އެސްޓްރަޒެނެކާގެ ކޮވިޑް-19 ވެކްސިނަށް ދެކުނު ކޮރެއާއިން ހުއްދަ ދީފި
10 ފެބުރުއަރީ 2021 | ބުދަ 08:17މި ވެކްސިން 65 އަހަރުން މަތީގެ މީހުންނަށް ދިނުމާމެދު ޔޫރަޕްގެ ގިނަ ގައުމުތަކުގެ ސިއްހީ މާހިރުން ކަންބޮޑުވުން ފާޅު ކުރަމުން ދޭ
އެގައުމުގައި ވެކްސިން ދޭން ފަށާނީ އެސްޓްރަޒެނެކާ ވެކްސިނުގެ 1.5 މިލިއަން ޑޯޒްއާއި އެކު
އޮކްސްފޯޑް ޔުނިވާސިޓީއާއި އެސްޓްރަޒެނެކާ ގުޅިގެން އުފައްދާފައިވާ ކޮވިޑް-19 ވެކްސިން ބޭނުން ކުރުމުގެ ހުއްދަ ދެކުނު ކޮރެއާއިން ދީފިއެވެ.
ދެކުނު ކޮރެއާއިން މިކަން ހާމަކޮށް ބުނެފައިވަނީ ސިއްހީ ލަފާދޭ އެޑްވައިޒަރީ ޕެނަލުން މި ވެކްސިން 65 އަހަރުން މަތީގެ މީހުންނަށް ދިނުމާމެދު ސުވާލުތައް އުފައްދާފައިވީ ނަމަވެސް 65 އަހަރުން މަތީގެ މީހުންނަށް ވެސް ވެކްސިން ދޭނެ ކަމަށެވެ.
ދެކުނު ކޮރެއާގެ ވައިސް ހެލްތް މިނިސްޓަރ ކިމް ގަންގް ލިޕް ވިދާޅުވީ މި ވެކްސިން ބޭނުންކުރުމުގެ ހުއްދަ އިމަރޖެންސީކޮށް ދީފައިވަނީ އެކުންފުނީގެ ކްލިނިކަލް ޓްރަޔަލް ތަކުގެ އެންމެ ފަހުގެ އަދި ޞައްޙަ މަޢުލޫމާތުތައް ދިނުމަށް ޝަރުތު ކުރުމަށްފަހުގައި ކަމަށެވެ.
އެސްޓްރަޒެނެކާއިން އުފެއްދި މި ވެކްސިން 65 އަހަރުން މަތީގެ މީހުންނަށް ދިނުމާމެދު ޔޫރަޕްގެ ގިނަ ގައުމުތަކުގެ ސިއްހީ މާހިރުން ކަންބޮޑުވުން ފާޅު ކުރަމުން ދަނީ އެ އުމުރުގެ މީހުންނަށް ވެކްސިން ދިނުމާއިމެދު މާގިނަ ރިސަރޗްތަކެއް ނެތުމުގެ ސަބަބުންނެވެ.
ވެކްސިން ދިނުމާ ގުޅިގެން ދެކުނު ކޮރެއާގެ ޑިޒީސް ކޮންޓްރޯލް އެންޑް ޕްރިވެންޝަން އޭޖެންސީ (ކޭޑީސީއޭ)ން ބުނީ 26 ފެބްރުއަރީގައި ވެކްސިން ދޭން ފެށޭނެ ކަމަށެވެ. އަދި ވެކްސިން ދޭން ފަށާނީ އެސްޓްރަޒެނެކާ ވެކްސިނުގެ 1.5 މިލިއަން ޑޯޒްއާއި އެކުގައި ކަމަށާއި އެއާއިއެކު 7،50،000 މީހުންނަށް ވެކްސިން ދެވޭނެ ކަމަށެވެ.
