ކޮވިޑާއި ގުޅޭ ފިޔަވަޅުތައް ގާތުން ބެލުމަށް އިތުރު ފުލުހުން މަގުމައްޗަށް

ކޮވިޑް-19 އާއި ގުޅިގެން އަޅާފައިވާ ފިޔަވަޅުތައް ތަންފީޒުކުރާ މިންވަރު ބެލުމަށް މަގުމަތީގައި ޙަރަކާތްތެރިވާ ފުލުހުންގެ އަދަދު އިތުރުކޮށްފިއެވެ.

ފުލުހުން ބުނީ، ކޮވިޑް-19އާއި ގުޅޭ ކަންކަން ތަންފީޒުކުރުމަށް ކުރަމުންދާ މަސައްކަތްތަކުގައި މާލެ ސިޓީގައި މަސައްކަތްކުރާ އޮޕަރޭޝަނަލް ފުލުހުންގެ އިތުރުން ފުލުހުންގެ އިދާރީ ބަހާތަކާއި ސީނިއަރ އޮފިސަރުންވެސް ހިމެނޭގޮތަށް މަގުމަތީގައި އިތުރު ފުލުހުން ހަރަކާތްތެރިވަމުންދާ ކަމަށެވެ. އެގޮތުން މާލެ ސަރަހައްދުގައި ކޮވިޑްގެ ހާލަތު ގޯސްވާން ފެށުމާއި ގުޅިގެން މިހާރު އަޅާފައިވާ ފިޔަވަޅުތައް ތަންފީޒު ކުރުމަށް މާލެ ސިޓީގައި މަސައްކަތްކުރާ އޮޕަރޭޝަނަލް ފުލުހުންނަަށް އިތުރު އެހީތެރިކަމެއް ދިނުމުގެ ގޮތުން އިދާރީ 165 ފުލުހުންނާއި، ސީނިއަރ އޮފިސަރުންގެ 44 އޮފިސަރުން ކާފިއުގަޑީގައާއި އެހެނިހެން ގަޑިތަކުގައިވެސް މަސައްކަތް ކުރަމުންދާކަން ފުލުހުން ފާހަގަ ކޮށްފައިވެއެވެ.

ފުލުހުން ބުނީ، ޖުމްލަ 209 ފުލުހުން ދެ ޝިފްޓަކަށް މަސައްކަތްކުރަމުންދާ ކަމަށެވެ.

ފުލުހުންގެ އިންސާނީ ވަސީލަތުގެ ބޮޑުބައެއް ކޮވިޑް 19ގެ މަސައްކަތްތަކުގައި ހަރަކާތްތެރި ވަމުންދާއިރު، ފުލުހުން އަންނަނީ ތަފާތު ކުށްތަކުން ރައްޔިތުން ސަލާމަތް ކުރުމުގައިވެސް ބުރަ މަސައްކަތްތަކެއް ކުރަމުންނެވެ.

އޭގެ އިތުރުން، މިދިޔަ ދެތިން ދުވަހުގެ ތެރޭގައި މާލޭގައި ގުރޫޕްތަކުން ސިލްސިލާކޮށް ހިންގަމުންދާ މާރާމާރީތައް ހުއްޓުވައި، ތަހުގީގުކޮށް މާލޭގެ އަމާންކަމާއި ރައްކާތެރިކަން ދެމެހެއްޓުމުގައި ފުލުހުންގެ ދެމިތިބޭނެކަމުގެ ޔަގީންކަން އެންމެހައި ފަރާތްތަކަށް ފުލުހުން ވަނީ އަރުވާފައެވެ. އަދި ފުލުހުންގެ މަސައްކަތަށް އެއްބާރުލުންދީ، މަގުމަތީގައި އުޅޭއިރު އެޗްޕީއޭގެ ގައިޑްލައިންތަކާއި އެއްގޮތަށް އަމަލުތައް ބެހެއްޓުމަށް ފުލުހުން ވަނީ އިލްތިމާސް ކޮށްފައެވެ.