ދިރާގު ދިވެހި ޕްރިމިއާ ލީގު ހުއްޓާލަން ޖެހިފައިވާތީ އެކަމަށް ހައްލެއް ހޯދައިދިނުމަށް ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އެދިއްޖެއެވެ.

ދިވެހި ޕްރިމިއާ ލީގު މެދުކަނޑާލަން ނިންމީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު އެޗްޕީއޭއިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ. ލީގު މެދުކަނޑާލާފައިވާތާ ހަފުތާއެއްހާ ދުވަސް މިހާރު ވެފައިވާއިރު، ލީގު އަލުން ފަށާނެ ދުވަހެއްވެސް ޔަގީންނުވެ ކޯޗުންނަށް މިހާރު ވަނީ އަނެއްކާވެސް ބޮޑު ޗެލެންޖަކާ ކުރިމަތިލާން ޖެހިފައެވެ.

ބުދަ ދުވަހު މަޒާޑާ ކެފޭގައި ފުރަތަމަ ޑިވިޝަނުގެ ހުރިހާ ކުލަބެއްގެ ގިނަ ކުޅުންތެރިންތަކެއް ހިމެނޭ ގޮތަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ދަގަނޑޭ ބުނީ ފުޓުބޯޅައަށް ދެރައެއް ލިބޭ ކޮންމެ ފަހަރަކު އެންމެން އެކަޗެއް ކިޔައި، ކުރަމުން އަންނަ މަސައްކަތަކީ ތާރީފު ހައްގު މަސައްކަތެއް ކަމަށެވެ. އަދި ލީގުގެ ފަރިތަކުރުންތައް ހުއްޓާލާފައި އޮތުމުން ލިބޭ ގެއްލުންތައް ކުޑަކުރެވޭތޯ މަސައްކަތް ކުރުމަކީ އޭނާގެ އެދުމެއް ކަމަށާއި، ސިއްހީ އިދާރާތަކުން އެކަމާ ދޭތެރޭ ވިސްނައި، އެކަމަށް ހައްލެއް ހޯދައިދިނުމަކީ އުންމީދުކުރާ ކަމެއް ކަމަށްވެސް ވަނީ ބުނެފައެވެ. އަދި އުންމީދަކީ ފުޓްބޯޅައިގެ ކަންކަން ވީއެންމެ އަވަހަކަށް ފެށޭގޮތްވުން ކަމަށްވެސް ދަނގަޑޭ ބުންޏެވެ.

މީގެ އިތުރުން ދަގަނޑޭ ވަނީ ކޮވިޑާ ދެކޮޅަށް ސިއްހީ ދާއިރާގައި މަސައްކަތްކުރަމުން އަންނަ މީހުން ކުރަމުން ގެންދާ މަސައްކަތަކީ ތާރީފު ހައްގު މަސައްކަތެއް ކަމަށާއި، އެހެންކަމުން އެ އެންމެނަށް ހާއްސަ ޝުކުރެއްއަދާކޮށްފައެވެ.

ނޫސްވެރިންގެ މި ބައްދަލުވުމުގައި ވާހަކަދައްކަމުން ގައުމީ ފުޓުބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) ބުނީ ލީގުގައި ކުޅޭ ގިނަ ކުޅުންތެރިންނަކީ މާލޭގައި ގެދޮރު ކުއްޔަށް ހިފައިގެން އުޅޭ ކުޅުންތެރިން ކަމަށާއި، ،ކުލބަުތަކަށް ލިބޭ ގެއްލުމުން އެކަމުގެ އަސަރު ކުޅުންތެރިންނަށް ކުރާނެ ކަމަށެވެ. އަދި ކުޅުންތެރިން ވެކްސިން ޖަހައިގެންވިޔަސް، ލީގު ކުޅެން ތައްޔާރަށް ތިބި ކަމަށްވެސް އަކުރަމް ބުންޏެވެ.

ސުޕަ ޔުނައިޓެޑް ސްޕޯޓްސް (ސަސް) ގެ ކެޕްޓަން އަބްދުﷲ ހަނީފް (ބެންޖޯ) ބުނީ ދިވެހި ކުޅުންތެރިންނަކީ ފުޓްބޯޅައިން އާމްދަނީ ހޯދައިގެން ކުޅޭ ކުޅުންތެރިން ކަމަށާއި، ލީގު މެދެކެނޑޭ ކޮންމެ ފަހަރަކު ކުޅުންތެރިންނަށް މާލީ ގޮތުން ގެއްލުންވާ ކަމަށެވެ. ހަމައެހެންމެ ކުޅުންތެރިންގެ ފިޓްނަސް ދަށްވެ، ވާދަވެރި މުބާރާތްތަކުގައި ކުޅުންތެރިންނަށް އެންމެ އެދެވޭ ކުޅުން ނުދެއްކޭނެ ކަމަށްވެސް ބެންޖޯ ބުންޏެވެ.

މާޒިޔާ ސްޕޯޓްސް އެންޑް ރެކްރިއޭޝަނުގެ ކެޕްޓަން އަސަދުﷲ އަބްދުﷲ ބުނީ މިހާތަނަށް އެޗްޕީއޭގެ ހާއްސަ އުސޫލުތަކަށް ކުލަބުތަކާއި ކުޅުންތެރިން އަމަލުކޮށްފައިވާ ކަމަށާއި، އޭގެ ނަތީޖާއެއްގެ ގޮތުން މިހާތަނަށް ލީގުގެ އެއްވެސް ކުޅުންތެރިއެއް ކޮވިޑަށް ޕޮޒިޓިވްވެފައި ނުވާ ކަމަށެވެ. އަދި މިގޮތަށް އެޗްޕީއޭގެ އުސޫލުތަކަށް ބަރާބަރަށް އަމަލުކުރަމުން ދަނިކޮށް ލީގު މެދުކަނޑާލުމަކީ ކުޅުންތެރިންނާއި ކުލަބުތަކަށް ލިބުނު ވަރަށް ބޮޑު ގެއްލުމެއް ކަމަށްވެސް ބުންޏެވެ.

ޔުނައިޓެޑް ވިކްޓަރީ (ޔޫވީ) ގެ މިޑްފީލްޑަރު އިސްމާއިލް އީސަ (މެސީ) ބުނީ ފުޓްބޯޅަ އަކީ ކުޅުންތެރިންގެ ވަޒީފާ ކަމަށާއި، ކުޅުންތެރިންނަކީ ފުޓްބޯޅައަށް ހުސްވެ ދިރިއުޅުން ބިނާކުރާ ބައެއް ކަމަށެވެ. އެހެންކަމުން ލީގުގެ ކުޅުން ހުއްޓާލާ ކޮންމެ ފަހަރަކު ކުޅުންތެރިންނަށް މާލީ ގޮތުން ބޮޑު ގެއްލުންތަކެއް ވަމުން އަންނަ ކަމަށްވެސް ބުންޏެވެ،

ކުއްލި ގޮތަކަށް ދިވެހި ޕްރިމިއާ ލީގުގެ ކުޅުން މެދުކަނޑާލުމުން ކުލަބުތަކުން ކަންބޮޑުވުން ފާޅުކުރަމުން އަންނައިރު، ދިވެހި ޕްރިމިއާ ލީގަކީ ކުލަބުތަކުން އެތައް މިލިޔަން ރުފިޔާއެއް ޚަރަދުކުރަމުން އަންނަ ލީގެކެވެ. އެހެންކަމުން ވީ އެންމެ އަވަހަށް ލީގުގެ ކުޅުން އަލުން ފެށުމުގެ ހުއްދަ ދިނުމަށް ކުލަބުތަކުން އަންނަނީ އާދޭސްކުރަމުންނެވެ.