ލީގު މެދުކަނޑާލުމުން ވަޒީރުވެސް ކުލަބުތަކާއެކު

ދިރާގު ދިވެހި ޕްރިމިއާ ލީގު މެދުކަނޑާލަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނިންމުމުން ކުލަބުތަކަށް ލިބޭ ގެއްލުމަކީ އަމިއްލަ ހައިސިއްޔަތުންވެސް ކަންބޮޑުވެލއްވާ ކަމެއް ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ދިވެހި ޕްރިމިއާ ލީގު މެދުކަނޑާލަން ނިންމީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު އެޗްޕީއޭއިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ. އެއާއެކު ފުރަތަމަ ޑިވިޝަނުގެ ހުރިހާ ކުލަބަކުން ވަނީ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށާއި، އެހެންކަމުން އަލުން ފަރިތަކުންތައް ފަށައި، ލީގު ފެށުމުގެ ހުއްދަދިނުމަށް ގޮވާލާފައެވެ.

ބުދަ ދުވަހު ވަޒީރު ކުރެއްވި ޓްވީޓެއްގައި ވިދާޅުވީ ކުލަބުތަކުން ކަންބޮޑުވާ ފަދައިން ލީގު މެދުކަނޑާލުމުން އެ މަނިކުފާނުވެސް ކަންބޮޑުވެލައްވާ ކަމަށެވެ. އެހެންކަމުން މި ކަމަށް ހައްލެއް ހޯދައިދިނުމަށް ވުޒާރާއިން ކުރަންޖެހޭ މަސައްކަތްކުރަމުން އަންނަ ކަމަށާއި، ލީގު ހުއްޓިފައި އޮތުމަކީ އެކި ގޮތްގޮތުން ބޮޑެތި ގެއްލުންތަކެއް ކުލަބުތަކަށް އަދި ކުޅުންތެރިންނަށް ލިބޭ ކަމެއް ކަމަށްވެސް ވަޒީރުގެ ޓްވީޓުގައި ވަނީ ވިދާޅުވެފައެވެ.

ކުއްލި ގޮތަކަށް ދިވެހި ޕްރިމިއާ ލީގުގެ ކުޅުން މެދުކަނޑާލިއިރު، ލީގު މެދުކަނޑާލަން އެޗްޕީއޭއިން އެންގީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއެކު މަޝްވަރާ ނުކޮށް ކަމަށް އެ އިދާރާގެ ރައީސް ބައްސާމް އަދީލް ޖަލީލް ދާދި ފަހުން ވަނީ ވިދާޅުވެފައެވެ. އަދި މި ނިންމުން ނިންމިއިރު ކުޅިވަރާ ބެހޭ ވަޒީރާވެސް މަޝްވަރާ ކުރެއްވި ކަމަށް ގަބޫލުފުޅު ނުކުރައްވާ ކަމަށްވެސް ބައްސާމް ވިދާޅުވިއެވެ.

ކޮވިޑާ ގުޅިގެން ކުއްލި ގޮތަކަށް ދިވެހި ޕްރިމިއާ ލީގުގެ ކުޅުން މެދުކަނޑާލިއިރު، މިހާތަނަށް ލީގުން ކޮވިޑުގެ ކޭހެއް ރިޕޯޓުކޮށްފައެއް ނުވެއެވެ. އެއާއެކު ހެދިފައިވާ އުސޫލުތަކުގެ ދަށުން ލީގުގެ ކުޅުން ކުރިއަށްދަނިކޮށް، އެޗްޕީއޭއިން ނެރުނު އައު އުސޫލުތަކާ ގުޅިގެން ލީގު މެދުކަނޑާލުމަކީ ފުޓްބޯޅައިގެ ގިނަ ބަޔަކަށް ގަބޫލުރަން ދަތިވި ނިންމުމެކެވެ.

މި މަހުގެ ތެރޭގައި ލީގު މެދުކަނޑާލިއިރު، ގިނަ ދުވަސްތަކެއްގެ މެދުކެނޑުމަކަށްފަހު އަދި ކުޅުންތެރިން ފުޓްބޯޅަ ދަނޑާއި ދުރުގައި އެތައް ދުވަހެއް ހޭދަކުރުމަށްފަހު ރާއްޖޭގެ ފުޓްބޯޅަ ސީޒަން ފެށީ އެޗްޕީއޭގެ އުސޫލުތަކަށް އަމަލުކުރަން ޝަރުތުކޮށް، ހާއްސަ ހުއްދައެއްގެ ދަށުންނެވެ. އެގޮތުން މި ސީޒަނަށް ކުލަބުތަކުން ތައްޔާރުވާން ފެށި ދުވަހުން ފެށިގެން، ލީގު މެދުކަނޑާލުމާ ހަމައަށް ހުރިހާ ކުލަބަކުންވެސް އުސޫލުތަކަށް ބަރާބަރަށް އަމަލުކޮށްފައިވާ ކަމަށް އެ ކުލަބުތަކުން ބުނެއެވެ.