ބައިނަލްއަގުވާމީ ފޯރިގަދަ މުބާރާތްތައް މި އަހަރު ރާއްޖޭގައި ބޭއްވިގެންދާނެ: މަޙްލޫފް

ބައިނަލްއަގުވާމީ ފޯރިގަދަ މުބާރާތްތަކެއް މި އަހަރުގެ ތެރޭގައި ރާއްޖޭގައި ބޭއްވިގެންދާނެ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ވައުދުފުޅުތަކުގެ ތެރޭގައި ރާއްޖޭގައި ބައިނަލްއަގުވާމީ ކުޅިވަރު މުބާރާތްތައް ބޭއްވުން ހިމެނޭއިރު، މީގެ ކުރިން ވަނީ ބައިނަލްއަގުވާމީ ގިނަ މުބާރާތްތަކެއް ރާއްޖޭގައި ބޭއްވުމަށް ނިންމާފައެވެ.

އެގޮތުން މީގެ ކުރިން ރާއްޖެއިން ވަނީ 2023 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ބޭއްވުމުގެ ތާރީޚީ ބިޑު ކާމިޔާބުކޮށްފައެވެ. އެކަމަކު ބޮޑު ކުޅިވަރު ގޭމްސްއެއް ރާއްޖޭގައި ބާއްވަން ލިބުނު ފުރަތަމަ ފުރުސަތު ގެއްލުނީ ކޮވިޑް-19 އާ ގުޅިގެންނެވެ.

އެކަމަކު މީގެ ކުރިން ރާއްޖެއިން ވަނީ 54 ވަނަ އޭޝިއަން ބޮޑީބިލްޑިންގ އެންޑް ފިޒީކްސް ސްޕޯޓްސް ޗެމްޕިއަންޝިޕް ހޯސްޓް ކުރުމަށް ބިޑާއި، އޭޝިއަން ސެންޓްރަލް ޒޯން ޗެމްޕިއަންޝިޕުގެ އަންހެން ޑިވިޝަނުގެ މުބާރާތް ރާއްޖޭގައި ހޯސްޓް ކުރުމަށް ބިޑް ވަނީ ކާމިޔާބުކޮށްފައެވެ. އަދި ކޮވިޑާއެކު އެ މުބާރާތްތައް ވަނީ މި އަހަރަށް ފަސްކޮށްފައެވެ. އަދި ދާދި ފަހުން ވަޒީރު ވަނީ އެކުވެނި ސިންތެޓިކް ޓްރެކުގައި ބައިނަލްއަގުވާމީ އެތުލެޓިކްސް މުބާރާތެއް ބޭއްވާނެ ކަމަށްވެސް ވިދާޅުވެފައެވެ.

ރާއްޖެޓީވީގައި ވާހަކަފުޅު ދައްކަވަމުން ވަޒީރު ވިދާޅުވީ ކުޅިވަރުގައި އެންމެ މުހިންމު އެއް ކަމަކީ ރާއްޖޭގައި އަމިއްލަ ސަޕޯޓަރުން ކުރިމަތީ އެތުލީޓުންނަށް ވާދަކުރުމުގެ ފުރުސަތު ތަނަވަސްކޮށްދިނުން ކަމަށާއި، އެގޮތުން ބައެއް އިތުރު މުބާރާތްތައް ރާއްޖޭގައި ބޭއްވުމަށް ވަރަށް އަވަހަށް އިއުލާން ކުރެވިގެންދާނެ ކަމަށެވެ. އަދި ސަރުކާރުގެ އަމާޒަކީ ސާފް ޗެމްޕިއަންޝިޕް ފަދައިން ރާއްޖޭގައި ފޯރިގަދަ ވެގެންދާ ފެންވަރުގެ ބައިނަލްއަގުވާމީ މުބާރާތްތައް ބޭއްވުމަށް ކަމަށާއި، އެފަދަ ބައެއް މުބާރާތްތައް މި އަހަރުގެ ތެރޭގައި ބޭއްވިގެންދާނެ ކަމަށެވެ.

ބައިނަލްއަގުވާމީ ފޯރިގަދަ މުބާރާތްތަކެއް މި އަހަރުގެ ތެރޭގައި ރާއްޖޭގައި ބޭއްވިގެންދާނެ ކަމަށް ވަޒީރު ވިދާޅުވިއިރު، މީގެ ކުރިންވެސް މި ސަރުކާރުން ވަނީ ރާއްޖޭގައި ބައިނަލްއަގުވާމީ ބައެއް މުބާރާތްތައް ބާއްވާފައެވެ. އެގޮތުން މި ސަރުކާރުން ވަނީ މޯލްޑިވްސް އިންޓަނޭޝަނަލް ފިއުޗާ ސީރީސް އާއި، މޯލްޑިވްސް އިންޓަނޭޝަނަލް ބެޑްމިންޓަން ޗެލެންޖާއި، އައްޑޫ ސިޓީގައި ކުރިއަށްދިޔަ ސައުތު އޭޝިއާ އަންޑަ 21 ބެޑްމިންޓަން މުބާރާތުގެ އިތުރުން ފީބާ އޭޝިއަން ކްއެސްޓްވެސް ރާއްޖޭގައި ވަނީ ބާއްވާފައެވެ.

އަދި މި މުބާރާތްތައް ހަމައެކަނި މާލޭގައި ބޭއްވުމުގެ ބަދަލުގައި، މުޅި ރާއްޖެއަށް ބަހާލައިގެން މުބާރާތްތައް ބޭއްވުމަކީ މި ސަރުކާރުގެ އަޒުމެއް ކަމަށްވެސް މީގެ ކުރިން ވަޒީރު ވަނީ ވިދާޅުވެފައެވެ.