ނަވަލްނީއަށް ފަރުވާދިން ރަޝިއާގެ ޑޮކްޓަރު ކުއްލިގޮތަކަށް މަރުވެއްޖެ
6 ފެބުރުއަރީ 2021 | ހޮނިހިރު 10:35މިހާތަނަށް އެނގިފައިވާ ގޮތުން ޑޮކްޓަރު މަރުވީ ހަރޓްއެޓޭކެއް ޖެހިގެން
ރަޝިއާގެ އިދިކޮޅު ލީޑަރު ނަވަލްނީ (ކ) އަދި އޭނާއަށް ފަރުވާދިން ޑޮކްޓަރު (ވ)
ރަޝިއާގެ އިދިކޮޅު ލީޑަރު އެލެކްސީ ނަވަލްނީއަށް ފަރުވާދިން އެގައުމުގެ ޑޮކްޓަރު، ޑރ. ސެރޖޭ މެކްޒިމިޝިން މަރުވެއްޖެއެވެ.
ނަވަލްނީއަށް ފަރުވާ ދިން ޑޮކްޓަރަކީ، މިދިޔަ އޮގަސްޓު މަހުގެ 20 ވަނަ ދުވަހު ސައިބީރިޔާއިން މޮސްކޯއަށް ދަތުރު ކުރަމުން ދިޔަ ފްލައިޓެއްގެ ތެރެއިން ސައި ބެއްލެވި ފަހުން ހާލު ގޯސްވެގެން އޮމްސްކް އެމރަޖެންސީ ހޮސްޕިޓަލުގައި ފަރުވާދިން ޑޮކްޓަރެވެ.
ދެ ދުވަސްވަންދެން އެ ހޮސްޕިޓަލުގައި ނަވަލްނީއަށް ފަރުވާދިން އިރު އެންމެ އިސްކޮށް ހަރަކާތްތެރިވީ ވެސް މި ޑޮކްޓަރެވެ. ސެރޖޭ އަކީ ރަޝިއާގެ ހޮސްޕިޓަލުގެ ޑެޕިއުޓީ ޗީފް ފިޒިޝަންއެވެ. އެ ހޮސްޕިޓަލުން ބުނީ ސެރޖޭ މަރުވެފައިވަނީ އުމުރުން 55 އަހަރުގައި ކަމަށާއި، މަރުވީ ކުއްލި ގޮތަކަށް ކަމަށެވެ. އަދި މިހާތަނަށް ލިބުނު މަޢުލޫމާތަށް ބަލާ އިރު އޭނާ މަރުވީ ހަރޓް އެޓޭކެއް ޖެހިގެން ކަމަށް ވެސް ހޮސްޕިޓަލުން ވަނީ ބުނެފައެވެ.
ނަވަލްނީއަށް އޮމްސްކް ހޮސްޕިޓަލުގައި ފަރުވާ ދިނީ 2 ދުވަސް ވަންދެންނެވެ. އަދި 2 ދުވަސް ފަހުން އިތުރު ފަރުވާއަށް ޖަރުމަންވިލާތަށް ގެންދެވުނެވެ. އަދި މިދިޔަ މަހުގެ 18 ވަނަ ދުވަހު އެނބުރި ގައުމަށް ވަޑައިގެންނެވުމުން އޭނާ ވަނީ ޖަލަށްލާފައެވެ.
ބީ.ބީ.ސީ.އިން ރިޕޯޓުކޮށްފައިވާ ގޮތުގައި އޭނާ ފުލުހުންގެ ބަންދަށް ގެންދިޔައީ ސިއްޙީ ފަރުވާއަށް ޖަރުމަނަށް ވަޑައިގަތުމަށްފަހު އެނބުރި ގައުމަށް ވަޑައިގަތުމާއެކު އެއާޕޯޓުގައި ހުންނަވަނިކޮށެވެ. ނަމަވެސް އޭނާ ފުލުހުންގެ ބެލުމުގެ ދަށަށް ގެންދިޔަ ސަބަބު ފުލުހުން ހާމަކޮށްފައި ނުވާ ކަމަށާއި، އޭނާއާއެކު ވަކީލުން ދިއުމުގެ ހުއްދަ ވެސް ދީފައި ނުވާ ކަމަށް ރިޕޯޓުތައް ބުނެއެވެ.
ރަޝިއާގެ ޕްރޮސެކިއުޓަރުންނާ ޙަވާލާދީ ބީ.ބީ.ސީ. އިން ރިޕޯޓުކޮށްފައިވާގޮތުގައި އޭނާ ވަނީ ނަހަމުގޮތުގައި ފައިސާ ހޯދުމުގެ ކުށާ ގުޅިގެން ސަސްޕެންޑްކޮށް ފިޔަވަޅު އަޅައިފައިވާ މުއްދަތުގެ ތެރޭގައި ޕެރޯލް ގަވާއިދާ ޚިލާފުވެފައެވެ. ނަމަވެސް އެއީ ސިޔާސީ ތުހުމަތެއް ކަމަށް ނަވަލްނީ ތުހުމަތުކޮށްފައިވެއެވެ.
އޭނާ ޕެރޯލް ގަވާއިދާ ޚިލާފުވި މައްސަލައިގައި ފެބްރުއަރީ 15ގެ ނިޔަލަށް އޭނާއަށް ބަންދުގެ މުއްދަތު ޖަހާފާއިވާއިރު އެ މައްސަލައިގެ އިތުރު އަޑުއެހުމެއް މި މަހުގެ 29ށް ވަނީ ތާވަލުކޮށްފައެވެ.
ރިޕޯޓުތައް ބުނާގޮތުން ނަހަމަގޮތުގައި ފައިސާ ހޯދުމުގެ ކުށުގައި އޭނާއަށް އިއްވާފައިވާ ތިން އަހަރުގެ ސަސްޕެންޝަން، ޖަލު ހުކުމަކަށް ބަދަލުކުރުމާ މެދު އެ އަޑުއެހުމުގައި ގޮތެއް ނިންމާނެއެވެ.
