އިނގިރޭސި ޕްރިމިއާ ލީގުގައި ބުރާސްފަތި ދުވަހުގެރޭ ޓޮޓެންހަމް ހޮޓްސްޕާ ބަލިކޮށް ތާވަލުގެ ހަވަނައަށް ޗެލްސީ ޖެހިލައިފިއެވެ.

ޓޮޓެންމަހުގެ ދަނޑުގައި ކުޅުނު މެޗުން ޗެލްސީ މޮޅުވީ 1-0 ގެ ނަތީޖާއަކުންނެވެ.

މި މެޗުން ޗެލްސީ މޮޅުވިއިރު، އެ ޓީމުގެ ކޯޗުގެ މަގާމާ ތޯމަސް ޓުޗެލް ހަވާލުވި ފަހުން ކުޅުނު ތިން މެޗުންވެސް ޗެލްސީ ބަލިވެފައެއް ނުވެއެވެ. އެގޮތުން ޓުޗެލްއާއެކު ކުޅުނު ފުރަތަމަ މެޗުން ޗެލްސީ އެއްވަރުވިއިރު، އަނެއް ދެ މެޗުން ވަނީ މޮޅުވެފައެވެ. އަދި މި ތިން މެޗުގައިވެސް ޗެލްސީ ކޮޅަށް ލަނޑެއް ވަދެފައެއް ނުވެއެވެ.

ބުރާސްފަތި ދުވަހުގެރޭ ކުޅުނު މެޗުގައި އަނިޔާގެ ސަބަބުން ޓޮޓެންހަމުގެ ތަޖުރިބާކާރު ފޯވާޑް ހެރީ ކޭން ކުޅެފައެއް ނުވެއެވެ. މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ޗެލްސީން ލީޑު ނަގާފައިވަނީ މެޗުގެ 24 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޖޯޖީނިއޯއެވެ. މިއީ އޭރިއާ ތެރެއިން ޗެލްސީގެ ޓިމޯ ވާނާއަށް ޓޮޓެންހަމުގެ އެރިކް ޑަޔާ ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މޮޅާއެކު ތާވަލުގެ ހަވަނައަށް ޗެލްސީ ޖެހިލީ ކުޅުނު 22 މެޗުން ލިބުނު 36 ޕޮއިންޓާއެކުއެވެ. ތާވަލުގެ ހަތްވަނައިގައި އޮތް އެވަޓަންއަށް 20 މެޗުން ހަމަ އެ އަދަދަށް ޕޮއިންޓް ލިބިފައިވާއިރު، ޗެލްސީއަށް ކުރި ލިބެނީ ލަނޑުގެ ތަފާތުންނެވެ. އަދި ޗެލްސީ އަތުން ބަލިވި ޓޮޓެންހަމް އޮތީ ތާވަލުގެ އަށްވަނައިގައި 21 މެޗުން 33 ޕޮއިންޓާއެކުއެވެ.