ވެންޓިލޭޓަރުގެ މައްސަލައިގައި ފުލުހުންނާއި އޭސީސީން މައުލޫމާތު ސިއްރުކުރުމުން އެކަން ބެލުމަށް ކޮމިޓީއަށް
މަޖިލީހުން އެގޮތަށް ފާސްކުރުމާއެކު އެމައްސަލަ އަލުން ރިވިއުކުރުމަށް އެދި މަޖިލީހުން ޕީޖީގައި އެދިފައިވޭ
ރައްޔިތުންގެ މަޖިލީހުގެ ޖަލްސާގެ ތެރެއިން
ވެންޓިލޭޓަރުގެ ޚިޔާނާތުގެ މައްސަލާގައި ފުލުހުންނާއި އެންޓިކޮރަޕްޝަން ކޮމިޝަން (އޭސީސީ)ގެ ފަރާތުން ބޭނުންވާ މައުލޫމާތުތައް ފޮނުވާފައިނުވާކަމަށް ޕްރޮސެކިޔުޓަރ ޖެނެރަލް (ޕީޖީ) ވިދާޅުވެފައިވާތީ، ފުލުހުންނާއި އޭސީސީން އެމައުލޫމާތުތައް ސިއްރުކުރާ މައްސަލަ ބެލުމަށް ޖުޑީޝަރީ ކޮމިޓީއަށް ފޮނުވައިފިއެވެ.
ރައްޔިތުންގެ މަޖިލީހުން މިދިޔަ އަހަރުގެ ނޮވެމްބަރ މަހުގެ 2 ވަނަ ދުވަހު ބޭއްވި ޖަލްސާގައި ވަނީ ވެންޓިލޭޓަރު ޚިޔާނާތުގެ މައްސަލައިގައި ދައުވާނުކުރަން ޕީޖީ ނިންމެވި ނިންމެވުން މުރާޖަޢާކުރުމަށް އެދުމަށް ފާސްކޮށްފައެވެ. އެކަމާ ގުޅޭގޮތުން އަންގާރަ ދުވަހުގެ ޖަލްސާގައި ވާހަކަދައްކަވަމުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ މަޖިލީހުން އެގޮތަށް ފާސްކުރުމާއެކު އެމައްސަލަ އަލުން ރިވިއުކުރުމަށް އެދި މަޖިލީހުން ޕީޖީގައި އެދިފައިވާކަމަށެވެ.
ވެންޓިލޭޓަރު މައްސަލައިގައި ދައުވާކުރުން ލަސްވާތީ އެކަމުގެ ކަންބޮޑުވުން ރައީސް ނަޝީދު ވަނީ މީގެކުރިން ވެސް ފާޅުކުރައްވާފައެވެ.
މީގެއިތުރުން މިދިޔަ އަހަރުގެ ޑިސެމްބަރ މަހުގެ 6 ވަނަ ދުވަހު ބޭއްވި ޖަލްސާގައި ވަނީ ވެންޓިލޭޓަރުތަކުގެ މައްސަލައިގައި ކުރީގެ ހެލްތް މިނިސްޓަރު އަބްދުﷲ އަމީން ގަސްތުގައި މަޖިލީހަށް އޮޅުވާލައްވައިގެން މައުލޫމާތު ދެއްވިކަން ސާބިތުވެފައިވާތީ އަމީންގެ މައްޗަށް ދައުވާކޮށްދިނުމަށް ޕްރޮސެކިޔުޓަރ ޖެނެރަލް އަރިހުގައި އެދުމަށް ރައްޔިތުންގެ މަޖިލީހުން ނިންމާފައެވެ.
ވެންޓިލޭޓަރު މައްސަލައިގައި އޭސީސީން ކުރި ތަހުގީގަށްފަހު ކުރީގެ ހެލްތު މިނިސްޓަރު އަބްދުﷲ އަމީންއާއެކު 11 ބޭފުޅެއްގެ މައްޗަށް ދައުވާކުރަން ޕީޖީގެ އޮފީހަށް ފޮނުވިއެވެ. އެހެންނަމަވެސް ޕީޖީން ނިންމާފައިވަނީ އެކަމުގައި ދައުވާ ކުރެވޭވަރަށް ހެކި ނެތްކަމަށެވެ. އޭސީސީން ދަނީ އެމައްސަލަ އަލުން ބަލަމުންނެވެ. މި މައްސަލައާ ގުޅިގެން ކުރިމަތިވި ފިއްތުންތަކާ ގުޅިގެން އަމީނު ވަނީ މިނިސްޓަރު ކަމުން އިސްތިއުފާ ދެއްވާފައެވެ.
