ބ. އަނަންތަރާ ކިހަވަށް ރިސޯޓުގައި މަސައްކަތް ކުރާ ގިނަ މުވައްޒަފުންތަކެއް ކޮވިޑް-19ށް ޕޮޒިޓިވްވުމާއި ގުޅިގެން ވަގުތީ ގޮތުން އެރިސޯޓު ބަންދުކޮށްފިއެވެ.

ފުރާ ފަތުރުވެރިން ފިޔަވައި އެ ރިސޯޓުން އިތުރު އެއްވެސް މީހަކު ނުފޭބުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ އެ ރިސޯޓަށް އަންގާފަ އެވެ.

އަނަންތަރާ ކިހަވަށް ރިސޯޓުން މިހާތަނަށް 86 މީހަކު ޕޮޒިޓިވްވެފައިވެއެވެ.

އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ހެލްތް އިމަރޖެންސީ އޮޕަރޭޝަންސް ސެންޓަރުގެ ތަރުޖަމާނު ޑރ.ނަޒްލާ ރަފީގު ވިދާޅުވީ މިހާތަނަށް 86 މީހަކު ޕޮޒިޓިވްވެފައިވާއިރު، ހޮނިހިރު ދުވަހު 4 މީހުން، އާދިއްތަ ދުވަހު ދެ މީހަކު ޕޮޒިޓިވްވި ކަަމަށެވެ.

ޑރ.ނަޒްލާ ވިދާޅުވީ އެރިސޯޓުން ގިނައިން ޕޮޒިޓިވްވެފައިވަނީ މުވައްޒަފުން ކަމަށާއި، ކޮންޓެކްޓުންގެ ގޮތުގައި ފާހަގަކުރެވުނު 142 މީހުންނަކީ ވެސް މުވައްޒަފުން ކަމަށެވެ. އަދި އިތުރަށް ބަލަން ޖެހޭ ކަންކަން ޓޫރިޒަމް މިނިސްޓްރީއާ ގުޅިގެން ބަލަމުންދާ ކަމަށް ޑރ.ނަޒްލާ ވިދާޅުވިއެވެ.

ރާއްޖޭގެ ކޮވިޑްގެ ހާލަތަށް ބަލާއިރު، ރިސޯޓުތަކުން ފެންނަ ކޭސްތައް ދަނީ އިތުރުވަމުންނެއެވެ. އަދި ރިސޯޓުތަކުން ގިނަ ކޭސްތައް ފެންނަމުންދާތީ އެޗްއީއޯސީން ކަންބޮޑުވުންފާޅުކޮށްފައިވެއެވެ.

އެޗްއީއޯސީން ބުނެފައިވަނީ ބަލީގެ އަލާމަތްތައް ހުންނަ މީހުން ތިބި ނަމަވެސް ބައެއް ރިސޯޓުތަކުގައި ޓެސްޓުނުކުރާ ކަމަށެވެ. މާލެއިން ބައެއް ރިސޯޓުތަކަށް މަސައްކަތް ކުރުމަށްދާ މުވައްޒަފުން ކަރަންޓީން ވާން ޖެހޭއިރު، ކަރަންޓީންގެ މުއްދަތު ހަމަނުކޮށް ވަޒީފާއަށް ނުކުންނަމުންދާކަން ފާހަގަކުރެވިފައިވާ ކަމަށެވެ. އަދި ބައެއް ރިސޯޓުތަކުގައި މުވައްޒަފުން އުޅޭ ސަރަހައްދުގައި މާސްކް އެޅުމާއި، ސޯޝަލް ޑިސްޓެންސްއަށް ނުބަލައި ވަރަށް ބޮޑަށް ފަރުވާކުޑަކުރަމުންދާ ކަމަށް އެޗްއީއޯސީން ބުނެއެވެ.

ކުޑަކުޑަ ކަމަކަށް ފަރުވާ ކުޑަކުރެވުނު ކަމުގައިވީ ނަމަވެސް ބަލި ވަރަށް ބޮޑަށް ފެތުރިގެން ހިނގައިދާނެ ކަމަށާއި، ގައިޑްލައިންތަކާ އެއްގޮތަށް އަމަލުކުރުމަށް އެޗްއީއޯސީން އިލްތިމާސްކޮށްފައިވެއެވެ.

ކޮވިޑް-19 އިން ރައްކާތެރިވުމަށް އެޅި ފިޔަވަޅުތަކުގެ ތެރެއިން، ރާއްޖޭގެ ބޯޑަރު، ގާތްގަނޑަކަށް ހަތަރު މަސް ދުވަހަށް ބަންދު ކުރުމަށް ފަހު އަލުން ހުޅުވައިލީ 15 ޖުލައި 2020 ގައެވެ.