ލީގު މެދުކަނޑާލަން އެންގީ އެފްއޭއެމާއެކު މަޝްވަރާ ނުކޮށް: ބައްސާމް

ދިރާގު ދިވެހި ޕްރިމިއާ ލީގު މެދުކަނޑާލަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އެންގީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއެކު މަޝްވަރާ ނުކޮށް ކަމަށް އެ އިދާރާގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ދިވެހި ޕްރިމިއާ ލީގު މެދުކަނޑާލަން ނިންމީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު އެޗްޕީއޭއިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ. އެއާއެކު ފުރަތަމަ ޑިވިޝަނުގެ ހުރިހާ ކުލަބަކުން ވަނީ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށާއި، އެހެންކަމުން އަލުން ފަރިތަކުންތައް ފަށައި، ލީގު ފެށުމުގެ ހުއްދަދިނުމަށް ގޮވާލާފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ހޯމަ ދުވަހުގެރޭ ވާހަކަދައްކަވަމުން ބައްސާމް ވިދާޅުވީ ލީގު މެދުކަނޑާލަން އެޗްޕީއޭއިން އެންގިއިރު، އެކަމާ ގުޅޭގޮތުން އެފްއޭއެމާއެކު މަޝްވަރާކޮށްފައި ނުވާ ކަމަށާއި، އަދި މި ނިންމުން ނިންމިއިރު ކުޅިވަރާ ބެހޭ ވަޒީރު އަޙްމަދު މަޙްލޫފާވެސް މަޝްވަރާ ކުރެއްވި ކަމަށް ގަބޫލުފުޅު ނުކުރައްވާ ކަމަށެވެ.

އެހެންކަމުން ލީގު މެދުކަނޑާލަން ނިންމިއިރު، އެޗްޕީއޭއިން އެފްއޭއެމާއެކު މަޝްވަރާކުރި ނަމަ ނުވަތަ ލީގުގެ މެޗުތަކުގައި ކަންތައްތައް ދިޔަ ގޮތް ބެލުމަށްފަހުގައި ފުޓްބޯޅައިގެ ހަރަކާތްތައް ހުއްޓާލަން ނިންމި ނަމަ ވަރަށް އުފާވާނެ ކަމަށްވެސް ބައްސާމް ވިދާޅުވިއެވެ.

ބައްސާމް އިތުރަށް ވިދާޅުވީ ލީގު އަލުން ފެށުމުގެ މަޝްވަރާތައް މިހާރު ކުރިއަށްދާއިރު، ޞިއްޙަތާ ބެހޭ ވަޒީރު އަޙްމަދު ނަސީމުގެ ފަރާތުން ވަރަށް ފުރިހަމައަށް އެއްބާރުލުން ލިބެމުންދާ ކަމަށެވެ. އެގޮތުން ލީގު އަލުން ފެށުމަށް ކުރެވެން ހުރި ހުރިހާ ކަމެއް ކޮށްދެއްވާނެ ކަމުގެ ޔަގީންކަން ޞިއްޙަތާ ބެހޭ ވަޒީރު ދެއްވާފައިވާ ކަމަށްވެސް ވިދާޅުވިއެވެ.

ބައްސާމް ވިދާޅުވީ ލީގު އަލުން ފެށުމަށް އައު އުސޫލުތަކެއް ހުށަހަޅަން އެޗްޕީއޭއިން މިހާރު އަންގާފައިވާ ކަމަށެވެ. އެކަމަކު މީގެ ކުރިންވެސް އެންމެ ފުރަތަމަ ލީގު ފަށަން ވަރަށް ފުރިހަމަ އުސޫލުތަކެއް އެޗްޕީއޭއާ މަޝްވަރާކުރެވިގެން ހެދިއިރު، އެ ފަހަރު އުސޫލުތައް ހަދާފައިވަނީ އެޗްޕީއޭއިން ބޭނުންވި ހުރިހާ ކަމެއް ހިމަނައިގެން ކަމަށާއި، އެހެންކަމުން އަލުން އައު އުސޫލުތަކެއް ހަދާއިރު އިތުރަށް ހިމަނާނެ ކަމެއް އެނގިނުލައްވާ ކަމަށްވެސް ވިދާޅުވިއެވެ.

ކޮވިޑާ ގުޅިގެން ކުއްލި ގޮތަކަށް ދިވެހި ޕްރިމިއާ ލީގުގެ ކުޅުން މެދުކަނޑާލިއިރު، މިހާތަނަށް ލީގުން ކޮވިޑުގެ ކޭހެއް ރިޕޯޓުކޮށްފައެއް ނުވެއެވެ. އެއާއެކު ހެދިފައިވާ އުސޫލުތަކުގެ ދަށުން ލީގުގެ ކުޅުން ކުރިއަށްދަނިކޮށް، އެޗްޕީއޭއިން ނެރުނު އައު އުސޫލުތަކާ ގުޅިގެން ލީގު މެދުކަނޑާލުމަކީ ފުޓްބޯޅައިގެ ގިނަ ބަޔަކަށް ގަބޫލުރަން ދަތިވި ނިންމުމެކެވެ.

ކޮވިޑާ ގުޅިގެން ލީގު މެދުކަނޑާލިއިރު، ގިނަ ދުވަސްތަކެއްގެ މެދުކެނޑުމަކަށްފަހު އަދި ކުޅުންތެރިން ފުޓްބޯޅަ ދަނޑާއި ދުރުގައި އެތައް ދުވަހެއް ހޭދަކުރުމަށްފަހު ރާއްޖޭގެ ފުޓްބޯޅަ ސީޒަން ފެށީ އެޗްޕީއޭގެ އުސޫލުތަކަށް އަމަލުކުރަން ޝަރުތުކޮށް، ހާއްސަ ހުއްދައެއްގެ ދަށުންނެވެ. އެގޮތުން މި ސީޒަނަށް ކުލަބުތަކުން ތައްޔާރުވާން ފެށި ދުވަހުން ފެށިގެން، ލީގު މެދުކަނޑާލުމާ ހަމައަށް ހުރިހާ ކުލަބުތަކުންވެސް އުސޫލުތަކަށް އަމަލުކުރަމުން އައިރު، އެފަދަ ނިންމުމެއް ނިންމުމުން ކުލަބުތަކުންވެސް ވަނީ ކަންބޮޑުވުން ފާޅުކޮށްފައެވެ.

ދިވެހި ޕްރިމިއާ ލީގުގެ ކުޅުން ވަގުތީ ގޮތުން މެދުކަނޑާލިއިރު، އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން ފަށާފައިވަނީ މދިޔަ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ. އަދި ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ.