ކުރިޔަށް އޮތް ލޯކަލް ކައުންސިލް އިންތިޚާބު ކާމިޔާބު ކުރާނެކަމުގެ ޔަގީން ކަމާއެކު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކެންޕޭން ފަށަައިފި އެވެ.
އާދިއްތަ ދުވަހު އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެމް.ޑީ.ޕީ.ގެ ރައީސް، ރައީސް މުހައްމަދު ނަޝީދު ވިދާޅުވީ މިފަހަރު ޕެންޑަމިކެއްގައި ގައިދުރުކޮށްގެން ރީތި ކެމްޕޭނެއް ހިންގާގޮތް ފެންނާނެ ކަމަށާއި، މިއީ މުޅިން އައު ޗެލެންޖެއް ކަމަށެވެ.
ހުރިހާ ރަށެއްގައި ކެމްޕޭންގެ ހަރަކާތްތައް ކުރިއަށްދާނެކަން ފާހަގަކުރައްވައި ރައީސް ނަޝީދު ވިދާޅުވީ އަތޮޅުތެރޭގެ ހުރިހާ ހިސާބަކަށް އެމް.ޑީ.ޕީ.ގެ މެމްބަރުން ދަތުރުކޮށް، ކަރަންޓީންގެ މުއްދަތު ފުރިހަމަ ކުރުމަށްފަހު އެސަރަޙައްދުތަކުގައި ކެންޕޭންގެ ހުރިހާ ހަރަކާތެއް ކުރިއަށް ގެންދާނެ ކަމަށެވެ. އަދި މިކެމްޕޭން ހަރަކާތްތަކުގައި އެމަނިކުފާނު ވެސް ކަރަންޓީން ވެވަޑައިގެން ބައިވެރިވާނެ ކަމަށް ވިދާޅުވިއެވެ.
ރައީސް ނަޝީދު ވިދާޅުވީ އަމަލުކުރާނީ ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންއާ އެއްގޮތަށް ކަމަށާއި، ކައުންސިލް އިންތިޚާބުގެ ކެމްޕޭން ވަރަށް ތަފާތުވާނެ ކަމަށެވެ.
އެގޮތުން ޑޯ ޓު ޑޯޓުގެ ހަރަކާތްތައް ކުރިއަށް ނުގެންދާނެ ކަމަށާއި، ޖަލްސާތައް ވެސް ބާއްވަމުންދާނީ ދެތިން ސަރަޙައްދެއްގައި ސްކްރީން ބަހައްޓައިގެން ގައިދުރުކަމާއެކު ކަމަށް ރައީސް ނަޝީދު ވިދާޅުވިއެވެ. އަދި ޕެންޑަމިކްއެއްގައި ގައިދުރުކޮށްގެން ރީތި ކެމްޕޭނެއް ހިންގާގޮތް މިފަހަރު ރައްޔިތުންނަށް ފެނިގެންދާނެ ކަމަށް ރައީސް ނަޝީދު ވިދާޅުވިއެވެ.
މީގެ އިތުރުން ރައީސް ނަޝީދު ވިދާޅުވީ އިންތިޚާބުގައި ވާދަކުރާ 838 ކެންޑިޑޭޓުންނާއެކު އިންތިޚާބުގެ 70 އިންސައްތަ ގޮނޑި ކާމިޔާބު ކުރެވޭނެ ކަމަށެވެ.
''ރަށްވެހި ފަތިސް'' ޝިޢާރުގެ ދަށުން ކުރިއަށް ގެންދާ ކެމްޕޭންގެ ހަރަކާތްތައް އާދިއްތަ ދުވަހުން ފެށިގެން ކުރިއަށްދާނެއެވެ. ކޮވިޑް-19ގެ ކޭސްތައް ފެނުމުގެ ކުރިން ވެސް އެމް.ޑީ.ޕީ.ން ކެންޕޭންގެ ހަރަކާތްތައް އަތޮޅުތެރޭގެ އެކި ހިސާބުތަކުގައި ވަރަށް ފޯރިއާއެކު ކުރިއަށް ގެންގޮސްފައިވެއެވެ.
