ނިއުކްލިއާ އެއްބަސްވުމާއި އަލުން ގުޅޭނީ އީރާނުން ނިއުކްލިއާ އުފައްދާ މިންވަރު ދަށްކުރުމުން – ބައިޑެން

އީރާނުގެ ނިއުކްލިއާ އެއްބަސްވުމާ އަލުން ގުޅޭނީ، އެގައުމުން ނިއުކްލިއާ އުފައްދާ މިންވަރު ދަށްކުރުމުން ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.

ބައިޑެން މިހެން ވިދާޅުވިއިރު، އީރާނުން ވަނީ އެގައުމުގެ ނިއުކްލިއާ އެއްބަސްވުމުގައި އެމެރިކާ އަލުން ބައިވެރިވުމަށް ބާރުއެޅުމަށް ޔޫރަޕިއަން ޔޫނިއަންގެ ކިބައިން އެދިފައެވެ.

ބައިޑެން ވިދާޅުވީ އީރާނުން އަންނަނީ ނުރައްކާތެރި މިންވަރަކަށް ޔުރޭނިއަމް އުފައްދަމުން ކަމަށާއި، އެކަމުގެ ބިރު މުޅި ދުނިޔެއަށް އެބައޮތް ކަމަށެވެ. އެހެންކަމުން އީރާނުގެ ނިއުކްލިއާ އެއްބަސްވުމާއި އެމެރިކާއިން އަލުން ގުޅޭނީ، އީރާނުން ނިއުކްލިއާ އުފައްދާ މިންވަރު ދަށްކުރުމުން ކަމަށް ބައިޑަން ވިދާޅުވިއެވެ.

ބައިޑަން އިތުރަށް ވިދާޅުވީ ނިއުކްލިއާ އެއްބަސްވުމާއި އެންމެ ފުރަތަމަ ހިލާފުވީ އީރާނުން ކަމަށާއި، އެގޮތުން އީރާނުން ވަނީ އެއްބަސްވުމުގައިވާ މިންވަރަށްވުރެ އިތުރަށް ނިއުކްލިއާ އުފައްދައިފައި ކަމަށެވެ.

އީރާނުގެ ނިއުކްލިޔާ އެއްބަސްވުމަކީ އީރާނުގެ ނިއުކްލިޔާ މައްސަލަ ހައްލުކުރުމަށްޓަކައި އެމެރިކާ، އިނގިރޭސިވިލާތް، ފަރަންސޭސިވިލާތް، ޖަރުމަނު، ޗައިނާ، ރަޝިޔާ މި 6 ގައުމާއެކު 2015 ވަނަ އަހަރު އީރާނުން ސޮއިކުރި އެއްބަސްވުމެކެވެ. މިއެއްބަސްވުމަށް އަމަލުކުރަން ފެށުމާއެކު އެމެރިކާވަނީ އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވައިލާފައެވެ. އެހެންނަމަވެސް 2016 ވަނަ އަހަރު އެމެރިކާގެ ކުރީގެ ރައީސް ޑޮނާލްޑް ޓްރަމްޕް ވަނީ އެ އެއްބަސްވުމާ ޚިލާފަށް އީރާނާ ދެކޮޅަށް ހަރުކަށި ފިޔަވަޅުތަކެއް އަޅާފައެވެ.

އީރާނުގެ ނިއުކްލިޔާ އެއްބަސްވުމުން އެމެރިކާއިން ވަކިވެ އީރާނާ ދެކޮޅަށް ހަރުކަށި ފިޔަވަޅުތަކެއް އަޅާފައިވާއިރު، މި ހައްގުތައް އަނބުރާ ހޯދުމަށް އެދި އީރާނުން ވަނީ މީގެ ކުރިންވެސް ޔޫރަޕްގެ ބޮޑު ތިން ބާރު ކަމަށްވާ ޖަރުމަނާއި، ފްރާންސް އަދި އިނގިރޭސިވިލާތުގެ ކިބައިން އެދިފައެވެ.