ގިނަ ދުވަސްތަކެއްގެ މެދުކެނޑުމަކަށްފަހު މާލޭގައި ފުޓްބޯޅަ ހަރަކާތްތައް ފެށިގެންދިޔައީ މިދިޔަ އަހަރުގެ ފަހުކޮޅުއެވެ. ކޮވިޑް-19 އާއެކު ކުޅިވަރުގައި ހަރަކާތްތެރިވަމުން އަންނަ އެތައް ބަޔަކަށް ބޮޑު ގެއްލުންތަކެއް ލިބުނުއިރު، ދިވެހި ފުޓްބޯޅަ ސީޒަން ފެށިގެންދިޔުމަކީ އެތައް ބަޔަކަށް ލިބިގެންދިޔަ ހިތްހަމަޖެހުމެކެވެ.

އެއާއެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މި ހާލަތުގައި ފުޓްބޯޅަ ހަރަކާތްތައް ރައްކާތެރިކަމާއެކު ކުރިއަށްގެންދިޔުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އާ ގުޅިގެން ހާއްސަ އުސޫލުތަކެއް އެކުލަވާލިއެވެ. އެގޮތުން މިދިޔަ އަހަރުގެ އޮކްޓޯބަރު ފުރަތަމަ ޑިވިޝަނުގެ ކުލަބުތަކަށް ފަރިތަކުރުންތައް ފެށުމުގެ ހުއްދަ ދީފައިވަނީ ހާއްސަ އުސޫލުތަކަކަށް އަމަލުކުރުމަށް އެންގުމަށްފަހުއެވެ. އަދި އޭގެ ފަހުން އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން ފަށާފައިވަނީ މދިޔަ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިރާގު ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ.

ނަމަވެސް ފުޓްބޯޅައިގައި އުޅޭ ގިނަ ބަޔަކަށް މާޔޫސްކަމެއް އަނެއްކާވެސް ގެނުވި ނިންމުމަކީ ކުއްލި ގޮތަކަށް މި މަހުގެ ތިންވަނަ ދުވަހު ލީގުގެ ކުޅުން މެދުކަނޑާލަން ނިންމުމުންނެވެ. މިހާތަނަށް ލީގުގައި ޖުމްލަ 34 މެޗު ކުޅެފައިވީ ނަމަވެސް، ލީގުގެ ދެވަނަ ބުރުގެ ތެރެއިން ފުޓްބޯޅަ ހުއްޓާލަން ޖެހުނީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު އެޗްޕީއޭއިން ނެރުނު އައު އުސޫލުތަކާ ގުޅިގެންނެވެ.

އެއާއެކު އަނެއްކާވެސް ފުޓްބޯޅަ ކުޅުންތެރިންނާއި ކޯޗުންނަށް މި ވަނީ މާޔޫސްކަން ގެނުވާފައެވެ. ދިވެހި ޕްރިމިއާ ލީގަކީ ހަމައެކަނި ކުޅޭ ކުޅިވަރެއް ނޫން ކަމަށާއި، މިއީ ކުލަބުތަކުން ވިޔަފާރި އުސޫލުން ކުރަމުންދާ ކަމަކަށްވާއިރު، ކުލަބުތަކަށް އަނެއްކާވެސް މި ވަނީ މާލީ ދަތިކަމާ ކުރިމަތިލާން ޖެހިފައެވެ.

"ރާއްޖެޓީވީ" އަށް ދިން އިންޓަވިއުއެއްގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުގެ ބޯޑް މެންބަރު އަދި މީޑިއާ އޮފިޝަލް ހަސަން ޝިފާން ބުނީ ލީގު މެދުކަނޑާލަން ނިންމުމާއެކު ފުރަތަމަ ޑިވިޝަނުގެ ކުލަބުތަކުގެ ތެރެއިން އެންމެ ބޮޑު އެއް އަސަރެއް ކުރާނެ އެއް ކުލަބަކީ މާޒިޔާ ކަމަށެވެ. އެގޮތުން ކޮވިޑާ ގުޅިގެން މިދިޔަ އަހަރުގެ އޭއެފްސީ ކަޕް ކެންސަލް ކުރުމުންވެސް މާޒިޔާއަށް މާލީ ގޮތުން ވަރަށް ބޮޑު ގެއްލުމެއް ލިބުނު ކަމަށާއި، އެކަމުން އެއްކޮށް އަރައިނުގެނެވީސް ލީގު އަނެއްކާވެސް މެދުކަނޑާލުމަކީ ކުލަަބަށް ލިބޭ ވަރަށް ބޮޑު ގެއްލުމެއް ކަމަށްވެސް ބުންޏެވެ. އެހެންކަމުން މި ދަނޑިވަޅުގައި ފުޓްބޯޅަ އެއްކޮށް ހުއްޓާލުމުގެ ބަދަލުގައި ކުލަބުތަކަށް ކުޑަމިނުން ފަރިތަކުރުންތައް ކުރިއަށް ގެންދިޔުމުގެ ހުއްދަދިނުމަށްވެސް ޝިފާން ވަނީ އެދިފައެވެ.

ލީގު މެދުކަނޑާލުމާ ގުޅިގެން ކަންބޮޑުވުން ފާޅުކޮށް ކުލަބު އީގަލްސްގެ ކޯޗު މުޙައްމަދު ޝާޒްލީ (ޝާޒް) ބުނީ ކުއްލި ގޮތަކަށް ލީގު މެދުކަނޑާލަން ނިންމުމަކީ ސުވާލުތަކެއް އުފެދޭ ކަމެއް ކަމަށެވެ. އެގޮތުން މިހާތަނަށް ލީގު ކުޅެމުން އައީ އެޗްޕީއޭގެ އުސޫލުތަކާ އެއްގޮތަށް ކަމަށާއި، މި ކަމުގެ ސަބަބުން ކުޅުންތެރިންނާއި ކޯޗުންނަށް ވަރަށް ބޮޑު ގެއްލުމެއް ލިބިގެންދާނެ ކަމަށްވެސް ބުންޏެވެ.

ޝާޒްލީ އިތުރަށް ބުނީ ފުޓްބޯޅައަކީ އެހެން މީހުންނެކޭ އެއްފަދައިން ކުޅުންތެރިންނާއި ކޯޗުންވެސް އާމްދަނީ ހޯދަން ކުރަމުން އަންނަ މަސައްކަތެއް ކަމަށެވެ. އަދި މީގެ ކުރިންވެސް ކޮވިޑާ ގުޅިގެން އެހެން ކަންކަމަށް ލުއިދިންއިރު، ފުޓްބޯޅައަށް ފުރުސަތު ދީފައިވަނީ ވަރަށް ފަހުން ކަމަށާއި، އެންމެ ފުރަތަމަ މަރުހަލާގައި ދިވެހި ޕްރިމިއާ ލީގު ހުއްޓާލުމަކީ ވަރަށް ދެރަ ކަމެއް ކަމަށްވެސް ވަނީ ބުނެފައެވެ.

މީގެ އިތުރުން "ރާއްޖެޓީވީ" އާ ވާހަކަދައްކަމުން ޓީސީ ސްޕޯޓްސް ކުލަބުގެ މެނޭޖުމަންޓުގައި ހިމެނޭ މުޙައްމަދު އީސަ (މޯ) ބުނީ ކުއްލި ގޮތަކަށް ލީގު މެދުކަނޑާލަން ނިންމުމަކީ ހައިރާންކަމެއް ގެނުވި ނިންމުމެއް ކަމަށެވެ. އެގޮތުން ލީގު މެދުކަނޑާލަން ނިންމި ދުވަހުވެސް ދެ މެޗެއް ކުޅުމަށް ތާވަލުކޮށްފައި އޮތް ކަމަށާއި، އެ ދެ މެޗަށް ޓީމުތަކުން ތައްޔާރުވެފައި ވަނިކޮށް ކުއްލި ގޮތަކަށް ލީގު މެދުކަނޑާލުމަކީ ގަބޫލުކުރެވޭނެ ނިންމުމެއް ނޫން ކަމަށެވެ. އަދި މިހާތަނަށްވެސް ލީގުގެ ކުޅުން ކުރިއަށްދިޔައީ އެޗްޕީއޭގެ އުސުލޫތަކާ އެއްގޮތަށް ކަމަށާއި، ދެންވެސް އެޗްޕީއޭއިން ކަނޑައަޅާ އުސޫލުތަކަކަށް ޓީމުތަކުން ބޯލަނބާނެ ކަމުގެ ފުރިހަމަ ޔަގީންކަން އެބައޮތް ކަމަށްވެސް މޯ ބުންޏެވެ.

ލީގު މެދުކަނޑާލުމާއެކު ފުރަތަމަ ޑިވިޝަނުގެ ގިނަ ކުލަބުތަކުން މިހާތަނަށް ކަންބޮޑުވުން ފާޅުކޮށްފައިވާއިރު، ޔުނައިޓެޑް ވިކްޓަރީ (ޔޫވީ) ގެ ކޯޗު އިހުސާން އަބްދުލް ޣަނީ (ސާންތި) ބުނީ މިފަދަ ނިންމުމެއް ނިންމާއިރު، މިއީ ގިނަ ކުޅުންތެރިންތަކެއްގެ އާމްދަނީއާ ގުޅިފައިވާ ނިންމުމެއް ކަމަށެވެ. އަދި އެފްއޭއެމުން ކަނޑައަޅާފައިވާ އުސޫލުތަކުގެ ދަށުން މިހާތަނަށްވެސް ލީގުގެ ކަންކަން އައީ ވަރަށް ރަނގަޅަށް ބެލެހެއްޓިގެން ކަމަށާއި، އެހެން އެކަން އޮއްވައި ކުއްލި ގޮތަކަށް ލީގު މެދުކަނޑާލަން ނިންމުމުން އެކަން ގަބޫލުރަންވެސް ދަތިވި ކަމަށްވެސް ބުންޏެވެ.

ކޮވިޑާ ގުޅިގެން ކުއްލި ގޮތަކަށް ދިވެހި ޕްރިމިއާ ލީގުގެ ކުޅުން މެދުކަނޑާލިއިރު، މިހާތަނަށް ލީގުން ކޮވިޑުގެ ކޭހެއް ރިޕޯޓުކޮށްފައެއް ނުވެއެވެ. އެއާއެކު ހެދިފައިވާ އުސޫލުތަކުގެ ދަށުން ލީގުގެ ކުޅުން ކުރިއަށްދަނިކޮށް، އެޗްޕީއޭއިން ނެރުނު އައު އުސޫލުތަކާ ގުޅިގެން ލީގު މެދުކަނޑާލުމަކީ ފުޓްބޯޅައިގެ ގިނަ ބަޔަކަށް ގަބޫލުރަން ދަތިވި ނިންމުމެކެވެ.

އެއާއެކު ފުރަތަމަ ޑިވިޝަނުގެ އެކި ކުލަބުތަކުން ވަނީ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށް ބުނެ، އަލުން ފަރިތަކުންތައް ފަށައި، ލީގު ފެށުމުގެ ހުއްދަދިނުމަށް އެދި ނޫސްބަޔާންތައް ނެރެފައެވެ.

ކޮވިޑާ ގުޅިގެން އެންމެ އަށް ޓީމު ހިމެނޭ ދިވެހި ޕްރިމިއާ ލީގުގެ ކުޅުން މެދުކަނޑާލިއިރު، ކޮވިޑުގެ ނުރައްކާ ބޮޑުވެފައިވާ ޔޫރަޕުގެ ބޮޑެތި ގައުމުތަކުގައިވެސް އަންނަނީ ހާއްސަ އުސޫލުތަކެއްގެ ދަށުން ފުޓްބޯޅަ ލީގުތައް ކުރިއަށް ގެންދަމުންނެވެ. އަދި ދިވެހި ޕްރިމިއާ ލީގަކީ ކުލަބުތަކުން މިލިޔަނުން ޚަރަދުކުރާ ލީގަކަށްވާއިރު، ހާއްސަ އުސޫލުތަކެއްގެ ދަށުން މި ރާއްޖޭގައިވެސް ލީގު ކުރިއަށް ނުގެންދެވޭނެ އެއްވެސް ސަބަބެއް ނެތެވެ.