ވެކްސިން ޕްރޮގްރާމާއިއެކު ވިޔަފާރިވެރިންނަށް ލިބިގެންދަނީ ބޮޑު އުއްމީދެއް- މުހައްމަދު އުމަރު މަނިކް
1 ފެބުރުއަރީ 2021 | ހޯމަ 06:38މުހައްމަދު އުމަރު މަނިކު ވަނީ ރައީސް ޞާލިހަށް ޝުކުރު އަދާކުރައްވާފައި
ޔުނިވަރސަލް އެންޓަރޕްރައިޒަސްގެ ޗެއަރމަން މުހައްމަދު އުމަރު މަނިކް
ރާއްޖޭގައި ވެކްސިން ޖަހަން ފެށުމާއިއެކު ވިޔަފާރިވެރިންނަށް ލިބިގެން ދަނީ ވަރަށް ބޮޑު އައު އުއްމީދެއް ކަމަށް ޔުނިވަރސަލް އެންޓަރޕްރައިޒަސްގެ ޗެއަރމަން މުހައްމަދު އުމަރު މަނިކު ވިދާޅުވެއްޖެއެވެ.
ރާއްޖޭގައި ވެކްސިން ޖެހުމުގެ ޕްރޮގްރާމް ފެށުމާއިއެކު ވެކްސިން ޖައްސަވާ ނިންމެވުމަށްފަހު ރާއްޖެޓީވީއަށް ދެއްވި އިންޓަރވިއު އެއްގައި މުހައްމަދު އުމަރު މަނިކު ވިދާޅުވީ ވެކްސިންގެ ސަބަބުން އެއްވެސް އުނދަގުލެއް ތަހައްމަލު ކުރަން ނުޖެހުނު ކަމަށާއި އެކަންވެ ނިމިގެން ދިޔައީ ކުޑަކުޑަ ވަގުތުކޮޅެއްގެ ތެރޭގައި ކަމަށެވެ.
މުހައްމަދު އުމަރު މަނިކު ވަނީ ރާއްޖެއަށް ވެކްސިން ހޯދަވައި އަދި ވެކްސިން ޖެއްސެވުމުގެ ޕްރޮގްރާމް ހޯދެވުމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ކުރެއްވި މަސައްކަތް ފާހަގަކުރައްވައިށް ޝުކުރުއަދާކުރައްވާފައެވެ. އަދި ރައީސް އަމިއްލަފުޅަށް އިސްނަންގަވައިގެން ކުރެއްވި މަސައްކަތަށް ތައުރީފު ކުރައްވާފައެވެ.
ޔުނިވަރސަލް އެންޓަރޕްރައިސެސްގެ ޗެއަރމަން މުހައްމަދު އުމަރު މަނިކަކީ މަޝްހޫރު އަދި ކާމިޔާބު ވިޔަފާރިވެރިއްގެ އިތުރުން ފަތުރުވެރިކަމުގެ ސިނާއަތް ކުރިއެރުވުމުގައި ގިނަގުނަ މަސައްކަތްތަކެއް ކުރައްވާފައިވާ ބޭފުޅެކެވެ. މުހައްމަދު އުމަރު މަނިކު ވެކްސިން ޖެއްސެވުމާއިއެކު ވެކްސިން ޖެހުމަށް ފަތުރުވެރިކަމުގެ ސިނައަތުގައި މަސައްކަތް ކުރައްވާ ފަރާތްތަކާއި ވިޔަފާރިވެރިންނަށް ހިތްވަރަކަށް ވެގެން ދާނެއެވެ.
ހޯމަ ދުވަހު ފެށި މި ޕްރޮގްރާމްގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙުގެ އިތުރުން، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި ދިވެހިރާއްޖޭގެ އުއްތަމަ ފަނޑިޔާރު މުއުތަސިމް އަދުނާން ވެސް ވަނީ ވެކްސިން ޖައްސަވާފައެވެ.
