ކޮވިޑް-19ގެ ކޭސްތައް ގިނަވި ކަމުގައިވީ ނަމަވެސް ސްކޫލުތަކުގެ ހާޒިރީ 80 އިންސައްތައިގައި އުޅޭ ކަމަށް އެޑިޔުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެ އެވެ.

ކޮވިޑް-19އާ ގުޅިގެން މާލެ ސަރަހައްދުގެ ސްކޫލުތަކާއި، އަތޮޅުތެރޭގެ ސްކޫލުތަކުގައި ބަލިން ރައްކާތެރިވުމަށް ގިނަ ފިޔަވަޅުތައް ވަނީ އަޅާފައެވެ. އެގޮތުން ދަރިވަރު ސްކޫލަށް ދިއުމުން ހުން ޗެކް ކުރުމާއި، އަތް ދޮވުމުގެ އިތުރުން އިޖުތިމާއީ ގައިދުރު ކަމަށް ޚާއްސަ ސަމާލުކަމެއް ދެއެވެ. އަދި މާސްކް އެޅުންވެސް މަޖުބޫރު ކޮށްފައިވާއިރު، މިކަންކަން ސްކޫލުތަކުގައި ތަންފީޒު ކުރަމުންދެއެވެ.

ކޮވިޑް-19ގެ ކޭސްތައް އިތުރުވަމުންދާތީ ސްކޫލުތަކުގެ ހާލަތާއިބެހޭ ގޮތުން ސަންގު ޓީވީގައި ވާހަކަދައްކަވަމުން މިނިސްޓަރު އައިޝަތު އަލީ ވިދާޅުވީ ކޮވިޑް-19ގެ ކޭސްތައް އިތުރު ނަމަވެސް ސްކޫލުތަކުގެ ހާޒިރީ ރަނގަޅު ކަމަށާއި، ގިނަ ދަރިވަރުން ސްކޫލަށް ދާ ކަމަށެވެ. އަދި ސްކޫލުތަކުގެ ހާޒިރީ 80 އިންސައްތާގައި އުޅޭކަން މިނިސްޓަރު ފާހަގަކުރެއްވިއެވެ.

މީގެ އިތުރުން މިނިސްޓަރު ވިދާޅުވީ ސްކޫލުތަކުގައި އަޅާފައިވާ ފިޔަވަޅުތަކާއި އެއްގޮތަށް އަމަލު ކުރަމުންދޭތޯ މޮނިޓަރ ކުރުމުގެ މަސައްކަތްތައް ކުރިއަށްދާ ކަމަށެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންއާއި އެއްގޮތަށް ސްކޫލުތަކުގައި ކިޔަވައިދެމުންދާއިރު، ބައެއް ސްކޫލުތަކުގެ ދަރިވަރުންނާއި، ޓީޗަރުން ޕޮޒިޓިވްވެފައިވެއެވެ. ނަމަވެސް ރައްކާތެރިކަމުގެ ފިޔަވަޅުތަކާއެކު ކިޔަވައިދިނުމުގެ ކަންކަން ކުރިއަށްދާތީ އެއްވެސް ސްކޫލެއްގައި މިހާތަނަށް ގިނަ އަދަދެއްގެ ދަރިވަރުންނާއި ޓީޗަރުން ބައްޔަށް ހުށަހެޅިގެން ނުދާ ކަމަށް އެޑިޔުކޭޝަން މިނިސްޓްރީން ބުނެއެވެ.

މިހާލަތުގައި ޗީޓަރުންގެ ފަރާތުން ލިބޭ އެއްބާރުމުގެ އިތުރުން ބެލެވެރިންގެ ފަރާތުން ލިބޭ އެއްބާރުލުން އެމިނިސްޓްރީން ފާހަގަކުރެއެވެ. އަދި ކުރިއަށް އޮތްތަނުގައި ވެސް ކިޔަވައިދިނުމުގެ އެންމެހައި ކަންކަން ކުރިއަށް ގެންދާނީ ޓީޗަރުންނާއި، ބެލެނިވެރިންގެ މަޝްވަރާގެ ތެރެއިން ކަމަށާއި، ޚާއްސަ ސަމާލުކަމެއް ދޭނީ ދަރިވަރުންގެ ސިއްހަތަށްކަމަށް އެޑިއުކޭޝަން މިނިސްޓްރީން ބުނެއެވެ.

ޕްރީ ސްކޫލުތައް ފިޔަވައި ހުރިހާ ގްރޭޑެއްގެ ކިޔެވުން ކުރިއަށް ގެންދަނީ ސްކޫލުތަކަށް ހާޒިރުކޮށްގެންނެވެ. ސްކޫލުތައް ބަންދު ނުކުރި ނަމަވެސް ޔުނިވަރސިޓީއާއި ކޮލެޖުތަކުގެ ކިޔެވުން ކުރިއަށް އޮތް ދެހަފްތާގައި އޮންލައިންކޮށް ކުރިއަށް ގެންދިއުމަށް ވަނީ ނިންމާފައެވެ.