އެގްރޯ ނެޝަނަލް ކޯޕަރޭޝަން (އެގްރޯނެޓްގެ) އަމާޒަކީ ރާއްޖޭގެ ދަނޑުވެރިކަމުގެ ސިނާއަތުގެ ކޮންޓްރޯލް ބިދޭސީން އަތުން ނަގައި، މިއީ ދިވެހި ދަނޑުވެރިންގެ މަސައްކަތަކަށް ހެދުން ކަމަށް އެ ކުންފުނީގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވެއްޖެއެވެ.

އާދިއްތަ ދުވަހުގެރޭ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން އެގްރޯނެޓްގެ މެނޭޖިންގ ޑިރެކްޓަރ ހާރޫން ރަޝީދުގެ އިތުރުން، މިނިސްޓްރީ އޮފް ފިޝަރީޒް، މެރީން ރިސޯސަސް އެންޑް އެގްރިކަލްޗަރ ގެ ޑިރެކްޓަރ ޖެނެރަލް އިބްރާހިމް ޝަބާޢު ވަނީ ދަނޑުވެރިކަމުގެ ސިޔާސަތާއި ދަނޑުވެރިކަން ކުރިއެރުވުމަށް ކުރެވޭ މަސައްކަތްތަކާ ގުޅޭގޮތުން ވާހަކަ ދައްކަވާފައެވެ.

ޕްރޮގްރާމްގައި ދެއްކެވި ވާހަކައިގައި ހާރޫން ވަނީ އެގްރޯ ނޭޝަނަލް ކޯޕަރޭޝަން މެދުވެރިކޮށް ރާއްޖޭގެ ދަނޑުވެރިކަން އިތުރަށް ފުޅާ ކުރުމަށް ކުރެވިފައިވާ މަސައްކަތްތަކަށް އަލިއަޅުވާލައްވާފައެވެ. ހާރޫން ވިދާޅުވީ، ދަނޑުވެރިންގެ އުފެއްދުންތައް ނުވިއްކި ދިއުމުގެ ސަބަބުން ކޮވިޑުގެ ޙާލަތުގައިވެސް ބޮޑެތި ގޮންޖެހުންތަކެއް ކުރިމަތިވި ކަމަށާއި، އެގްރޯނެޓުގެ މައިގަނޑު މަޤްސަދަކަށްވީވެސް އެކަމުން އަރައިގަތުމަށް ދަނޑުވެރިންނަށް އެހީތެރިކަން ފޯރުކޮށްދިނުން ކަމަށެވެ.

މި މަސައްކަތުގައި ހުރި ގޮންޖެހުންތަކަށް އަލިއަޅުވާލައްވާ ހާރޫން ވިދާޅުވީ، މި މަސައްކަތް ފެށިއިރު، މުޅި ސިނާއަތް ކޮންޓްރޯލް ކުރަމުން ދިޔައީ ބިދޭސީން ކަމަށެވެ. އަދި ކޯޕަރޭޝަން އައުމަށްފަހު ވިސްނުމަކަށްވީ ސީދާ ދަނޑުވެރިންނާ ގުޅިގެން، އެތަކެތި ގަނެ މާރކެޓު ކުރާނެ ބަޔަކީ ކުންފުނިކަމަށް ހެދުން ކަމަށެވެ. އޭގެ ނަތީޖާއެއްގެ ގޮތުން ދަނޑުވެރިން އުފައްދާ ތަކެތި ގަނެ، ލޯކަލް މާރކެޓުތަކާ ހިސާބަށް ގެނައުމުގައި ކުރަންޖެހޭ މަސައްކަތްތައް ބިދޭސީންގެ ކޮންޓްރޯލްގެ ދަށުން ގެނެވޭނެކަން ހާރޫން ފާހަގަ ކުރެއްވިއެވެ.

މި މައުޟޫއަށް ވާހަކަ ދައްކަވަމުން އިބްރާހިމް ޝަބާއު ވިދާޅުވީ، ވާދަވެރި ދަނޑުވެރިކަމުގެ މާހައުލެއް އުފެއްދުމުގައިވެސް އެގްރޯނެޓުގެ ދައުރު ވަރަށް މުހިއްމު ކަމަށެވެ. އަދި އެކަމަށްޓަކައި ބޭނުންވާ ފަންނީ އަދި ވަސީލަތުގެ އެހީއާއި، ބޭރުގެ އެހީ ފޯރުކޮށްދިނުމުގައި ސަރުކާރުގެ އިސް ދައުރެއް އޮންނާނެކަން ފާހަގަ ކުރައްވައި ޝަބާއު ވިދާޅުވީ، އެ މަސައްކަތްތައް މިހާރު މިނިސްޓްރީންވެސް ކުރަމުންދާ ކަމަށެވެ.

ދަނޑުވެރިކަން ތަރައްގީ ކުރުމަށާއި ދަނޑުވެރިން އުފައްދާ ތަކެތި މާކެޓް ކުރުމަށް ސަރުކާރުން އުފައްދަވާފައިވާ އެގްރޯ ނޭޝަނަލް ކޯޕަރޭޝަންގެ މަސައްކަތްތައް ރާއްޖޭގެ އެކި ސަރަހައްދުތަކުގައި ކުރިއަށްދާއިރު، ދަނޑުވެރިން ހައްދާ ތަކެތިން ބޮޑު މާކެޓެއް އުފައްދައި ދެއަހަރު ތެރޭގައި ރައްޔިތުންނަށް ވީހާވެސް ބޮޑަށް އޭގެ މަންފާ ލިބިގެންދާނެކަމަށް ހާރޫން ވިދާޅުވެފައިވެއެވެ.

ދަނޑުވެރިންނަށް ހުރި އެންމެބޮޑު ގޮންޖެހުމަކީ، ދަނޑުވެރިން އުފައްދާ ތަކެތި މާކެޓް ނުކުރެވުމާއި، އިތުރަށް ތަރައްގީ ކުރުމަށް ބޭނުންވާ ވަސީލަތްތައް ނުލިބުން ކަމަށް ގިނަ ދަނޑުވެރިން ބުނެއެވެ. ދަނޑުވެރިންނަށް އެހީތެރިކަން ފޯރުކޮށް ދިނުމަށާއި އަދި ދަނޑުވެރިކަމުގެ ސިނާއަތު ކުރިއެރުވުމަށް މި ސަރުކާރުން އެގްރޯ ނޭޝަނަލް ކޯޕަރޭޝަން ނަމުގައި ކުންފުންޏެއް އުފެއްދީ މި އަހަރުގެ އޭޕްރީލް މަހުގެ 21 ވަނަ ދުވަހުއެވެ.