މޫސުމީ ބަދަލުތަކާ ގުޅޭ ރިސާރޗް އިންސްޓިޓިއުޓެއް އައްޑޫގައި ޤާއިމުކުރަނީ
1 ފެބުރުއަރީ 2021 | ހޯމަ 13:57އެމްއެންޔޫ ކައުންސިލްގެ 300 ވަނަ ބައްދަލުވުން އައްޑޫގައި ބޭއްވުމަށް ވަނީ ނިންމާފައި
އެމް.އެން.ޔޫއިން އައްޑޫ ސިޓީ ކައުންސިލާއެކު ބޭއްވި ބައްދަލުވުމުގެ ތެރެއިން
މޫސުމީ ބަދަލުތަކާގުޅޭ ރިސާރޗް އިންސްޓިޓިއުޓެއް ހިތަދޫ ކެމްޕަސްގައި ޤާއިމުކުރުމާއި ގުޅޭގޮތުން މަޝްވަރާކޮށްފިއެވެ.
މި މަޝްވަރާކޮށްފައިވަނީ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން އައްޑޫ ސިޓީ ކައުންސިލާއެކު ބޭއްވި ބައްދަލުވުމުގެ ތެރެއިންނެވެ. އައްޑޫ ސިޓީ ކައުންސިލްގެ އިދާރާގައި އޮތް މި ބައްދަލުވުމުގައި، އެމް.އެން.ޔޫ ހިތަދޫ ކެމްޕަސް 02 ގައި ދެ ފަންގިފިލާގެ އިމާރާތެއް ޤާއިމުކުރުމާ ގުޅޭގޮތުން މަޝްވަރާކުރިއެވެ. މިގޮތުން އެ އިމާރާތުގައި އެ ޔުނިވަރސިޓީގެ ބުކްޝޮޕެއް ޤާއިމުކުރުމާއި، އިމާރާތުގެ ބައިތައް އޮފީސް ހިންގުމަށާއި، ޢާންމުންނަށް ވިޔަފާރީގެ ބޭނުމަށް ދޫކުރުމާ ގުޅޭގޮތުން ބައްދަލުވުމުގެ ބައިވެރިން ވަނީ މަޝްވަރާކޮށްފައެވެ.
މީގެ އިތުރުން، ސިޓީ ބުސްތާންގައި އެންމެ ފަހުގެ ޒަމާނީ ވަސީލަތްތައް ބޭނުންކޮށްގެން ދަނޑުވެރިކަން ފެށުމުގެ ގޮތުން، ސިޓީ ކައުންސިލާއި އައްޑޫ ޕީޕަލްސް ކޯޕަރޭޓިވް (އޭ.ޕީ.ސީ) ގުޅިގެން މަސައްކަތް ކުރުމާ ގުޅޭގޮތުންވެސް މި ބައްދަލުވުމުގައި ވަނީ މަޝްވަރާކޮށްފައެވެ. އަދި އަންނަ އަހަރުގެ ތެރޭގައި ދަނާލުގެ އާ ޢިމާރާތެއް ޤާއިމުކުރުމާއި، ކެމްޕަސް 02ގެ އެކޮމޮޑޭޝަން އަޕްގްރޭޑް ކުރުމުގެ އިތުރުން، އެ ކެމްޕަހުގައި ފަތުރުވެރިކަމާގުޅޭ ކޯސްތައް ފެށުމާ ގުޅޭގޮތުން މަޝްވަރާކުރިއެވެ. އެގޮތުން މި އަހަރުގެ ދެވަނަ ޓާމުގައި އެ ކެމްޕަހުގައި ފަތުރުވެރިކަމުގެ ދާއިރާގެ ކޯސްތައް ފެށުމަށް ރާވާފައިވާ ކަމުގައި އެމް.އެން.ޔޫން ހާމަކުރިއެވެ.
މިއަދުގެ ބައްދަލުވުމުގައި، އެމް.އެން.ޔޫގެ ހިތަދޫ ކެމްޕަހުގައި ފުޓްސަލްއާއި، ނެޓްބޯޅަ އަދި ހޭންޑްބޯޅައިގެ އިތުރުން ބާސްކެޓްބޯޅަ ފަދަ ކުޅިވަރުތައް ކުޅެވޭނެ ގޮތަށް މަލްޓިޕަރޕަސް ހޯލެއް ޤާއިމުކުރުމާ ގުޅޭގޮތުން މަޝްވަރާކުރިއެވެ. މިގޮތުން އެ ހޯލު އެންމެ ރަނގަޅު ގޮތުގައި އިމާރާތްކޮށް ބޭނުންކުރެވިދާނެ ގޮތްތަކާ ގުޅޭގޮތުން ބައްދަލުވުމުގެ ބައިވެރިން މަޝްވަރާކުރިއެވެ. މީގެ އިތުރުން، މި ބައްދަލުވުމުގައި، ސިޓީ ބާޒާރުގައި މިހާރު ހުރި ފިހާރަތައް ބޮޑުކުރުމާއި، އިތުރު ފިހާރައާއި ކޮފީ ޝޮޕެއްގެ އިތުރުން ފާޚާނާ ބަރިއެއްވެސް ޤާއިމުކުރުމާ ގުޅޭގޮތުން މަޝްވަރާކުރިއެވެ.
މި ބައްދަލުވުމުގައި އެމް.އެން.ޔޫން ހާމަކުރި ގޮތުގައި އެ ޔުނިވަރސިޓީގެ އެންވަޔަރަންމަންޓް ޑިޕާޓްމަންޓްގެ ދަށުން މޫސުމީ ބަދަލުތަކާ ގުޅޭ ކޯސްތައް ފެށުމުގެ މަސައްކަތް ކުރަމުންދާ ކަމުގައެވެ. މީގެ އިތުރުން، ބޭރުގެ ޔުނިވަރސިޓީތަކާ ގުޅިގެން، އެމް.އެން.ޔޫގެ ހިތަދޫ ކެމްޕަހުގައި މޫސުމީ ބަދަލުތަކާ ގުޅޭ ރިސާރޗް އިންސްޓިޓިއުޓެއް ޤާއިމުކުރުމަށް ނިންމަވާފައިވާ ކަމަށާއި، މި ފެބުރުވަރީ މަހުގެ މެދުތެރޭގައި މި މަސައްކަތް ފެށިގެންދާނެ ކަމުގައި އެ ޔުނިވަރސިޓީގެ ފަރާތުން ހާމަކުރިއެވެ.
ބައްދަލުކުރެއްވުން ނިންމަވާލައްވަމުން އެމް.އެން.ޔޫގެ ވައިސް ޗާންސެލަރ، ޑރ. މުޙައްމަދު ޝަރީފް ވިދާޅުވީ، އެ ޔުނިވަރސިޓީގެ ކައުންސިލްގެ 300 ވަނަ ބައްދަލުވުން އައްޑޫ ސިޓީގައި ބޭއްވުމަށް ނިންމަވާފައިވާ ކަމުގައެވެ.
މި ބައްދަލުވުމުގައި އައްޑޫ ސިޓީ ކައުންސިލްގެ ފަރާތުން މޭޔަރ އާއި ޑެޕިޔުޓީ މޭޔަރގެ އިތުރުން ބައެއް ކައުންސިލަރުން ބައިވެރިވެވަޑައިގެންނެވިއެވެ. އަދި އެމް.އެން.ޔޫގެ ފަރާތުން އެ ޔުނިވަރސިޓީގެ ވައިސް ޗާންސެލަރ، ޑރ. މުޙައްމަދު ޝަރީފާއި، ޑެޕިޔުޓީ ވައިސް ޗާންސެލަރ ހުސައިން ހަލީމް އަދި ހިތަދޫ ކެމްޕަހުގެ މެނޭޖަރ އިދުހާމް ފަހުމީވެސް ބައިވެރިވެޑައިގެންނެވިއެވެ.
