ތިންވަނަ ޑިވިޝަން ފެށުން އަނެއްކާވެސް ފަސްކޮށްފި

ތިންވަނަ ޑިވިޝަން ފުޓްބޯޅަ މުބާރާތް ފެށުން އަނެއްކާވެސް ފަސްކޮށްފިއެވެ.

އެންމެ ފުރަތަމަ މި މުބާރާތް ފެށުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ތާވަލުކުރީ މި މަހުގެ އެއްވަނަ ދުވަހުއެވެ. އެކަމަކު ފަހުން މި މުބާރާތް ފެށުން މި މަހުގެ ހަތަރުވަނަ ދުވަހަށް ތާވަލުކުރިއިރު، މިހާރު މުބާރާތް ފެށުމަށް އެފްއޭއެމުން ނިންމާފައިވަނީ މި މަހުގެ 10 ވަނަ ދުވަހެވެ.

އެފްއޭއެމުން މައުލޫމާތުދޭ ގޮތުގައި މުބާރާތް ފެށުން ފަސްކުރަން ނިންމީ ބައިވެރިވި ޓީމުތަކުންވެސް އެ ގޮތަށް ބޭނުންވުމުގެ އިތުރުން، މުބާރާތަށް ވާންޖެހޭ އެހެން ތައްޔަރީތަކަށް ވެސް ވަގުތު ބޭނުންވާތީ ކަމަށެވެ.

މި އަހަރުގެ ތިންވަނަ ޑިވިޝަން ފުޓްބޯޅަ މުބާރާތުގެ ކުޅުން މި މަހު ފަށާއިރު، މި މުބާރާތުގައި ވާދަކުރާނީ 15 ޓީމެވެ. އެންމެ ފުރަތަމަ މުބާރާތުގައި ބައިވެރިވާން ހުޅުވާލި ފުރުސަތުގައި 22 ޓީމަކުން މުބާރާތުގައި ބައިވެރިވާން ފޯމު ހުށަހެޅި ނަމަވެސް، ގިނަ ޓީމުތަކެއްގެ ލިޔެކިޔުންތައް ހަމަކުރުމުގައި ދަތިތަކެއް ހުރުމުން ދެ ފަހަރެއްގެ މަތިން އެފްއޭއެމުން މުއްދަތު އިތުރުކޮށްދިނެވެ. އެ މުއްދަތުގައި 16 ޓީމަކުން ލިޔެކިއުންތައް ހުށަހެޅި ނަމަވެސް، އަމިއްލަ ސަބަބުތަކާ ހުރެ އެއް ޓީމުން ވަނީ މުބާރާތާ ވަކިވާން ނިންމާފައެވެ.

އެހެންކަމުން މި މުބާރާތް ކުރިއަށް ގެންދިޔުމަށް އެފްއޭއެމުން ނިންމާފައިވަނީ ހަތަރު ގްރޫޕަކަށް ބަހާލައިގެންނެވެ. އެގޮތުން ފުރަތަމަ ތިން ގްރޫޕުގެ ތެރެއިން ކޮންމެ ގްރޫޕެއްގައި ހަތަރު ޓީމު ހިމެނޭއިރު، ފަހު ގްރޫޕުގައި ހިމެނެނީ ތިން ޓީމެވެ. އަދި ގްރޫޕް ސްޓޭޖް މެޗުތަކަށްފަހު ކުއާޓާފައިނަލަށް ކޮންމެ ގްރޫޕަކުންވެސް އެންމެ މޮޅު ދެ ޓީމު ދަތުރުކުރާއިރު، ފައިނަލް މެޗު ކުޅުމަށް އެފްއޭއެމުން ތާވަލުކޮށްފައިވަނީ މާޗު މަހުގެ ނުވަވަނަ ދުވަހުއެވެ.

މި އަހަރު ތިންވަނަ ޑިވިޝަން ފުޓްބޯޅަ މުބާރާތް ބާއްވާއިރު، މިދިޔަ ދެ އަހަރުވެސް މި މުބާރާތް ބާއްވާފައެއް ނުވެއެވެ. އެންމެ ފަހުން މި މުބާރާތް 2018 ވަނަ އަހަރު ބޭއްވިއިރު، އެ ފަހަރު ޗެމްޕިއަންކަން ހޯދީ ރޮކް ސްޓްރީޓްސް ސްޕޯޓްސް ކުލަބެވެ.