ފްރާންސްގައި ކޮވިޑް ޖެހޭ މީހުންގެ އަދަދުތައް ދަށަށްދާން ފަށައިފި

ފްރާންސްގައި ކޮވިޑް-19 ޖެހޭ މީހުންގެ އަދަދުތައް ދަށަށްދާން ފަށައިފިކަމަށް އެގައުމުގެ ހެލްތު މިނިސްޓްރީން ބުނެފިއެވެ.

ފްރާންސްގެ ހެލްތު މިނިސްޓްރީން ބުނީ ހޯމަ ދުވަހު 19،175 މީހަކަށް ކޮވިޑް-19 ޖެހިފައިވާކަމަށެވެ. އޭގެކުރީ ދުވަހު ވައިރަސް ޖެހިގެން ރިޕޯޓްކޮށްފައިވަނީ 20،586 މީހުންނަށެވެ. އެގައުމުގެ ހެލްތު މިނިސްޓްރީން ބުނާ ގޮތުގައި ކޭސްތައް ދަށަށްދާތާ ޖެހިޖެހިގެން ހަތަރު ދުވަސް ވަނީ ވެފައެވެ.

އެހެންނަމަވެސް ވައިރަސް ޖެހިގެން ހޮސްޕިޓަލްތަކުގައި އެޑްމިޓްކޮށްގެން ފަރުވާ ދޭ މީހުންގެ އަދަދު ހޯމަ ދުވަހު ވަނީ އިތުރުވެފައެވެ. އެގޮތުން 27،694 މީހަކަށް ހޮސްޕިޓަލްގައި ފަރުވާ ދެމުން އަންނައިރު އޭގެކުރީ ދުވަހު 27،369 މީހަކަށް ވަނީ ފަރުވާ ދެމުންގޮސްފައެވެ. މީގެއިތުރުން އައިސީޔޫތަކުގައި ފަރުވާ ދެމުން އަންނަ މީހުން ވެސް ވަނީ އިތުރުވެފައެވެ. އެގޮތުން ހޯމަ ދުވަހު 3272 މީހަކަށް ވަނީ އައިސީޔޫތަކުގައި ފަރުވާ ދެމުން ގެންގޮސްފައެވެ.

ފްރާންސްގައި ކޭސްތައް އިތުރުވަމުން ދިޔުމާއެކު އެގައުމުގެ ސިއްޙީ މާހިރުން ވަނީ ތިން ވަނަ ފަހަރަށް ފްރާންސް ލޮކްޑައުން ކުރުމަށް ސަރުކާރަށް ގޮވައިލާފައެވެ. ނަމަވެސް ސަރުކާރުން އަންނަނީ ލޮކްޑައުން އަކަށް ނުގޮސް ވައިރަސް ފެތުރުން ކޮންޓްރޯލްކުރުމަށް އިތުރު ފިޔަވަޅުތަކެއް އަޅަމުންނެވެ. އެގޮތުން ކާފިއު ހިންގުމާއި ގައުމަށް އެތެރެވާ މީހުންނާމެދު އަމަލުކުރާ ގޮތްތަކަށް ވަނީ ބަދަލުތަކެއް ގެނެސްފައެވެ.

ފްރާންސްގެ ޑޮކްޓަރުން ވަނީ އިނގިރޭސިވިލާތުން ފެނިފައިވާ އައު ވޭރިއަންޓްގެ ސަބަބުން ކޭސްތައް އިތުރުވަމުންދާތީ އެކަމުގެ ކަންބޮޑުވުން ފާޅުކޮށްފައެވެ.

މިހާރު މިފެންނަ ކޭސްތަކުގެ އަސްލަކީ އައު ވޭރިއަންޓްކަމަށް އެގައުމުގެ ސިއްޙީ މާހިރުން ބުނެއެވެ.