސިންގެ ފަސްލައްކަ ޑޯޒް ލަންކާއަށް ފޮނުވާފައެވެ.

ކޮވިޝީލްޑް ވެކްސިން އުފައްދާފައި ވަނީ ދުނިޔޭގައި ވެސް ވެކްސިން އުފައްދާ އެންމެ ބޮޑު ކުންފުނި ކަމަށްވާ އިންޑިއާގެ ސިރަމް ކުންފުނިންނެވެ. އެ ކުންފުނިން އުފެއްދި ކޮވިޝީލްޑް ވެކްސިން އަކީ ދުނިޔޭގެ އެންމެ ބޮޑު ދިރާސާކުރާ އެއް ޔުނިވަރސިޓީ ކަމުގައިވާ އޮކްސްފޯޑް ޔުނިވަރސިޓީ އާއި ވެކްސިން އުފެއްދުމުގެ ރޭހުގައި ކުރިއަރާފައިވާ އެސްޓްރަޒެނެކާއިން އުފެއްދި ވެކްސިން (AZD1222) ގެ ފޯމިއުލާއަކީ ސިރަމް އިންސްޓިޓިއުޓުން އުފައްދާ ވެކްސިންގައި ބޭނުންކޮށްފައިވާ ފޯމިއުލާއިން ހަދާފައިވާ ވެކްސިންއެކެވެ.