ކ. މާލެ
|
9 ފެބްރުއަރީ 2021 | އަންގާރަ 19:15
ފުރަތަމަ ޑިވިޝަނުގެ ހުރިހާ ކުލަބެއް ގުޅިގެން ބޭއްވި ނޫސްވެރިންގެ ބައްދަލުވުމުގެ ތެރެއިން
ފުރަތަމަ ޑިވިޝަނުގެ ހުރިހާ ކުލަބެއް ގުޅިގެން ބޭއްވި ނޫސްވެރިންގެ ބައްދަލުވުމުގެ ތެރެއިން
މިހާރު
ދިވެހި ޕްރިމިއާ ލީގު މެދުކަނޑާލުން
ލީގު އަލުން ފެށުމުގެ ހުއްދަދިނުމަށް ކުލަބުތަކުގެ އާދޭސް
 
ލީގު އަލުން ފެށުމުގެ ހުއްދަދިނުމަށް ހުރިހާ ކުލަބަކުންވެސް ވަނީ ގޮވާލާފައި
 
ދިވެހި ޕްރިމިއާ ލީގަށް ކުލަބުތަކުން އެތައް މިލިޔަން ރުފިޔާއެއް ޚަރަދުކުރޭ
 
ކުއްލި ގޮތަކަށް ލީގު މެދުކަނޑާލަން ނިންމީ މި މަހުގެ ތިންވަނަ ދުވަހު

ދިރާގު ދިވެހި ޕްރިމިއާ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެތީ އަލުން ފަރިތަކުންތައް ފަށައި، ލީގު ފެށުމުގެ ހުއްދަދިނުމަށް އެދި ފުރަތަމަ ޑިވިޝަނުގެ ކުލަބުތަކުން އާދޭސްކޮށްފިއެވެ.

ދިވެހި ޕްރިމިއާ ލީގު މެދުކަނޑާލަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ. އެއާއެކު މީގެ ކުރިންވެސް ކުލަބުތަކުން ވަނީ ކަންބޮޑުވުން ފާޅުކޮށް ނޫސްބަޔާންތައް ނެރެފައެވެ.

އަންގާރަ ދުވަހު މަޒާޑާ ކެފޭގައި ފުރަތަމަ ޑިވިޝަނުގެ ހުރިހާ ކުލަބެއް ގުޅިގެން ބޭއްވި ނޫސްވެރިންގެ ބައްދަލުވުމުގައި މާޒިޔާ ސްޕޯޓްސް އެންޑް ރެކްރިއޭޝަނުގެ ސީއީއޯ ހުސެއިން ޝާފިއު (ކޮކީ) ވިދާޅުވީ މިގޮތަށް ލީގު މެދުކަނޑާލާފައި އޮތުމުން ކުލަބުތަކަށާއި ކުޅުންތެރިންނަށް ވަރަށް ބޮޑު ގެއްލުމެއް ލިބިގެންދާ ކަމަށެވެ. އަދި ލީގު އަލުން ފެށުމުގެ އެއްވެސް އިޝާރާތެއް އަދި މިހާތަނަށް ލިބިފައިނުވާ ކަމަށްވެސް ވިދާޅުވިއެވެ.

އަދި ވިދާޅުވީ ލީގުގެ ކުޅުން ފެށީ ހުރިހާ ކުޅުންތެރިން ކޮވިޑަށް ޓެސްޓުކޮށް، ނަތީޖާތައް ނެގެޓިވްވުމުން ކަމަށާއި، އަދި މިހާތަނަށް އައިރު ކުލަބުތަކުން ވަރަށް ރަނގަޅަށް އެޗްޕީއޭގެ އުސޫލުތަކަށް ތަބާވެފައިވާ ކަމަށެވެ. އަދި އެފްއޭއެމުންވެސް ލީގުގެ ކަންކަން ވަރަށް ރަނގަޅަށް ބަލަހައްޓަމުން އައިރު، ކުއްލި ގޮތަކަށް ލީގު މެދުކަނޑާލުމަކީ އެއްގޮތަކަށްވެސް ގަބޫލުކުރެވޭނެ ނިންމުމެއް ނޫން ކަމަށްވެސް ކޮކީ ވިދާޅުވިއެވެ.

ނޫސްވެރިންގެ މި ބައްދަލުވުމުގައި ޓީސީ ސްޕޯޓްސް ކުލަބުގެ އިސް އޮފިޝަލް މުޙައްމަދު އީސަ (މޯ) ވިދާޅުވީ ގިނަ ކުޅުންތެރިންގެ އާމްދަނީ ގުޅިފައި އޮތީ ފުޓްބޯޅައަށް ކަމަށާއި، މިހާރު ކުލަބުތައްވެސް ހިނގަނީ ވިޔަފާރި އުސޫލުން ކަމަށެވެ. އެހެންކަމުން ލީގު މެދުކަނޑާލުމުން ކުލަބުތަކަށާއި ކުޅުންތެރިންނަށްވެސް މާލީ ގޮތުން ވަރަށް ބޮޑު ގެއްލުމެއް ލިބިގެންދާ ކަމަށާއި، މި ދަނޑިވަޅުގައި ލީގު އަލުން ފެށުމުގެ ހުއްދަދިނުމަކީ ފުޓްބޯޅައަށް ލޯބިކުރާ އެންމެންގެވެސް ވަރަށް ބޮޑު އާދޭހެއް ކަމަށްވެސް ވިދާޅުވިއެވެ.

ޔުނައިޓެޑް ވިކްޓަރީ (ޔޫވީ) ގެ މެނޭޖަރު މުޙައްމަދު ފަސީން ރާފިއު ވިދާޅުވީ އެފްއޭއެމާ މަޝްވަރާނުކޮށް ކުއްލި ގޮތަކަށް ލީގު މެދުކަނޑާލަން ނިންމުމުން ގެއްލުންވަނީ ހަމައެކަނި ކުލަބުތަކަށް ނޫން ކަމަށެވެ. އެގޮތުން ކުޅުންތެރިން ލައިގެން ކޮންމެ ކުލަބެއްގައި މަދުވެގެން 40 މީހުން ހިމެނޭއިރު، މިއީ ގިނަ ބައެއްގެ އާއިލާތަކާވެސް ގުޅިފައިވާ ނިންމުމެއް ކަމަށާއި، އެހެންކަމުން މި ކަމުގެ ސަބަބުން ކުޅުންތެރިންނަށާއި ކުލަބުތަކުގެ މެނޭޖުމަންޓުތަކަށް ލިބޭ ގެއްލުން ބުނެދޭންވެސް ނޭނގޭ ކަމަށްވެސް ފަސީން ވިދާޅުވިއެވެ.

މީގެ އިތުރުން ނޫސްވެރިންގެ މި ބައްދަލުވުމުގައި ކުލަބު އީގަލްސްގެ ޖެނެރަލް ސެކްރެޓަރީ މުފާވިޒް ހާޝިމް (މުފާ) ވިދާޅުވީ ފުޓްބޯޅަ ހަރަކާތްތައް ހުއްޓާލަން އެންގުމުން ގެއްލުންވަނީ ހަމައެކަނި ފުރަތަމަ ޑިވިޝަނުގެ ކުލަބުތަކަށް ނޫން ކަމަށާއި، މި ދަނޑިވަޅުގައި ދެވަނަ ޑިވިޝަނާއި ތިންވަނަ ޑިވިޝަނުގެ ކުލަބުތައް މަތިން ހަނދާންނައްތައިލައިގެން ނުވާނެ ކަމަށެވެ. އެގޮތުން ދެވަނަ ޑިވިޝަނާއި ތިންވަނަ ޑިވިޝަނުގެ ކުލަބުތަކުން މި ސީޒަނަށް ވަރަށް ރަނގަޅަށް ތައްޔާރުވި ކަމަށާއި، އެހެންކަމުން އެޗްޕީއޭގެ ނިންމުމާއެކު އެ ކުލަބުތަކަށްވެސް ފޫނުބެއްދޭވަރުގެ ގެއްލުންތަކެއް ލިބިގެންދާނެ ކަމަށްވެސް މުފާ ވިދާޅުވިއެވެ.

ކުއްލި ގޮތަކަށް ދިވެހި ޕްރިމިއާ ލީގުގެ ކުޅުން މެދުކަނޑާލުމުން ކުލަބުތަކުން ކަންބޮޑުވުން ފާޅުކުރަމުން އަންނައިރު، ދިވެހި ޕްރިމިއާ ލީގަކީ ކުލަބުތަކުން އެތައް މިލިޔަން ރުފިޔާއެއް ޚަރަދުކުރަމުން އަންނަ ލީގެކެވެ. އެހެންކަމުން ވީ އެންމެ އަވަހަށް ލީގުގެ ކުޅުން އަލުން ފެށުމުގެ ހުއްދަ ދިނުމަށް ކުލަބުތަކުން އަންނަނީ އާދޭސްކުރަމުންނެވެ.

ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ. އަދި މިހާތަނަށް ލީގުގެ ކުޅުން ކުރިއަށް ގެންގޮސްފައިވަނީ އެޗްޕީއާއި އެފްއޭއެމުން އެކުލަވާލި އުސޫލުތަކުގެ ދަށުންނެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް