ކޮވިޑް-19: ސްރީލަންކާގައި ވައިރަސް ޖެހުނު މީހުންގެ އަދަދު 53 އަށް، އޮބްޒަރވޭޝަންގައި 243 މީހުން
19 މާރިޗު 2020 | ބުރާސްފަތި 09:01ސްރީލަންކާއިންވަނީ ހޯމަ ދުވަހުން ފެށިގެން ޗުއްޓީ ދުވަސްތަކެއްގެ ގޮތުގައި ހަމަޖައްސާފައި
ސްރީލަންކާގައި ވައިރަސް ފެތުރުން ކޮންޓްރޯލްކުރުމަށް އަންނަނީ ފިޔަވަޅު އަޅަމުން
ކޮވިޑް-19 މިހާތަނަށް އާއިރު ސްރީލަންކާގެ 53 މީހެއްގެ ގައިން ފެނިފައިވާކަމަށް އެގައުމުން ބުނެފި އެވެ. މީގެތެރޭގައި ޖެނުއަރީ މަހު އެގައުމުގައި ތިއްބާ ވައިރަސްގެ އަސަރު ފެނުނު ޗައިނާގެ ޓޫރިސްޓުންވެސް ހިމެނެއެވެ.
މިވަގުތު ސްރީލަންކާގެ ހޮސްޕިޓަލްތަކުގައި އޮބްޒަރވޭޝަން ގައި 243 މީހުން ތިބިކަމަށް އެގައުމުގެ ސަރުކާރުން ބުނެއެވެ. އިއްޔެގައި އޮބްޒަރވޭޝަންގައި ތިބީ 212 މީހުންނެވެ. އޮބްޒަރވޭޝަންގައި ތިބި ގިނަ މީހުންގެ ގައިން ވައިރަސްގެ އަސަރު ނުފެންނާތީ ދޫކޮށްލަމުންދާކަމަށްވެސް އެގައުމުން ބުނެއެވެ. މިހާތަނަށް އާއިރު އެގައުމުން ވައިރަސް ފެނުނު އެންމެންވެސް ތިބީ އެކަމަށް ޚާއްސަކޮށް ކޮލަމްބޯގައި ހުންނަ ހޮސްޕިޓަލްގަ އެވެ.
ސްރީލަންކާއިންވަނީ ހޯމަ ދުވަހުން ފެށިގެން ޗުއްޓީ ދުވަސްތަކެއްގެ ގޮތުގައި ހަމަޖައްސާފަ އެވެ. އެއީ ވައިރަސް ފެތުރުން ކޮންޓްރޯލްކުރުމަށް އާންމުން ގޭގައި ބޭތިއްބުމުގެ ގޮތުންނެވެ. ބުދަ ދުވަހު އެގައުމުން ވަނީ ހަލުވި މިނުގައި ވައިރަސް ފެތުރޭ ހިސާބުތަކުގައި ކާފިއު އިއުލާންކޮށްފަ އެވެ. މިސަރަހައްދުތަކަކީ އިޓަލީން މީހުން އައިސްއުޅޭ ސަރަހައްދުތަކެވެ. އަނެއްކޮޅުން ސްރީލަންކާގެ ހުރިހާ އެއާޕޯޓެއް ބުރާސްފަތި ދުވަހުން ފެށިގެން އެއް ހަފުތާގެ މުއްދަތަށް ބަންދުކުރުމަށް އެގައުމުގެ ރައީސް ގޯޓާބޭ ރާޖަޕަކްސާ ވަނީ އަންގަވާފަ އެވެ.
ބަންޑާރަނައިކަ އިންޓަނޭޝަނަލް އެއާޕޯޓަށް ފްލައިޓްތައް ޖެއްސުން ބުދަ ދުވަހުން ފެށިގެން ދެ ހަފުތާ އަށް ވަނީ މަނާކޮށްފަ އެވެ.
ލަންކާގެ އެއާޕޯޓްތައް ބަންދުކުރި ނަމަވެސް ބައެއް ހާލަަތްތަކުގައި ބައެއް ކަހަލަ ފްލައިޓްތައް ޖެއްސުން ހުއްދަ އެވެ. އަދި ކޮވިޑް-19 ފެތުރުން ހުއްޓުވުމުގެ ގޮތުން ލަންކާ އިން މިހާރު ވަނީ ބައެއް ގައުމުތަކުން މީހުން އެތެރެވުން މަނާކޮށްފަ އެވެ.
