ދަޢުވާއަށް ޖަވާބުދާރީވުމަށް އިތުރު އަޑުއެހުމެއް ބާއްވައިދިނުމަށް އަދުރޭ އެދެފި
ރައީސް ޔާމީންގެ މައްޗަށް މަނީ ލޯންޑަރިންގ ކުށް ސާބިތުވެ، 5 އަހަރަށް ޖަލަށްލުމަށް ހުކުމް ކުރި ދުވަހު، އަބްދުއްރަހީމް ވަނީ، ހުކުމް ކުރި ފަނޑިޔާރުންނަށް ނިސްބަތްކޮށް ހަޑިހުތުރުބަސް ބޭނުންކުރައްވާފައި
ޕީ.އެން.ސީ.ގެ ރައީސް އަބްދުއްރަހީމްގެ މައްޗަށް ދައުލަތުން އުފުލި ދަޢުވާއާ ގުޅިގެން މިއަދު ކްރިމިނަލް ކޯޓުގައި ބޭއްވި އަޑުއެހުމުގެ ތެރެއިން
އިދިކޮޅު ޕީޕަލްސް ނެޝަނަލް ކޮންގްރެސް (ޕީއެންސީ)ގެ ރައީސް އަދި އިދިކޮޅޮ ޕީޕީއެމް-ޕީއެންސީ ކޯލިޝަނުގެ ލީޑަރުގެ ގޮތުގައި ހަރަކާތްތެރިވާ އަބްދުއްރަހީމް އަބްދުﷲގެ މައްޗަށް އުފުލާފައިވާ ދަޢުވާއަށް ޖަވާބުދާރީވުމަށް އިތުރު އަޑުއެހުމެއް ބާއްވައިދެއްވުމަށް އަބްދުއްރަހީމް އެދެފިއެވެ.
ކްރިމިނަލް ކޯޓުގައި އާދިައްތަ ދުވަހު ކުރިއަށްދިޔަ މި އަޑުއެހުމުގައި، އަބްދުއްރަހީމްގެ ޤާނޫނީ ވަކީލު ވިދާޅުވީ، ދަޢުވާ ސާފުވެއްޖެކަން ކަނޑައެޅުމާއި ދަޢުވާއަށް ޖަވާބުދާރީވުމަށް އިތުރު އަޑުއެހުމެއް ބާއްވައިދިނުމަށް އެދޭ ކަމަށެވެ. ސަބަބަކީ، މި މައްސަލައިގެ ލިޔެކިޔުންތައް ލިބުނީ ވެސް އަޑުއެހުން ބާއްވަން އޮތްދުވަހުކަމަށްވާތީ، އެލިޔުންތައް ބަލައި ދިރާސާކޮށްލަން ވަގުތުކޮޅެއް ބޭނުންވާތީ ކަމަށް ޤާނޫނީ ވަކީލު ވިދާޅުވިއެވެ.
އަބްދުއްރަހީމްގެ ޤާނޫނީ ވަކީލު އެހެން ވިދާޅުވުމުން މި މައްސަލަ ބައްލަވާ ގާޒީ ހަސަން ސައީދު ވަނީ މި މައްސަލައިގެ އިތުރު އަޑުއެހުމެއް އަންނަ ހަފުތާގައި ބޭއްވޭނެކަން އިޢުލާން ކުރައްވައި އާދިއްތަ ދުވަހުގެ އަޑުއެހުން ނިންމާލައްވާފައެވެ.
އާދިއްތަ ދުވަހުގެ އަޑުއެހުން ނިންމާލާފައިވަނީ އަބްދުރައްހީމްގެ މައްޗަށް ދައުލަތުން ކުރާ ދަޢުވާ އިއްވުމަށްފަހުގައެވެ. ދައުލަތުން އަބްދުއްރަހީމްގެ މައްޗަށް ކުރާ ދަޢުވާގައި ބުނެފައިވަނީ، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ހުކުމްކުރުމަށް ކްރިމިނަލް ކޯޓުގައި 28 ނޮވެމްބަރު 2019 ވަނަ ދުވަހު ބޭއްވި ޝަރީޢަތް، އެކޯޓުގައި ކުރިއަށްދަނިކޮށް، ކްރިމިނަލް ކޯޓު ސަރަޙައްދުގައި ހިނގަމުންދިޔަ މުޒާހަރާގައިހުރެ، ހަޑިހުތުރު އެއްޗެހިކިޔައި ހަޑިހުތުރު ބަސް ބޭނުންކޮށްފައިވާ ކަމަށެވެ. އަދި އެދައުވާގައި ބުނެފައިވަނީ، ރައީސް ޔާމީންގެ މައްސަލަ ކްރިމިނަލް ކޯޓުގައި ބެލި ފަސް ފަނޑިޔާރުންނަށް ނިސްބަތްވާގޮތަށް ހަޑިހުތުރުބަސް ބޭނުންކޮށް، އެބޭފުޅުންގެ ވެރިކަމެއްގައި އެ ފަސް ފަނޑިޔާރުން ޖަލަށްލާނެ ކަމަށް އަބްދުއްރަހީމް ވިދާޅުވެފައިވާ ކަމަށެވެ.
އާދިއްތަ ދުވަހު ބާއްވާފައި މިވަނީ، ނިމިދިޔަ 18 ވަނަ ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރުކަން ވެސް ކުރެއްވި އަދި ކުރީގެ ރައީސް އަބްދުﷲ ޔާމީންގެ ސަރުކާރުގެ އިސްވެރިއެއް ކަމަށްވާ އަބްދުއްރަހީމްގެ މައްޗަށް ކޮށްފައިވާ ދައުވާގެ ފުރަތަމަ އަޑުއެހުމެވެ.
ކްރިމިނަލް ކޯޓުގެ ސަރަޙައްދު ކައިރީގައި ހުންނަވައިގެން ބޭއަދަބީ ބަސްތައް ބޭނުންކުރި މައްސަލައިގައި އަބްދުއްރަހީމްގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ދައުވާކުރަން ކްރިމިނަލް ކޯޓަށް ފޮނުވާފައިވަނީ މިދިޔަ އޮކްޓޯބަރު މަހުގެ 26 ވަނަ ދުވަހުއެވެ.
އިދިކޮޅު ކޯލިޝަނުން ކޯޓުތައް ހިމެނޭ ސަރަޙައްދުގައި މުޒާހަރާ ކުރަން ފަށާފައިވަނީ، އެމް.އެމް.ޕީ.އާރު.ސީ.ގެ ޚިޔާނާތުގެ މައްސަލަތަކުގައި އެމަނިކުފާނުގެ މައްޗަށް ދަޢުވާއުފުލުމާ ގުޅިގެންނެވެ. ދަޢުވާ އުފުލާފައިވަނީ، އެމް.އެމް.ޕީ.އާރު.ސީ.ގެ ޚިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްޤީކުރުމަށް ދޫކުރި ގއ. ވޮޑަމުލާ ކިޔާ ފަޅުރަށެއްގެ އިކުއިޒިޝަން ކޮސްޓްގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އެމަނިކުފާނުގެ އަމިއްލަފުޅު އެކައުންޓަށް ޖަމާކޮށް، މަނީ ލޯންޑަރ ކުރުމުގެ ތުހުމަތުގައެވެ. އެމައްސަލައިގައި ރައީސް ޔާމީންގެ މައްޗަށް ކުށް ސާބިތުވެ، ފަސް އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާކޮށް، ހަމަސް ދުވަހުގެ ތެރޭގައި އެ ފައިސާ މީރާއަށް ދެއްކުމަށް ހުކުމް އިއްވީ 28 ނޮވެންބަރު 2019 ގައެވެ. އެދުވަހު ވެސް ކްރިމިނަލް ކޯޓު ސަރަޙައްދުގައި އެމަނިކުފާނުގެ ސަޕޯޓަރުން މުޒަހާރަކޮށްފައި ވެސް ވެއެވެ.
އަބްދުއްރަހީމްގެ މައްޗަށް ޤާނޫނުލްއުޤޫބާތުގެ 615 ވަނަ މާއްދާގެ ދަށުން ހަޑިހުތުރު އެއްޗެހި ކިއުމާއި ހަޑިހުތުރު ބަސް ބޭނުންކުރުމުގެ ދަޢުވާ އުފުލާފައިވާއިރު، މިފަހުން ބާއްވާ މުޒާހަރާތަކާއި ބާއްވާ ނޫސްވެރިންގެ ބައްދަލުވުންތަކުގައި ބޭއަދަބީ ބަސް ބޭނުންކުރައްވާ ކަމަށް ބައެއް ފަރާތްތަކުން ދަނީ ތުހުމަތު ކުރަމުންނެވެ.
އެގޮތުން 26 ސެޕްޓެންބަރު 2020 ވީ ހޮނިހިރު ދުވަހުގެ ރޭ އަބްދުއްރަހީމް ވަނީ ލައިވް ޓީވީގައި ރައީސް އިބްރާހިމް މުހައްމަދު ޞާލިޙްއަށް ނިސްބަތްކޮށް އަވަގުރާނަ ވެސް ގޮވާފައެވެ.
ރައީސް ޔާމީން މިނިވަން ކުރުމަށް ގޮވާލައި، އިދިކޮޅު ކޯލިޝަނުން މިހާރު ކުރިއަށްގެންދާ ސިލްސިލާ މުޒާހަރާތަކުގައި އިސްދައުރެއް އަދާކުރަމުންދާ އަބްދުއްރަހީމް ހައްޔަރުކޮށްފައި ވެސް ވެއެވެ. ނަމަވެސް ފަހުން ވަނީ ދޫކޮށްލާފައެވެ.
