ދިރާގު ދިވެހި ޕްރިމިއާ ލީގުގެ ކުޅުން ވަގުތީ ގޮތުން މެދުކަނޑާލައިފިއެވެ.

ދިވެހި ޕްރިމިއާ ލީގު މެދުކަނޑާލަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމީ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އައު އުސޫލުތަކާ ގުޅިގެންނެވެ. އެގޮތުން އަންގާރަ ދުވަހު ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވަނީ ރާއްޖޭގައި ކުޅިވަރުގެ އެންމެހާ ހަރަކާތްތައް މެދުކަނޑާލުމަށް އަންގާފައެވެ.

ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާން ޑރ. ނަޒްލާ ރަފީގު ވިދާޅުވީ އެކަނިވެރި ކަސްރަތު ފިޔަވާ، ހުރިހާ ކުޅިވަރު ހަރަކާތްތައް ކުރިއަށް އޮތް ދެ ހަފްތާއަށް ހުއްޓާލުމަށް އަންގާ ކަމަށެވެ. އަދި ކުރިއަށް އޮތް ދެ ހަފުތާގެ ތެރޭގައި ކޮވިޑް-19 ގެ ކޭސްތަކުގެ އަދަދުތައް އިތުރުވާ މިންވަރު ބެލުމަށްފަހުގައި، މި މުއްދަތު އިތުރުކުރަން ޖެހިދާނެ ކަމަށްވެސް ޑރ. ނަޒްލާ ވަނީ ވިދާޅުވެފައެވެ.

އެއާއެކު ބުދަ ދުވަހު އެފްއޭއެމުން ވަނީ ލީގުގެ ކުޅުން ވަގުތީ ގޮތުން މެދުކަނޑާލަން ނިންމައި އެކަން އިއުލާން ކޮށްފައެވެ. އަދި ލީގުގެ ކުޅުން އަލުން ފަށާނެ ތާރީޚެއް ފަހުން އިއުލާން ކުރާނެ ކަމަށްވެސް ވަނީ ބުނެފައެވެ.

ލީގުގެ ކުޅުން މެދުކަނޑާލަން ނިންމިއިރު، މީގެ ކުރިން ބުދަ ދުވަހު ދެ މެޗެއް ކުޅުމަށް ވަނީ ތާވަލުކޮށްފައެވެ. އެއީ ބުދަ ދުވަހުގެ ހަވީރު ސުޕަ ޔުނައިޓެޑް ސްޕޯޓްސް (ސަސް) އާއި ކުލަބު އީގަލްސް ބައްދަލުކުރަން އޮތް މެޗާއި، ބުދަ ދުވަހުގެރޭ ކުލަބު ގްރީން ސްޓްރީޓްސް އާއި ޔުނައިޓެޑް ވިކްޓަރީ (ޔޫވީ) ބައްދަލުކުރަން އޮތް މެޗެވެ.

އެޗްޕީއޭގެ އައު އުސޫލުތަކާ ގުޅިގެން ދިވެހި ޕްރިމިއާ ލީގުގެ ކުޅުން ވަގުތީ ގޮތުން މެދުކަނޑާލިއިރު، އެޗްޕީއޭގެ ހާއްސަ ހުއްދައެއްގެ ދަށުން މި ސީޒަން ފަށާފައިވަނީ މދިޔަ ޑިސެމްބަރު މަހުގެ އަށްވަނަ ދުވަހުއެވެ. އެގޮތުން ޗެރިޓީ ޝީލްޑް މެޗުން ސީޒަން ފެށިއިރު، ދިވެހި ޕްރިމިއާ ލީގުގެ ކުޅުން ފަށާފައިވަނީ އެ މަހުގެ 13 ވަނަ ދުވަހުއެވެ. އަދި ލީގު ކުރިއަށް ގެންދިޔުމަށް އެފްއޭއެމުން ހާއްސަ އުސޫލުތަކެއް ކަނޑައެޅިއިރު، ލީގުގެ މެޗުތައް ކުރިއަށް ގެންދަނީ ދަނޑަށް ސަޕޯޓަރުން ނުވައްދައެވެ.

ދެވަނަ ބުރުގެ މެދުތެރެއިން ލީގު މެދުކަނޑާލިއިރު، މިހާތަނަށް ލީގުގައި ވަނީ ޖުމްލަ 34 މެޗު ކުޅެފައެވެ. ލީގުގެ ކުޅުން ވަގުތީ ގޮތުން މެދުކަނޑާލިއިރު، ތާވަލުގެ އެއްވަނައިގައި އޮތީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނެވެ. އެ ޓީމަށް ކުޅުނު ނުވަ މެޗުން 21 ޕޮއިންޓް ލިބިފައިވާއިރު، ދެވަނައިގައި އޮތް ކުލަބު ވެލެންސިއާ އާއި ތިންވަނައިގައި އޮތް ދަ ގްރާންޑޭއަށް ނުވަ މެޗުން ލިބިފައިވަނީ 15 ޕޮއިންޓެވެ.