ވެކްސިން ޖަހައިގެންވިޔަސް ދިރާގު ދިވެހި ޕްރިމިއާ ލީގުގެ ކުޅުން އަލުން ފަށަން ކުލަބުތަކާއި ކުޅުންތެރިންވެސް ތިބީ ތައްޔާރަށް ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ދިވެހި ޕްރިމިއާ ލީގު މެދުކަނޑާލަން ނިންމީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު އެޗްޕީއޭއިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ. އެއާއެކު ފުރަތަމަ ޑިވިޝަނުގެ ހުރިހާ ކުލަބަކުން ވަނީ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށާއި، އެހެންކަމުން އަލުން ފަރިތަކުންތައް ފަށައި، ލީގު ފެށުމުގެ ހުއްދަދިނުމަށް ގޮވާލާފައެވެ.
ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ ލީގު އަލުން ފެށުމުގެ މަޝްވަރާތައް މިހާރު ކުރިއަށްދާއިރު، ލީގު އަލުން ފެށުމަށް އައު އުސޫލުތަކެއް ހުށަހަޅަން އެޗްޕީއޭއިން މިހާރު އަންގާފައިވާ ކަމަށެވެ. އެކަމަކު މީގެ ކުރިންވެސް އެންމެ ފުރަތަމަ ލީގު ފަށަން ވަރަށް ފުރިހަމަ އުސޫލުތަކެއް އެޗްޕީއޭއާ މަޝްވަރާކުރެވިގެން ހެދިއިރު، އެ ފަހަރު އުސޫލުތައް ހަދާފައިވަނީ އެޗްޕީއޭއިން ބޭނުންވި ހުރިހާ ކަމެއް ހިމަނައިގެން ކަމަށާއި، އެހެންކަމުން އަލުން އައު އުސޫލުތަކެއް ހަދާއިރު އިތުރަށް ހިމަނާނެ ކަމެއް އެނގިނުލައްވާ ކަމަށްވެސް ވިދާޅުވިއެވެ.
އަދި މީގެ ކުރިން އުސޫލުތައް އެކުލަވާލުމުގައި ޔޫރަޕުގެ ބޮޑެތި ލީގުތަކުން އަމަލުކުރަމުން އަންނަ ގޮތް ދިރާސާކުރެއްވި ކަމަށާއި، އަދި އެ ފަހަރު އުސޫލުތައް އެއްކޮށް ކަނޑައެޅީ ފީފާ އާއި އޭއެފްސީގެ މަޝްވަރާއަށްފަހުގައި ކަމަށްވެސް ބައްސާމް ވިދާޅުވިއެވެ.
އަޅުގަނޑުމެން ވަރަށް ބޮޑަށް ދިރާސާކުރިން އިޓާލިއަން ލީގުވެސް، ސްޕެނިޝް ލީގުވެސް އަދި ހަމަ އިންގްލިޝް ޕްރިމިއާ ލީގުގައިވެސް ކޮވިޑާ ގުޅިގެން ރައްކާތެރިކަމުގެ ފިޔަވަޅުތައް އަޅާފައިހުރީ ކިހިނެއްތޯ. އަދި އަޅުގަނޑުމެން ހެދި ގައިޑްލައިން އަޅުގަނޑުމެން ވާނީ ފީފާ އަދި އޭއެފްސީއާވެސް ހިއްސާކޮށް، އެ ބޭފުޅުންގެވެސް ހިޔާލާއި މަޝްވަރާ ހޯދާފައި. އެއަށްފަހުގައި އަޅުގަނޑުމެންގެ ގައިޑްލައިން މި އޮތީ މުޅި އެތި ނިމިގެން އަޅުގަނޑުމެންނަށް މި ސީޒަން ފެއްޓިގެން މި ދަނީ.އެފްއޭއެމުގެ ރައީސް ބައްސާމް އަދީލް ޖަލީލް
ބައްސާމް ވިދާޅުވީ ލީގު މެދުކަނޑާލުމުން ކުލަބުތަކުން ކަންބޮޑުވުން ފާޅުކޮށްފައިވާއިރު، ކުލަބުތަކާއި، އޮފިޝަލުން އަދި ކުޅުންތެރިންވެސް ތިބީ ވެކްސިން ޖަހައިގެންވިޔަސް ލީގުގެ ކުޅުން އަކުން ފެށުމަށް ކަމަށެވެ. އަދި ލީގު ކުރިއަށް ގެންދިޔުމަށްޓަކައި ސިއްހީ އިދާރާތަކަށް ދޭން ޖެހޭ ފުރިހަމަ އެއްބާރުލުން ކުލަބުތަކުން ދޭނެ ކަމަށާއި، އުންމީދަކީ ވީއެންމެ އަވަހަކަށް ލީގުގެ ކުޅުން ފެށިގެން ދިޔުން ކަމަށްވެސް ބައްސާމް ވިދާޅުވިއެވެ.
އަނެއްކާވެސް އަޅުގަނޑުމެންގެ ޝެޑިއުލް ކައްސާލައިގެން މި ދަނީ. ކިހާ ދުވަހަކަށްތޯ މި ދެ ހަފުތާ ދެމިގެންދާނީ ނުވަތަ ދެ ހަފުތާގެ ތެރޭގައި އަޅުގަނޑުމެންނަށް ފެއްޓިދާނެތޯ، މި ހުރިހާ ސުވާލަކީ ހަމަ އަޅުގަނޑުމެން ވިސްނާލަންޖެހޭ ކަންކަން މިހިރީ. މީ އަޅުގަނޑުމެންގެ ކުލަބުތަކާއި، އޮފިޝަލުން އަދި ކުޅުންތެރިން މިތިބީ ހަމަ ތައްޔާރަށް ވެކްސިން ޖަހައިގެންވެސް ކުރިއަށްދިޔުމަށްޓަކައި.އެފްއޭއެމުގެ ރައީސް ބައްސާމް އަދީލް ޖަލީލް
ކޮވިޑާ ގުޅިގެން ކުއްލި ގޮތަކަށް ދިވެހި ޕްރިމިއާ ލީގުގެ ކުޅުން މެދުކަނޑާލިއިރު، މިހާތަނަށް ލީގުން ކޮވިޑުގެ ކޭހެއް ރިޕޯޓުކޮށްފައެއް ނުވެއެވެ. އެއާއެކު ހެދިފައިވާ އުސޫލުތަކުގެ ދަށުން ލީގުގެ ކުޅުން ކުރިއަށްދަނިކޮށް، އެޗްޕީއޭއިން ނެރުނު އައު އުސޫލުތަކާ ގުޅިގެން ލީގު މެދުކަނޑާލުމަކީ ފުޓްބޯޅައިގެ ގިނަ ބަޔަކަށް ގަބޫލުރަން ދަތިވި ނިންމުމެކެވެ.
ދެވަނަ ބުރުގެ މެދުތެރެއިން ދިވެހި ޕްރިމިއާ ލީގުގެ ކުޅުން ވަގުތީ ގޮތުން މެދުކަނޑާލިއިރު، އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން ފަށާފައިވަނީ މދިޔަ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ. އަދި ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ.
