ލީގު އަލުން ފެށުމުގެ ހުއްދަދިނުމަށް ކުލަބުތަކުން ގޮވާލައިފި

ދިރާގު ދިވެހި ޕްރިމިއާ ލީގު މެދުކަނޑާލުމުން ކުލަބުތަކާއި ކުޅުންތެރިންނަށް ބޮޑު ގެއްލުމަކާ ކުރިމަތިލާން ޖެހޭނެ ކަމަށާއި، އެހެންކަމުން އަލުން ފަރިތަކުންތައް ފަށައި، ލީގު ފެށުމުގެ ހުއްދަދިނުމަށް ފުރަތަމަ ޑިވިޝަނުގެ ކުލަބުތަކުން ގޮވާލައިފިއެވެ.

ދިވެހި ޕްރިމިއާ ލީގު މެދުކަނޑާލަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމީ ކޮވިޑް-19 ގެ ކޭސްތައް މާލެ ސިޓީގައި އިތުރުވުމާއެކު ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެން މި މަހުގެ ތިންވަނަ ދުވަހުއެވެ.

ކުއްލި ގޮތަކަށް ސީޒަން މެދުކަނޑާލުމާ ގުޅިގެން މާޒިޔާ ސްޕޯޓްސް އެންޑް ރެކްރިއޭޝަނާއި ކުލަބު އީގަލްސްއިން ނެރުނު ނޫސްބަޔާނެއްގައި ވަނީ ސީޒަން މެދުކަނޑާލުމާއެކު ކުލަބުތަކުގެ ފަރިތަކުންތައްވެސް މެދުކަނޑާލަން ޖެހުމުން ކުޅުންތެރިންނާއި ކޯޗުންނަށް މާޔޫސްކަމާ ކުރިމަތިލާން ޖެހިފައިވާ ކަަމަށް ބުނެފައެވެ.

އެގޮތުން ގިނަ ދުވަސްތަކެއްގެ މެދުކެނޑުމަކަށްފަހު އަދި ކުޅުންތެރިން ފުޓްބޯޅަ ދަނޑާއި ދުރުގައި އެތައް ދުވަހެއް ހޭދަކުރުމަށްފަހު ރާއްޖޭގެ ފުޓްބޯޅަ ސީޒަން ފެށީ އެޗްޕީއޭގެ އުސޫލުތަކަށް އަމަލުކުރަން ޝަރުތުކޮށް، ހާއްސަ ހުއްދައެއްގެ ދަށުން ކަމަށާއި، މި ސީޒަނަށް ކުލަބުތަކުން ތައްޔާރުވާން ފެށި ދުވަހުން ފެށިގެން، ލީގު މެދުކަނޑާލުމާ ހަމައަށް ހުރިހާ ކުލަބުތަކުންވެސް އުސޫލުތަކަށް އަމަލުކުރަމުން އައި ކަމަށްވެސް މި ނޫސްބަޔާންތަކުގައި ވަނީ ބުނެފައެވެ.

ފަރިތަކުރުންތަކުގެ އިތުރުން މެޗުތަކުގައިވެސް އެފްއޭއެމާއި ކުލަބުތަކުން ދިޔައީ އެ އުސޫލުތަކަށް އަމަލުކުރަމުން ކަމަށާއި، ކުލަބުތަކާއި އެފްއޭއެމުންވެެސް އުސޫލުތަކަށް އަމަލުކުރަންދަނިކޮށް، ކުއްލިއަކަށް ފުޓްބޯޅައިގެ ހަރަކާތްތައް ހުއްޓާލަން އެންގުމަކީ ކުލަބުތަކަށް ލިބޭނެ ބޮޑު ގެއްލުމެއް ކަމަށް ވަނީ ބުނެފައެވެ. އަދި ފުޓްބޯޅައިން އާމްދަނީ ހޯދާ ކުޅުންތެރިންނާއި ކޯޗުންނަށްވެސް ފުޓްބޯޅައިގެ ހަރަކާތްތައް ހުއްޓާލުމުގެ އަސަރު ކުރާނެ ކަމަށާއި، ސީޒަން ކުއްލިއަކަށް މެދުކަނޑާލުމަކީ ކުލަބުތަކަށް މާލީ ގޮތުން ވެސް އުނދަގޫތަކެއް ކުރިމަތިވާނެ ކަމެއް ކަމަށްވެސް އެ ކުލަބުތަކުން ވަނީ ބުނެފައެވެ.

މީގެ އިތުރުން ދިވެހި ޕްރިމިއާ ލީގުގެ މެޗުތައް މެދުކަނޑާލި ނަމަވެސް، ފަރިތަކުންތައް ކުރިއަށްގެންދިޔުމުގެ ފުރުސަތުދިނުމަކީ މި ވަގުތު ހުރިހާ ކުލަބެއްގެވެސް އެދުމަކަށްވާއިރު، އުސޫލުތަކާ އެއްގޮތަށް ލީލުގެ މެޗުތައް އަލުން ފެށުމުގެ ފުރުސަތު ސަރުކާރުގެ ކަމާ ބެހޭ އިދާރާތަކުން ކުލަބުތަކަށް ދިނުމަކީ ވަރަށް ބޮޑު އެދުމެއް ކަމަށްވެސް މި ނޫސްބަޔާންތަކުގައި ވަނީ ބުނެފައެވެ.

އެޗްޕީއޭގެ އައު އުސޫލުތަކާ ގުޅިގެން ދިވެހި ޕްރިމިއާ ލީގުގެ ކުޅުން ވަގުތީ ގޮތުން މެދުކަނޑާލިއިރު، އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން ފަށާފައިވަނީ މދިޔަ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ. އަދި ލީގު ކުރިއަށް ގެންދިޔުމަށް އެފްއޭއެމުން ހާއްސަ އުސޫލުތަކެއް ކަނޑައެޅިއިރު، ލީގުގެ މެޗުތައް ކުރިއަށް ގެންގޮސްފައިވަނީ ދަނޑަށް ސަޕޯޓަރުން ނުވައްދައެވެ.

ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ. ލީގުގެ ކުޅުން ވަގުތީ ގޮތުން މެދުކަނޑާލިއިރު، ތާވަލުގެ އެއްވަނައިގައި އޮތީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނެވެ. އެ ޓީމަށް ކުޅުނު ނުވަ މެޗުން 21 ޕޮއިންޓް ލިބިފައިވާއިރު، ދެވަނައިގައި އޮތް ކުލަބު ވެލެންސިއާ އާއި ތިންވަނައިގައި އޮތް ދަ ގްރާންޑޭއަށް ނުވަ މެޗުން ލިބިފައިވަނީ 15 ޕޮއިންޓެވެ.