ސިނޮފަރމް ވެކްސިންގެ 5،000 ޑޯޒް ރާއްޖެއަށް ލިބިއްޖެ

ޗައިނާގެ ސިނޮފާރމް ކުންފުނިން ކޮވިޑް-19 އަށް އުފައްދާފައިވާ ވެކްސިންގެ 5،000 ޑޯޒް ހެޔޮއެދޭ ފަރާތަކުން ރާއްޖެއަށް ހަދިޔާ ކޮށްފައިވާކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.

ބުރާސްފަތި ދުވަހު އެޗްއީއޯސިީން ބުނީ ސިނޮފަރމް ވެކްސިނުގެ 5،000 ޑޯޒް ހެޔޮ އެދޭ ފަރާތަކުން ރާއްޖެއަށް ހަދިޔާ ކޮށްފައިވާ ކަމަށާއި ކޮވިޝީލްޑާއެކު މި ވެކްސިން ރާއްޖޭގައި ޖަހަން ފަށާނީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ހުއްދަ ލިބުމުން ކަމަށެވެ.

ޗައިނާގެ ސިނޮފަރމްއިން ކޮވިޑް-19އަށް ދެ ވެކްސިނެއް އުފައްދާފައިވާއިރު ރާއްޖެއަށް ލިބިފައި ވަނީ ސިނޮފަރމްގެ ކޮން އިންސްޓިޓިއުޓަކުން އުފައްދާފައިވާ ވެކްސިނެއްކަމެއް އެޗްއީއޯސީން ހާމައެއް ނުކުރެއެވެ.

މީގެ ކުރިން ވެސް ސިނޮފަރމް ވެކްސިނުގެ 5000 ޑޯޒް ހެޔޮއެދޭ ފަރާތަކުން ރާއްޖެއަށް ހަދިޔާ ކޮށްފައިވާއިރު ޗައިނާއިން ވެސް ރާއްޖެއަށް ސިނޮފަރމް ވެކްސިންގެ އެއްލައްކަ ޑޯޒް ދިނުމަށް ވަނީ ނިންމާފައެވެ.

ސިނޮފާރމްގެ ވޫހާން އިންސްޓިޓިއުޓް އޮފް ބަޔޮލޮޖިކަލް ރީސާރޗް އަދި ބެއިޖިން އިންސްޓިޓިއުޓް އޮފް ބަޔޮލޮޖިކަލް ރިސާރޗުން ވަނީ ކޮވިޑް-19އަށް ވެކްސިނެއް އުފައްދާފައެވެ. އެގޮތުން ވޫހާން އިންސްޓިޓިއުޓްގެ ވެކްސިން އެމެޖެންސީކޮށް ބޭނުން ކުރުމުގެ ހުއްދަ ޗައިނާ އަދި ޔޫއޭއީން ދީފައިވާއިރު، މިވެކްސިންގެ ކްލިނިކަލް ޓްރަޔަލްގެ ފޭސް ތިނެއްގެ މަސައްކަތްތައް ދަނީ ކުރަމުންނެވެ.

ބެއިޖިން އިންސްޓިޓިއުޓުން ކޮވިޑް-19އަށް އުފައްދާފައިވާ ވެކްސިނަކީ 79 އިންސައްތަ ކާމިޔާބު ވެކްސިނެއްކަމަށް ދައްކާފައިވާ އިރު، މިވެކްސިނަކީ ދެ ޑޯޒުން ތިން ހަފްތާގެ ދުރުމިނުގައި ދޭން ޖެހޭ ވެކްސިނެކެވެ. މި ވެކްސިން ބޭނުން ކުރުމުގެ ހުއްދަ ޗައިނާ، ޔޫއޭއީ އަދި ބަހްރައިންގައި ދީފައިވާއިރު މިވެކްސިން ބޭނުން ކުރުމުގެ އެމެޖެންސީ ހުއްދަ ހަންގޭރީ، ޖޯޑަން، ޕާކިސްތާނު އަދި މިސްރުގައި ވަނީ ދީފައެވެ.