ލީގު ހުއްޓާލަން ޖެހުނު ސަބަބު ސާފުކޮށްދީފައިނުވާތީ ކޯޗުންގެ ކަންބޮޑުވުން

ދިރާގު ދިވެހި ޕްރިމިއާ ލީގު މެދުކަނޑާލަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނިންމު ސަބަބު ސާފުކޮށްދީފައިނުވާތީ ފުރަތަމަ ޑިވިޝަން ކުލަބުތަކުގެ ކޯޗުން ކަންބޮޑުވުން ފާޅުކޮށްފިއެވެ.

ދިވެހި ޕްރިމިއާ ލީގު މެދުކަނޑާލަން ނިންމީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު އެޗްޕީއޭއިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ. ލީގު މެދުކަނޑާލާފައިވާތާ ހަފުތާއެއްހާ ދުވަސް މިހާރު ވެފައިވާއިރު، ލީގު އަލުން ފަށާނެ ދުވަހެއްވެސް ޔަގީންނުވެ ކޯޗުންނަށް މިހާރު ވަނީ އަނެއްކާވެސް ބޮޑު ޗެލެންޖަކާ ކުރިމަތިލާން ޖެހިފައެވެ.

އަންގާރަ ދުވަހު މަޒާޑާ ކެފޭގައި ފުރަތަމަ ޑިވިޝަނުގެ ހުރިހާ ކުލަބެއް ގުޅިގެން ބޭއްވި ނޫސްވެރިންގެ ބައްދަލުވުމުގައި ކުލަބު އީގަލްސްގެ ކޯޗު މުޙައްމަދު ޝާޒްލީ (ޝާޒް) ބުނީ އެޗްޕީއޭގެ އުސޫލުތަކާ އެއްގޮތަށް ފަރިތަކުރުންތައް ފެށިގެން ގޮސް، ވަރަށް ރަނގަޅަށް ކަންކަން ދަނިކޮށް މުބާރާތް މެދުކަނޑާލަން ޖެހުނީ ކީއްވެ ކަމެއް ސާފުނުވާ ކަމަށެވެ. އަދި މީގެ ކުރިން ލީގު ފަށަން ހުއްދަ ދިނުމުގައިވެސް ދަތިތައް ދިމާވި ކަމަށާއި، މިއީ ވަރަށް ބޮޑު ޚަރަދެއް ކޮށްގެން ކުރާކަމަކަށްވާއިރު، ލީގު މެދުކަނޑާލި ވަކި ސަބަބެއް ސާފުކޮށްދީފައިނުވާކަމީ ކަންބޮޑުވާ ކަމެއް ކަމަށްވެސް ބުންޏެވެ.

ޝާޒްލީ ބުނީ މިފަދަ ބަލިމަޑުކަމެއްގެ ތެރޭގައި ލީގު ހުއްޓާލަން ޖެހޭ ފަހަރުވެސް އަންނާނެ ކަމަށާއި، އެކަމަކު އެންމެ ފުރަތަމަ މަރުހަލާގައި ޕްރޮފެޝަނަލްކޮށް ހިންގަމުން އައި ލީގެއް ހުއްޓާލުމަކީ ރަނގަޅު ނިންމުމެއް ނޫން ކަމަށެވެ.

ނޫސްވެރިންގެ މި ބައްދަލުވުމުގައި ޔުނައިޓެޑް ވިކްޓަރީ (ޔޫވީ) ގެ ކޯޗު އިހުސާން އަބްދުލް ޣަނީ (ސާންތި) ބުނީ ކުއްލި ގޮތަކަށް ލީގާއި ފަރިތަކުރުންތައް މެދުކަނޑާލުމުން އެންމެ ކަންބޮޑުވާ ކަމަކީ އަލުން ލީގުގެ ކުޅުން ފެށޭނެ ދުވަހެއްވެސް ނޭނގުން ކަމަށެވެ. އަދި ލީގު މެދުކަނޑާލިއިރު ކުލަބުތަކާއި އެފްއޭއެމް ގުޅިގެން އުސޫލުތަކާ އެއްގޮތަށް ވަރަށް ރަނގަޅަށް އަމަލުކުރި ކަމަށާއި، އުސޫލުތައް މުރާޖާކުރުމަށްފަހު ވިޔަސް ލީގު ހުއްޓާލުން ނޫން ގޮތެއް ނިންމަން ޖެހޭ ކަމަށްވެސް ބުންޏެވެ. އަދި ހާއްސަކޮށް އުސޫލުތައް ވަރުގަދަ ކޮށްގެންވިޔަސް ފަރިތަކުރުންތައް ފަށަން ފުރުސަތު ލިބުން މުހިންމު ކަމަށްވެސް ސާންތި ވަނީ ބުނެފައެވެ.

ދަ ގްރާންޑޭ ސްޕޯޓްސް ކުލަބުގެ ކޯޗު އިސްމާޢީލް މަހަފޫޒް (އިންމަ) ބުނީ އެފްއޭއެމާއި އެޗްޕީއޭ މަޝްވަރާކޮށްގެން ސީޒަން ފެށީ ވަރަށް ވަރުގަދަ އުސޫލުތަކެއްގެ ދަށުން ކަމަށެވެ. އަދި ފުޓްބޯޅަ ކޮމިއުނިޓީތެރޭގައި ކްލަސްޓާއެއް ނެތި ލީގު ކުއްލިއަކަށް ހުއްޓާލަން ޖެހުމަކީ ފުޓްބޯޅައަށް ލިބޭ ވަރަށް ބޮޑު ގެއްލުމެއް ކަމަށްވެސް ބުންޏެވެ. އިންމަ ބުނީ ބޮޑު މެދުކެނޑުމަކަށްފަހު އެންމެ ފުރަތަމަ ސީޒަން ފަށަން ޕްރީ-ސީޒަން ހެދިއިރުވެސް ކޯޗުންނަށް ވަރަށް ބޮޑު ޗެލެންޖަކާ ކުރިމަތިލާން ޖެހުނު ކަމަށާއި، އަނެއްކާވެސް މެދުކެނޑުމެއް އައުމުން މިއީ ކޯޗުން ކުރިމަތިލާންޖެހޭނެ އިތުރު ޗެލެންޖެއް ކަމަށެވެ.

މީގެ އިތުރުން ނޫސްވެރިންގެ މި ބައްދަލުވުމުގައި ސުޕަ ޔުނައިޓެޑް ސްޕޯޓްސް (ސަސް) ގެ ކޯޗު މުޙައްމަދު ޝިޔާޒް (މޯހަން) ބުނީ ފުޓްބޯޅައިގެ ކޮންޓްރޯލުން ބޭރުން ނިންމާ ނިންމުންތަކުގެ ސަބަބުން ލީގު ކުޅުން ހުއްޓާލާފައި އޮންނައިރު، މިކަމުގެ ސަބަބުން ގެއްލުންވަނީ ފުރަތަމަ ޑިވިޝަނުގެ އަށް ކުލަބުގެ އިތުރުން ގައުމީ ފުޓްބޯޅަ ޓީމަށް ކަމަށެވެ. އެގޮތުން މިހާރު މި އޮތް ހާލަތުން އަންނަ މާޗު މަހު ކުޅެން އޮތް ކޮލިފައިންގ މެޗުތަކަށް ގައުމީ ޓީމު ކުޅުންތެރިން ފިޓް ނުވާނެ ކަމަށާއި، އެ މެޗުތަކުން ނަތީޖާ ނެރުމަކީ ގައުމީ ކޯޗަށާއި ކުޅުންތެރިންނަށްވެސް ވަރަށް އުނދަގޫވާނެ ކަމެއް ކަމަށެވެ. އަދި މި އަހަރު ކުޅެން އޮތް އޭއެފްސީ ކަޕަށް ތައްޔާރުވާ ދެ ޓީމަށްވެސް މިކަމުގެ އަސަރުކުރާނެ ކަމަށްވެސް މޯހަން ބުންޏެވެ.

ކުއްލި ގޮތަކަށް ދިވެހި ޕްރިމިއާ ލީގުގެ ކުޅުން މެދުކަނޑާލުމުން ކުލަބުތަކުން ކަންބޮޑުވުން ފާޅުކުރަމުން އަންނައިރު، ދިވެހި ޕްރިމިއާ ލީގަކީ ކުލަބުތަކުން އެތައް މިލިޔަން ރުފިޔާއެއް ޚަރަދުކުރަމުން އަންނަ ލީގެކެވެ. އެހެންކަމުން ވީ އެންމެ އަވަހަށް ލީގުގެ ކުޅުން އަލުން ފެށުމުގެ ހުއްދަ ދިނުމަށް ކުލަބުތަކުން އަންނަނީ އާދޭސްކުރަމުންނެވެ.

ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ. އަދި މިހާތަނަށް ލީގުގެ ކުޅުން ކުރިއަށް ގެންގޮސްފައިވަނީ އެޗްޕީއާއި އެފްއޭއެމުން އެކުލަވާލި އުސޫލުތަކުގެ ދަށުންނެވެ.