ކޮވިޑް-19ގެ ކޭސްތައް އިތުރުވަމުންދާއިރު، ރާއްޖޭގެ އެކި ހިސާބުތަކުގައި 207 މީހަކަށް ކޮވިޑް ފެސިލިޓީތަކުގައި އެޑްމިޓްކޮށްގެން ފަރުވާ ދެމުންދާ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ)ން ބުނެފިއެވެ.

އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ.ނަޒްލާ ރަފީގު ވިދާޅުވީ ކޭސްތައް އިތުރުވަމުންދާއިރު، ހޮސްޕިޓަލްގައި އެޑްމިޓް ކުރަމުންދާ މީހުންގެ އަދަދުތައް ގިނަވަމުންދާ ކަމަށެވެ.

އެގޮތުން ޑީއެޗް11ގައި ދެމީހަކަށް ފަރުވާ ދެމުންދާއިރު، އޭގެ ތެރެއިން އެކަކު އޮތީ ވެންޓިލޭޓަރުގައި ކަމަށް ޑރ.ނަޒްލާ ވިދާޅުވިއެވެ. އަދި ވިދާޅުވީ ދަރުމަވަންތަ ހޮސްޕިޓަލްގެ 16 ވަނަ ފްލޯގައި 7 މީހަކަށް ފަރުވާ ދެމުންދާ ކަމަށެވެ.

ހުޅުމާލެ މެޑިކަލް ފެސިލިޓީގައި 189 މީހަކު އެޑްމިޓް ކުރެވި ފަރުވާ ދެމުންދާކަން ފާހަގަކުރައްވައި ޑރ.ނަޒްލާ ވިދާޅުވި އަތޮޅުތެރޭގެ ފެސިލީޓީތަކަށް ބަލާއިރު ގއ.ވިލިނގިލީ ކޮވިޑް ފެސިލިޓީގައި އެކަކު އަދި ލ.ގަން ކޮވިޑް ފެސިލިޓީގައި 8 މީހަކު އެޑްމިޓްކޮށްގެން ފަރުވާ ދެމުންދާ ކަމަށެވެ.

އެހެންކަމުން ޖުމްލަ މިވަގުތު ރާއްޖޭގެ އެކި ހިސާބުތަކުގައި 207 މީހަކު ކޮވިޑް ފެސިލިޓީތަކުގައި އެޑްމިޓްކޮށްގެން ފަރުވާ ދެމުންދާ ކަމަށް ޑރ.ނަޒްލާ ވިދާޅުވިއެވެ.

މީގެ އިތުރުން ޑރ.ނަޒްލާ ވިދާޅުވީ ފްލޫ ކްލިނިކްތަކަށް ބަލާއިރު ރާއްޖޭގެ އެކި ހިސާބުތަކުން ވޭތުވެދިޔަ 24 ގަޑިއިރު 141 ސާމްޕަލް ނެގިފައިވާ ކަމަށެވެ.

މާލެ ސިޓީގެ އިތުރުން އަތޮޅުތެރެއިން ވެސް ކޭސްތައް ވަނީ ފެނިފައެވެ. އެގޮތުން މިހާރު މޮނިޓަރިންގެ ހާލަތުގައި އޮތީ މ. ކޮޅުފުށި، ގދ.ތިނަދޫ އަދި އައްޑޫ ސިޓީ އެވެ.